އެމްޑީޕީގެ ކުރީގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސް ޕާޓީ އުފެއްދުމަށް ބޭއްވި ޖަލްސާއަކީ ކާމިޔާބު އަދި އެހާމެ ފުރިހަމަ ޖަލްސާއެއް ކަމުގައި ޖުމުހޫރީ ޕާޓީގެ ލީޑަރ އަދި ރިޔާސީ ކެނޑިޑޭޓް ގާސިމް އިބުރާހިމް ވިދާޅުވެއްޖެއެވެ.
ދަ ޑިމޮކްރެޓްސް ޕާޓީ އުފެއްދުމަށް ރޭއް ބޭއްވި ޖަލްސާއަށްފަހު ނަޝީދަށް މަރުހަބާ ދެއްނެވުމަށް ގާސިމް މިއަދު ކުރެއްވި ޓުވީޓުގައި ވިދާޅުވެފައިވަނީ އެޕާޓީގެ މުވައްސިސް ހަސަން ލަތީފަށާއި އަދި ރައީސް ނަޝީދަށާއި އަދި އެ ޕާޓީއަށްތާއީދުކުރާ އެންމެހާ ފަރާތްތަކަށް ތަޙްނިޔާ އާއި މުބާރަކްބާދު ދަންވާ ކަމުގައެވެ.
ދަ ޑިމޮކްރަޓްސް @TheDemocratsMV އުފެއްދުމަށް ބޭއްވީ ނުހަނު ކާމިޔާބު، އެހާމަ ފުރިހަމަ ޖަލްސާ އެއްކަން ޔަޤީން، ޑިމޮކްރަޓްސް ގެ މުއައްސިސް އުސްތާޛު @HassanLatheef އަށާއި، ރައީސް @MohamedNasheed އަށާއި، ތިޔަ ޕާޓީއަށްތާއީދުކުރައްވާ އެންމެހާ ފަރާތްތަކަށް ތަޙްނިޔާ އާއި މުބާރަކްބާދު… pic.twitter.com/XN3QGYMhTg
— Qasim Ibrahim (@qasimibrahim) July 6, 2023
ދަ ޑިމޮކްރެޓްސް އުފެއްދުމުގެ ރޭ ބޭއްވި އާންމު ޖަލްސާގައި ވަނީ އެޕާޓީގެ ޕާޓީގެ ނަމާއި، ލޯގޯއާއި، ކުލަ ފާސްކޮށްފައެވެ.
ރޭ ޣިޔާސުއްދީން ސްކޫލު ހޯލުގައި ގިނަ ބަޔަކާއިއެކު ބޭއްވި މިޖަލްސާގައި ރައީސް ނަޝީދާއި، އެމްޑީޕީން ވަކިވި ގިނަ ބަޔަކު ވަނީ ބައިވެރިވެފައެވެ.
އެޖަލްސާގައި ޕާޓީގެ ނަމަކަށް ދަ ޑިމޮކްރެޓްސް ކިޔަން ފާސްވީ ވޯޓުގައި ބައިވެރިވި 481 ބޭފުޅުންގެ ވޯޓުންނެވެ. ޕާޓީގެ ކުލައިގެ ގޮތުގައި ފާސްވީ މަޑު ނޫކުލައެވެ. ލޯގޯއަކީ ސަމުގާއެއްގެ ގޮތަށް އިންނަ ލޯގޯއެކެވެ. ގަދަ ނޫކުލައިން ލޯގޯ ކުރެހިފައިވާއިރު، އެތެރޭގައި ވަނީ މަޑު ނޫކުލައެވެ. ލޯގޯއާއި، ދިދަ ފާސްވީ ވޯޓުގައި ބައިވެރިވި 478 މެމްބަރުންގެ ވޯޓުންނެވެ. ލޯގޯއާއި، ކުލަ ހުށަހެޅިގޮތަށް ފާސްކުރަން ނުފެންނަ ކަމަށް ވޯޓު ދިނީ 7 މެމްބަރުންނެވެ.
ޣިޔާސުއްދީން ސްކޫލްގައި ކުރިޔަށްދިޔަ ޖަލްސާގައި އެޕާޓީގެ މުއައްސިސު ހަސަން ލަތީފު އިއުލާނުކުރެއްވި ގޮތުގައި އެ ޖަލްސާ ކުރިއަށް ދިޔައީ 500 އަށް ވުރެ ގިނަ މެމްބަރުންނާ އެކުގައެވެ.
ރޭގެ ޖަލްސާ ތަޢާރަފް ކުރައްވަމުން ހަސަން ލަތީފް ވިދާޅުވީ އެޕާޓީ އުފައްދަވަން ޖެހުނީ އެމްޑީޕީ މަގުން ކަސިޔާރުވެ، ކޮރަޕްޝަނާއި ފަސާދައަށް ދިއުމުން ކަމަށެވެ.
