ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ނެރޭނެކަން އިއުލާނުކޮށްފައިވާ "ދަ ޑިމޮކްރެޓްސް" އިން އެ ޕާޓީގެ މެނިފެސްޓޯއަށް އާންމުންގެ ހިޔާލު ހޯދަން ނިންމައިފިއެވެ.
ދަ ޑިމޮކްރެޓްސް އިން ރިޔާސީ މެނިފެސްޓޯ އެކުލަވާލަން ނިންމައި އެކަމުގެ މަޝްވަރާތައް ކުރަމުން އަންނަތާ ދުވަސްކޮޅެއްވެއްޖެއެވެ. އެގޮތުން މިފަހަރު އެ މަޝްވަރާތައް ކުރުމަށް ހަމަޖެހިފައި ވަނީ ފުވައްމުލައް ސިޓީގައެވެ. ދަ ޑިމޮކްރެޓްސް ބުނި ގޮތުގައި އެ ޕާޓީގެ މުއައްސިސު އަދި މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު އިސްކޮށް ހުންނަވައިގެން ބާއްވަވާ ބައްދަލުވުން އޮންނާނީ މިރެއެވެ. ޑިމޮކްރެޓްސް އިން ބުނާ ގޮތުގައި މި ބައްދަލުވުން އޮންނާނީ ވޯކްޝޮޕެއްގެ ގޮތުގައެވެ.
ޑިމޮކްރެޓުން މެނިފެސްޓޯއެއްގެ މަސައްކަތް ފަށާފައި މިވަނީ ޕާޓީ އުފެއްދުމުގެ ޖަލްސާ ވެސް ބޭއްވުމުގެ ކުރިންނެވެ. އެޕާޓީ އުފެއްދުމުގެ ޖަލްސާ ބާއްވަން އިލެކްޝަންސަން (އީސީ) އިން ހުއްދަ ދޭނީ އަންނަ އާދީއްދަ ދުވަހުއެވެ.
މެނިފެސްޓޯ އެލުލަވާލުމަށް ބާއްވާ ފުރަމަ ވޯކްޝޮޕް އޮންނާނީ މިރޭ 8:30 ގައި ފުވައްމުލަކު ސިޓީ ކައުންސިލްގައެވެ. ޑިމޮކްރެޓްސް އިން ކުރިއަށް އޮތް ރިޔާސީ އިންތިޚާބުގައި ކެނޑިޑޭޓެއް ނެރޭނެކަމަށް ވަނީ އިއުލާން ކޮށްފައެވެ.
މެނިފެސްޓޯ ވޯކްޝޮޕް
މިރޭ (ބުރާސްފަތި) 29 ޖޫން 2023
8:30
ފުވައްމުލައް ސިޓީ ކައުންސިލް
ކުރުދުމާ މާލަން
ޑިމޮކްރެޓުންނަށް ތާއީދުކުރައްވާ ހުރިހާ ބޭފުޅުންނަށް
ދައުވަތު އަރުވަން.@TheDemocratsMV #WeTheDemocrats pic.twitter.com/E8tHIUDtvx— Hassan Latheef🎈 (@HassanLatheef) June 29, 2023
ޑިމޮކްރެޓްސްގެ އިސް ބޭފުޅެއްގެ ގޮތުގައި ހަރަކާތްތެރިވާ ނަމަވެސް އަދި ޑިމޮކްރެޓްސް އާއި ގުޅިފައި ނުވާ ރައީސް ނަޝީދު ވަނީ އެމްޑީޕީން ވަރަށް ފަހުން ވަކިވެފައެވެ. ބޮޑަށް ގަބޫލު ކުރެވޭ ގޮތުގައި ރައީސް ނަޝީދު ޑިމޮކްރެޓަސް އާއި ގުޅި އެޕާޓީގެ ފަރާތުން ވާދަކުރާނެ ކެނޑިޑެޓެއްގެ ގޮތުގައި ނިކުންނާނީ ރައީސް ނަޝީދުކަމަށް ބެލެވެއެވެ.
