ކުރިއަށް އޮތް ރިޔާސީ އިންތިޚާބުގައި ރައީސް ޞާލިހު ބަލި ކުރުމަށް އޮތް އެންމެ ރަނގަޅު ގޮތަކީ ރައީސް ނަޝީދުވެސް ރިޔާސީ ރޭހުގައި ވާދަކުރުން ކަމުގައި ޕީއެންސީގެ ނައިބް ރައީސް އާދަމް ޝަރީފް ވިދާޅުވެއްޖެއެވެ.

އާދަމް ޝަރީފް މިހެން ވިދާޅުވީ "ދަ ޑިމޮކްރެޓްސް" ނަމުގައި ޕާޓީއެއް އުފެއްދުމަށް ބޭއްވި ޖަލްސާގައި ކުރިއަށް އޮތް ރިޔާސީ އިންތިހާބުގައި އެންމެ ބުއްދިވެރި ގޮތަކީ ކުރީގެ ރައީސް ޔާމީން އަދި އެމަނިކުފާނު ވެސް ކުރިމަތިނުލެއްވުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވވެ ދެއްކެވި ވާހަކަތަކާއި ގުޅިގެންނެވެ.

ޖަލު ހުކުމެއް ތަންފީޒު ކުރައްވަމުންދާ ރައީސް ޔާމީނަށް ރިޔާސީ އިންތިޚާބުގައި ވާދަކުރުމުގެ ޖާގައެއް އަދިނެތެވެ. އިންތިޚާބަށް މިމަހުގެ 23 ވަނަ ދުވަހު ހުޅުވާލާއިރު ޔާމީނުގެ ޝަރީއަތުގެ އިސްތިއުނާފް އަޑު އެހުން މާދަމައަށް ތާވަލް ކުރުމަށްފަހު ވަނީ ޝެޑިއުލް އިން ނަގާފައެވެ.

ނަޝީދުގެ ވާހަތަކަށް ރައްދު ދެއްވައި އާދަމް ޝަރީފް ވިދާޅުވީ މިވަގުތު ޤައުމުގައި ހުރި މައްސަލަތަކަށް ހައްލު ހޯދައި ދެވޭނެ ހަމައެކަނި ކެނޑިޑޭޓަކީ ރައީސް ޔާމީންކަމަށެވެ. ރައީސް ޞާލިހު ބަލި ކުރުމަށް އޮތް އެންމެ ރަނގަޅު ގޮތަކީ ރައީސް ނަޝީދުވެސް ވާދަ ކުރުންކަމަށް އާދަމް ޝަރީފް ވިދާޅުވިއެވެ.

ޤައުމުގައި ހުރި މައްސަލަތައް ހައްލުކޮށް، ޤައުމުގެ މިނިވަންކަން ދިފާއުކޮށް، އިސްލާމީ ޚަލޯރާތް ދިވެހި ސަޤާފަތް ދިރުވައު، މުންކަރާތްތަކާއި ދެކޮޅަށް، ޤާނޫނީ ވެރިކަމެއް އެންމެ ޤާބިލް އަދި ރައްޔިތުންގެ އުންމީދުތަކާއި ގުޅިފައިވާ ލީޑަރަކީ ޕީޕީއެމްގެ ކެނޑިޑޭޓް ރައީސް ޔާމީން. ރައީސް ޔާމީން ވާދަ ކުރައްވައި އިބޫ ބަލިކުރާނެ. އިބު ބަލި ކުރުމަށް އެންމެ ރަނގަޅު ހިންތާއަކަށް ވާނީ ރައީސް ނަޝީދުވެސް ވާދަކުރެއްވުން.

– އާދަމް ޝަރީފް ވިދާޅުވިއެވެ.

އާދަމް ޝަރީފްގެ އިތުރުން އިދިކޮޅު ކޯލިޝަންގެ ހަރަކާތު ކޮމެޓީގެ ޗެއާ މުހައްމަދު އިސްމާއިލް ވިދާޅުވީ ރައީސް ނަޝީދު އިންތިޚާބުގައި ވާދަ ނުކުރެއްވުމަކީ ރައީސް ނަޝީދުގެ އަމިއްލަ ނިންމުމެއް ކަމަށެވެ. ރައީސް ޔާމީން އިންތިޚާބުގައި ވާދަ ކުރެއްވުމަށް ނިންމެވީ ރައްޔިތުން ކަމަށާއި، އެމަނިކުފާނު ފަހަތަށް ޖެހެންޖެހޭ ސަބަބެއް ނެތްކަމަށެވެ.

ޕީޕީއެމް / ޕީއެންސީގެ 2023 ގެ ރިޔާސީ ޓިކެޓް ވަނީ ރައީސް އަބްދުލޯ ޔާމީން އަބްދުލް ގައްޔޫމާ ހަވާލްކުރެވިފަ މުހައްމަދު ނަސީދު ރިޔާސީ އިންތިހާބްގަ ވާދަކުރުން ނުކުރުން އެއީ މުހައްމަދު ނަސީދްގެ އަމިއްލަ ނިންމުން ރައީސް ޔާމީން ކަންކުރަންވާގޮތް ނަސީދް ކިޔާދިނުންހަޑި ސަނީދްއާ ޔާމީން… pic.twitter.com/OSWQfFheSQ

— Mohamed Ismail (@MPMohdIsmail) July 5, 2023

ނަޝީދު އިސްކޮށް ހުންނަވައި ޕާޓީ އުފެއްދުމަށް ބޭއްވި ޖަލްސާގައި ޕީޕީއެމްގެ ނައިބު ރައީސް އަހުމަދު ޝިޔާމާއި އެހެން ވެސް އިސް ބައެއް ބޭފުޅުން ބައިވެރިވެވަޑައިގަތެވެ. އޭގެއިތުރުން އެމްއެންޕީގެ ރައީސް މުހައްމަދު ނާޒިމާއި އެމްއާރްއެމްގެ ނައިބު ރައީސް ނާދިރާ ހަސަން އަދި ޖުމްހޫރީ ޕާޓީގެ ފަރާތުން ރިޔާޒު ރަޝީދު ވެސް ބައިވެރިވެވަޑައިގަތެވެ.

ނަޝީދު މިމޭރުމުން ވާހަކަފުޅު ދެއްކެވި އިރު ޕީޕީއެމް/ޕީއެންސީން އަބަދުވެސް ބުނަމުން އަންނަނީ އެދެޕާޓީގެ ރިޔާސީ ކެންޑިޑޭޓަކީ ޔާމީން ކަމަށާއި އެކަން ބަދަލެއް ނުވާނެ ކަމަށެވެ. އެހެން ނަމަވެސް އެމްއެމްޕީއާރްސީގެ ބޮޑު ހިޔާނާތުގެ ތެރޭގައި ހިމެނޭ މުއާމަލާތަކާ ގުޅިގެން، މަނީ ލޯންޑްރިންއާއި ރިޝްވަތުގެ ކުށް ސާބިތުވެފައި ވާތީ ޔާމީނަށް 11 އަހަރުގެ ޖަލު ހުކުމެއް އިއްވާފައި އެބަ އޮތެވެ. ރިޔާސީ އިންތިހާބުގައި އެމަނިކުފާނަށް ވާދަކުރެއްވޭނީ ، ބެލެވޭ ގޮތުގައި، ހައިކޯޓުން އެހުކުމް ބާތިލުކޮށްފި ނަމައެވެ.