ރާއްޖޭގެ އެއްރަށުން އަނެއް ރަށަށް ދަތުރު ކުރުމަށް ދިމާވެފައިވާ ދަތިތަކަށް ހައްލު ގެނައުމަށް ކުރައްވަމުންދާ މަސައްކަތުގެ ތެރެއިން ށ.އަތޮޅު ރައްޔިތު އެދޭގޮތަށް ކުޑަފަރުގައި އެއަރޕޯޓް އަޅުއްވައިދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙު ވައުދުވެ ވަޑައިގެންފިއެވެ.
ކެމްޕޭން ފެށުމަށް ކޮމަންޑޫ ފުރަތަމަ ރަށެއްގެ ގޮތުގައި ޚިޔާރު ކުރެއްވީ ސަބަބެއް ނެތިނޫންކަން ފާހަގަކުރައްވާ ރައީސް ވިދާޅުވީ ކޮމަންޑޫއަކީ ކެމްޕޭން ކުރަން ދަންނަ ރަށެއް ކަމަށެވެ. އަދި އެއީ އިންތިޚާބުތަކުގައި ބަލިވާ ރަށެއް ނޫންކަމަށް ވެސް ރައީސް ވިދާޅުވިއެވެ.
ރިޔާސީ އިންތިޚާބުގެ ކެމްޕޭނަށް ށ. ކޮމަންޑޫއަށް ވަޑައިގެން ރައީސް ވިދާޅުވީ ރާއްޖޭގައި ވައިގެ ބަނދަރެއް ނެތް އަދި އެމަސައްކަތް ނުހިނގާ ހަމައެކަނި އަތޮޅަކީ ށ.އަތޮޅު ކަމަށެވެ. އެއަތޮޅުގައި އެއާޕޯޓެއް ކުރިއަށް އޮތް ފަސް އަހަރުގައި އަޅައި ދޭނެކަމުގެ ޔަގީންކަން ރައީސް ވަނީ ދެއްވާފައެވެ.
ރައީސް @ibusolih ކޮމަންޑޫއަށް ވަޑައިގަތުމުން ހޫނު މަރުހަބާއެއް ދަންނަވައިފި.
ރިޔާސީ އިންތިހާބު ކެމްޕެއިނަށް ރައީސް @ibusolih މިލަދުންމަޑުލު އުތުރުބުރީ ކޮމަންޑޫ، މަރޮށި، ނޫމަރާ އަދި ފޯކައިދުއަށް ކުރަށްވާ ދަތުރުފުޅު.
#Ibu2023
#VoteMDP
#UfaaveriAmaanRaajje pic.twitter.com/eQNhnpg2g3— MDP Secretariat (@MDPSecretariat) July 9, 2023
ރައީސް ވިދާޅުވީ ރައްޔިތުން އެދޭ ގޮތަށް އެއަރޕޯޓް އެޅުމުގެ މަސައްކަތް ކުރިއަށްދާނެ ކަމަށާއި ކޮމަންޑޫ އާއި މަތިކޮމަންޑޫ ގުޅާލުމުގެ މަޝްރޫއު އޮގަސްޓަ މަހު ނިމިގެންދާނެ ކަމަށެވެ.
ރައީސް ވިދާޅުވީ އުފާވެރި އަމާން ރާއްޖެ ކޮންމެ ރައްޔިތަކު ވެސް ބޭނުންވާނެ ކަމަށް ހަމަޖެހޭ އަމާން މުޖުތަމައުއެއް ޤާއިމުކުރަންޖެހޭ ކަމަށެވެ. ރައީސް ވިދާޅުވީ އަމާން މުޖުތަމައުއެއް ޤާއިމުކުރަން މި ސަރުކާރުން ކުރި މަސައްކަތުގެ ފޮނި ނަތީޖާ މިހާރު ފެނަން ފަށައިފި ކަމަށެވެ. ވެރިކަމާ ހަވާލުވެވަޑައިގަތުމަށްފަހު އެމަނިކުފާނު ރާއްޖެއަށް ގެންނެވި ބަދަލު ކޮންމެ ރަށަކުން ކޮންމެ މީހަކަށް ފެނިގެންދާނެ ކަމަށް ވެސް ވިދާޅުވިއެވެ.
މީގެއިތުރުން އަސާސީ ހިދުމަތްތަކުން މަހްރޫމުވެ ތިބެ އުފާވެރި ދިރިއުޅުމެއް ނުހޯދޭނެ ކަމަށާއި އެއްވެސް ރަށެއް ތަފާތު ނުކޮށް ރާއްޖޭގެ ހުރިހާ ރަށަކަށް އެ ހިދުމަތް ފޯރުކޮށްދެއްވާފައިވާކަމަށް ރައީސް ވިދާޅުވިއެވެ. މި ކާމިޔާބީތަކަށް ވާސިލްވެވުނީ އުނދަގުލާއެކުކަން ފާހަގަކުރައްވާ ރައީސް ވިދާޅުވީ ސަރުކާރަށް މެދުނުކެނޑި ޖެއްސުންކުރި މީހުންތަކެއް ތިބި ކަމަށެވެ. އެހެންނަމަވެސް ރައީސް އިސްކުރެއްވީ ރައްޔިތުންގެ މަސްލަހަތު ކަމަށް ވިދާޅުވިއެވެ.
