ކުރިއަށް އޮތް ރިޔާސީ އިންތިޚާބުގައި ވާދަކުރައްވާ ރިޔާސީ ކެނޑިޑޭޓަކާއި، 45 މިނިޓުގެ ދިގު ފޯނުކޯލެއް ކުރައްވައި އެކު ވާހަތަކާއި ގުޅިގެން ވާހަކަ ބަދަލު ކުރެވިފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އިއްޒުއްދީން ސުކޫލުގައި މިއަދު ހެނދުނު ބޭއްވި އެމްޑީޕީގެ ކެމްޕެއިނު ހަރަކާތެއްގައި ވާހަކަދައްކަވަމުން ރައީސް ސޯލިހު ވިދާޅުވީ މިއަދު ހެނދުނު މި ސެޝަނަށް ވަޑައިގެންނެވުމުގެ ކުރިން މިފަހަރުގެ ރިޔާސީ އިންތިޚާބުގައި ވާދަ ކުރައްވާ ރިޔާސީ ކެނޑިޑޭޓަކާއި އެމަނިކުފާނާއި ދެމެދު 45 މިނިޓުގެ ދިގު ފޯނުކޯލެއް ކުރެވުނު ކަމަށެވެ.
ކޮން ކެނޑިޑޭޓެއްކަން ހާމަނުކޮށް، ރައީސް ވިދާޅުވީ އެބޭފުޅާއާއި ދެކެވުނު ވާހަތަކުގައި ސިޔާސީ ގޮތުން އެކި ވާހަތައް ބަދަލު ކުރެވި ހިއްސާ ކުރެވުނު ކަމަށެވެ. މިކޯލުގައި ވަރަށް ދިގުކޮށް އެކި ކަންކަމުގައި މަޝްވަރާ ކުރެވި ޚިޔާލް ބަދަލު ކުރެވުނު ކަމަށްވެސް ރައީސް ވިދާޅުވިއެވެ.
ރައީސް ވަނީ އެ ފޯނު ކޯލަށްފަހު ސެޝަނަށް ވަޑައިގެންނެވިއިރު، އެމަނިކުފާނުގެ "މައިންޑްސެޓް" ހުންނާނެ ގޮތް ވިސްނަވާލެއްވުމަށް މަޖާޒީ ރާގެއްގައި ވިދާޅުވެފައެވެ. ރައީސް ވިދާޅުވީ، މޯޓިވޭޝަނަލް ސެޝަންގައި ދެކެވުނު ވާހަކަތަކަށްފަހު، އެ 45 މިނެޓު މަތިން ހަނދުފުޅުމަވެސް ނެތްކަމަށެވެ.
ރައީސް ޞާލިހު ދެއްކެވި ވާހަތަކުންނާއި، އަދި މިހާތަނަށް ރިޔާސީ އިންތިޚާބުގައި ވާދަކުރައްވާ ކެނޑިޑޭޓުންގެ ތެރެއިން ރައީސް ޞާލިހާއި ގާތް ގުޅުމެއް އޮތް އެއްބޭފުޅަކީ ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމެވެ. ރިޔާސީ އިންތިޚާބުގައި ވާދަކުރާ ކެނޑިޑޭޓުންގެ ތެރެއިން ޤާސިމް ފިޔަވައި، ރައީސް ޞާލިހު މިހާ ދިގު ކޯލެއް ކުރައްވަފާނެ އިތުރު ކެނޑިޑޭޓެއް ހުރިކަމަށް ގިނަ ބަޔަކު ގަބޫލެއް ނުކުރައްވައެވެ.
ރިޔާސީ އިންތިޚާބުގައި ވާދަކުރައްވާ ކެނޑިޑޭޓުންގެ ތެރެއިން ކާނަލް ނާޒިމްއާއި، އުމަރު ނަސީރާއި، ޑރ.މުނައްވަރަކީ ރައީސާއި އެހާ ގާތްގުޅުން އޮންނަ ބޭފުޅުންނެއް ނޫނެވެ. އަދި ރައީސް ޔާމީން މިވަގުތު ހުންނެވީ ޖަލު ހުކުމެއްގައެވެ. އެހެން ކަމުން ރައީސާއި މިދިގު ކޯލު ކުރެއްވި ބޭފުޅަކީ ޤާސިމްކަމަށް ބެލެވެއެވެ.
ރިޔާސީ އިންތިޚާބުގައި ޤާސިމް ވާދަ ކުރެއްވި ނަމަވެސް ދެވަނަ ބުރެއްގައި، ރައީސް ޞާލިހާއި ޤާސިމް އެކީގައި ފެނުމަކީ ގާތް ކަމެއްކަމަށް ސިޔާސީ މަސްރަހު ދިސާރާ ކުރައްވާ ފަރާތްތަކުން ވިދާޅުވެއެވެ.
