މިއަދުގެ މަޖިލީހުގެ ޖަލްސާ ފެށުނުތާ 10 ސިކުންތުތެރޭ ޖަލްސާ ނިންމަވާލައި މަޖިލީހުގެ ރިޔާސަތު ބެލެހެއްޓެވި ހަސަން އަފީފް ފިއްލެވީ، މަޖިލީހުގެ އިދާރީ މޭޒުން ގޮވަ ގޮވަ އޮއްވާ ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.

ރައްޔިތުންގެ މަޖިލީހުގެ ދާއިމީ ކޮމިޓީތައް އެކުލަވާލުމުގެ ރިޕޯޓް އިޞްލާހުކުރަން ޖެހޭކަމަށް ވިދާޅުވެ، ދައުރުން ބޭރުން ބޭއްވެވި ޖަލްސާގައި އެއްވެސް މަސައްކަތެއް ކުރިއަށް ނުގެންގޮސް ޖަލްސާ ވަނީ ނިންމާލާފައެވެ. މިއަދުގެ ޖަލްސާ ފެއްޓެވުމަށްފަހު މަޖިލީހުގެ ރިޔާސަތުގައި އިންނެވި ވިލުފުށީ ދާއިރާގެ މެންބަރު ޙަސަން އަފީފް ވިދާޅުވީ، މިދިޔަ މަހުގެ 21 ވަނަ ދުވަހު މަޖިލީހުގެ ބައެއް މެންބަރުން، އެމެންބަރުން ތަމްސީލު ކުރެއްވި ޕާޓީން ވަކިވެވަޑައިގެންފައިވާތީ ކޮމިޓީތަކަށް ގެންނަން ޖެހޭ ބަދަލުގެ ރިޕޯޓް އަލުން ބަދަލުކުރަން ޖެހިފައިވާ ކަމަށެވެ.

އަފީފް އެ ވިދާޅުވި ދެ މެންބަރުންނަނަކީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި، ހިތަދޫ މެދު ދާއިރާގެ މެންބަރު އަޙްމަދު ރަޝީދެވެ. އެ ދެމެންބަރުން ވަނީ އެމްޑީޕީން ވަކިވެވަޑައިގެންފައެވެ. އަފީފް ވަނީ އެހެން ވިދާޅުވެ ޖަލްދސާ ނިންމާލާފައެވެ.

މެމްބަރު ޝިފާއު ވިދާޅުވީ ކުރު ނޯޓިސްއެއް ދިން ނަމަވެސް އެމްޑީޕީގެ މެމްބަރުން މަޖިލީހަށް ހާޒިރުވެ ތިއްބައި މަޖިލީހުގެ ޖަލްސާ ފެށުނުތާ ގިނަ އިރުތަކެއް ނުވެ ކުއްލިއަކަށް ނިންމާލީ އިދާރީ މޭޒަށްވެސް ނޭގިކަމަށެވެ. އިދާރީ މޭޒުންވެސް އަފީފު މަޖިލިސް ނިންމާލިކަން އިއުލާންކޮށް ތެދުވެގެން ދިއުމުން ގޮވިކަމަށް ޝިފާއު ވިދާޅުވިއެވެ.

އެމްޑީޕީގެ މެމްބަރުން ހަމަޔަށް މަޖިލީހަށް ހާޒިރުވެފައޮތްތަންފެނި، އިދާރީ މޭޒުން ގޮވަގޮވާ އޮއްވައި ރިޔާސަތުން މަޖިލިސްދޫކޮށް ފިލާފި.

– ޝިފާއު ވިދާޅުވިއެވެ.

އެމް ޑީ ޕީ ގެ މެމްބަރުން ހަމަޔަށް މަޖިލީހަށް ހާޒިރުވެފައޮތްތަންފެނި، އިދާރީ މޭޒުން ގޮވަގޮވާ އޮއްވައި ރިޔާސަތުން މަޖިލިސްދޫކޮށް ފިލާފި. pic.twitter.com/ExtxMA9eid

— Mohamed Shifau (@mhshifau) July 3, 2023

މަޖިލީހުގެ މަސައްކަތްތައް ކުރިއަށް ނުގޮސް ހުއްޓިފައިމިވަނީ، މަޖިލީހުގެ ރައީސްއާއި ނާއިބު ރައީސްގެ އިތުބާރު ނެތްކަމުގެ މައްސަލަ ހުށައެޅުއްވުމުންނެވެ. މަޖިލީހުގެ ދާއިމީ ކޮމިޓީތައް އަލުން އެކުލަވާލަން ނިންމެވީ، އެމްޑީޕީގެ ބައެއް މެންބަރަކު އެޕާޓީން ވަކިވެވަޑައިގަތުމުން ކޮމިޓީތަކުގައި ޕާޓީތަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ބަދަލު އަންނާނެތީއެވެ.