"ދަ ޑިމޮކްރެޓްސް" ޕާޓީ އުފެއްދުމަށް މިމަހުގެ 5 ވަނަ ދުވަހު އިއްޔާސުއްދީން ސްކޫލުގައި ބޭއްވުމަށް ހަމެޖެހިފައިވާ ޖަލްސާގައި ބައިވެރިވެވަޑައިގަންނަވާނޭކަން، އެމްޑީޕީގެ ކުރީގެ ރައީސް މުހައްމަދު ނަޝީދު ހާމަ ކުރައްވައިފިއެވެ.
ނަޝީދު މިކަން ހާމަކުރައްވާފައިވަނީ، މިއަދު ކުރެއްވި ޓުވީޓެއްގައެވެ.
Alhugaduves @TheDemocratsMV ufehdhumah bavvaa jalsa ah 5 July 2023 ge 8.30 ah Ghiyasuddin School ah dhaanan
— Mohamed Nasheed (@MohamedNasheed) July 2, 2023
ޑިމޮކްރެޓްސް ޕާޓީ އުފެއްދުމަށް ބާއްވާ ޖަލްސާގައި ނަޝީދު ބައިވެރިވެވަޑައިގަންނަވާނޭކަން ނަޝީދު އިއުލާން ކުރައްވާފައިވާއިރު، އެޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދޫކޮށްފައިވަނީ މިއަދުއެވެ. ހުއްދަ ލިބުމާއެކު، ޕާޓީ އުފެއްދުމަށް ބާއްވާ ޖަލްސާ މިމަހުގެ 5 ވަނަ ދުވަހުގެ ރޭ 8:30 ގައި އިޔާސުއްދީން ސްކޫލުގައި ބޭއްވުމަށް ހަމެޖެހިފައިވާކަން އެޕާޓީގެ މުވައްސިސް އަދި ރައްޔިތުންގެ މަޖިލިހުގެ މެމްބަރުން ހަސަން ލަތީފު ވަނީ އިއުލާން ކުރައްވާފައެވެ.
ދަ ޑިމޮކްރެޓްސް އަކީ ރައީސް ނަޝީދަށް ތާއިދު ކުރައްވާ ފަރާތްތަކުން އުފައްދަވަން މަސައްކަތް ކުރައްވާ ސިޔާސީ ޕާޓީއެކެވެ. ދަ ޑިމޮކްރެޓްސް' އުފެއްދުމުގެ މަސައްކަތް ކުރުމުގެ ހުއްދަ އިލެކްޝަންސް ކޮމިޝަނުން ދީފައިވަނީ 2023 މެއި 24 ވަނަ ދުވަހުއެވެ. ހަފްތާއެއްގެ ތެރޭގައި ޕާޓީ އުފެއްދުމަށް ބޭނުންވާ އަދަދަށް ސޮއި ހަމަކޮށް ޖޫން 1 ގައި 3560 ފޯމު އެ ޕާޓީން އީސީއަށް ހުށަހަޅާފައިވެއެވެ.
