ސަރުކާރުން މާލޭ ރައްޔިތުންނަށް ގޯތި ދިނީ ގާނޫނާ ޚިލާފަށް ކަމަށާއި، އެކަމުގެ ގާނޫނީ ހައިސިއްޔަތު އޮތީ މާލޭ ސިޓީގެ މޭޔަރު ޑރ. މުއިއްޒުއަށް ކަމުގައި އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު އިސްވެ ހުންނަވާ އުފައްދަވާ ދަ ޑިމޮކްރެޓްސް ޕާޓީ އުފެއްދުމަށް މިރޭ ބޭއްވުނު ޖަލްސާގައި ވާހަކަ ދައްކަވަމުން ނަޝީދު ވިދާޅުވީ ރާއްޖޭގެ ރަށްތަކުގެ ކައުންސިލަރުން ބޭނުންވީ ރާއްޖޭގެ ފަޅުތަކާއި ރާއްޖޭގެ ރަށްތައް އެއީ އެމީހުންގެ މިލްކިއްޔާތުގެ ގޮތުގައި ނިންމުމަށް ކަމުގައެވެ. އަދި ލާމަރުކަޒީ ނިޒާމުގެ އަސާސަކީ އެއީކަމުގައިވެސް ނަޝީދު ވިދާޅުވިއެވެ.
އަޅުގަޑުމެން މިރޭ ހިންހަމަ ޖެހުނަސް ނުޖެހުނަސް މާލޭ މޭޔަރު މުއިއްޒު ނޫން ބޭފުޅަކު މާލޭ ރައްޔިތުންނަކަށް ގޯތި ދިނުމުގެ ގާނުނީ ހައިސިއްޔަތެއް ނެތް.
ސަރުކާރުން ދޭނެކަމަށް ވައުދުވެފައިވާ ގޯތި މާލޭގެ ރައްޔިތުންނަށް ދީފައިވަނީ ގާނޫނާއި ޚިލާފަށް ކަމަށް ވިދާޅުވަމުން ނަޝީދު ވިދާޅުވިއެވެ.
މިރޭގެ ޖަލްސާގައި އިތުރަށް ވާހަކަ ދައްކަވަމުން ނަޝީދު ވިދާޅުވީ މާލޭގެ ރައްޔިތުން އިންތިހާއަށް ބޭނުންވެފައިވާ ކަންކަން އެބަހުރި ހަމަކަށެވެ. އަދި މާލޭއަކީ އެންމެ ގިނަ ނިކަމެތި ރައްޔިތުން އުޅެމުންދާ ތަންކަމަށް ވިދާޅުވަމުން ނަޝީދު ވިދާޅުވީ ރައީސް ސާލިހުގެ އަރިހުގައި ބޯހިޔާވަހިކަމުގެ މައްސަލަ ހައްލު ކުރުމަށް ތަކުރާރުކޮށް ދަންނަވަމުން ގެންދިޔަ ކަމުގައެވެ.
އެހެންނަމަވެސް ރައީސް ސާލިހުގެ ވެރިކަން ނިމުމަކަށް އަންނައިރު އަދި އެންމެ މީހަކަށްވެސް ބޯހިޔާވަހިކަމެއް ނުލިބޭކަމަށް ވިދާޅުވެ، ނަޝީދުގެ ވާހަކައިގައި ވިދާޅުވީ، ދައުރު ނިމެމުން ދަނިކޮށް ޕާޓީ ދެބައިކޮށް، ވަޒީރު ބޭފުޅުން ގުޅިވަޑައިގަތީ ކުޑަފަޅިއާއި ކަމުގައެވެ. އަދި، އެމަނިކުފާނު ދަ ޑިމޮކްރެޓްސްއައި ގުޅިވަޑައިގަންނަވާނެ ކަމީ އެއްވެސް ޝައްކެއް އޮތްކަމެއް ނޫންކަމުގައި މިރޭ ނަޝީދު އިއުލާން ކުރެއްވިއެވެ.
