ސެނެގާލްގެ ޑިފެންޑަރު ކަލިދޫ ކުލިބާލީ ޕްރިމިއާ ލީގުގެ ޗެލްސީން ސައުދީ އަރަބިއާގެ އަލް ހިލާލްއާ ގުޅިއްޖެއެވެ.
އުމުރުން 32 އަހަރުގެ ކުލިބަލީއަކީ ވުލްވަހެމްޓަންގެ މިޑްފީލްޑަރު ރުބެން ނެވޭސް އަށް ފަހު ޕްރިމިއާ ލީގުގެ ކުލަބަކުން އަލް ހިލާލް އަށް ބަދަލުވި ދެ ވަނަ ކުޅުންތެރިޔާއެވެ. ބޮޑެތި ބައެއް ކުލަބުތަކުން ކަޅި އަޅަމުން ދަނިކޮށް ނަވޭލް އަލް ހިލާލަށް ބަދަލުވީ 47 މިލިއަން ޕައުންޑްގެ އަގެއްގައެވެ.
ނަޕޯލީ އަށް މޮޅު ކުޅުމެއް ދެއްކި ކުލިބަލީ ޗެލްސީ އަށް ސޮއިކުރީ މިދިޔަ ޖުލައި މަހު ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އޭނާ ޗެލްސީ އަށް ބަދަލުވީ 2020 ވަނަ އަހަރު އިޓަލީ ކަޕް ނަޕޯލީ އަށް ހޯދައި ދިނުމުގައި އެހީތެރިވުމުގެ އިތުރަށް މިދިޔަ އަހަރު ސެނެގާލް އަށް އެފްރިކަން ކަޕް އޮފް ނޭޝަންސްގެ ތަށި ހޯދައި ދިނުމަށް އެހީތެރިވުމަށް ފަހުގައެވެ.
ᗯEᒪᑕOᗰE KOᑌᒪIᗷᗩᒪY
🤝💙@Fahad_Alotaibi_ @kkoulibaly26 #AlHilal pic.twitter.com/rvGfTLdjbc— AlHilal Saudi Club (@Alhilal_EN) June 25, 2023
ކްރިސްޓިއާނޯ ރޮނާލްޑޯ މިދިޔަ ޖެނުއަރީ މަހު އަލް ނަސްރަށް ބަދަލުވި ފަހުން ސައުދީ ޕްރޯ ލީގުން ދަނީ ޔޫރަޕްގެ ކުޅުންތެރިން ހޯދުމަށް މަސައްކަތް ކުރަމުންނެވެ. ލީގު ޗެމްޕިއަން އަލް އިއްތިހާދުން ބެލޮން ޑިއޯ ކާމިޔާބުކުރި ކަރީމް ބެންޒެމާ މި މަހުގެ ކުރީކޮޅު ސޮއިކޮށްފައިވާއިރު، ޗެލްސީގެ ކުރީގެ މިޑްފީލްޑަރު އެންގޯލޯ ކާންޓޭ ވެސް އެ ޓީމާ ގުޅެން އުޅޭކަން އެ ކުލަބުން ވަނީ ކަށަވަރުކޮށްދީފައެވެ.
66 ތަށި ހޯދާފައިވާ ސައުދީ އަރަބިއްޔާ އާއި އޭޝިއާގެ އެންމެ ކާމިޔާބު ކުލަބު ކަމަށްވާ އަލް ހިލާލް އަކީ 18 ލީގު ތަށި އަދި ހަތަރު އޭޝިއަން ޗެމްޕިއަންސް ޗެމްޕިއަންކަމާއެކު ދެ މުބާރާތްވެސް އެންމެ ގިނައިން ކާމިޔާބުކޮށްފައިވާ ޓީމެވެ. ލީގާއި އޭޝިއަން ޗެމްޕިއަންސް ތަށި ގެއްލުމުން އެ ޓީމުގެ ސްކޮޑް ވަރުގަދަ ކުރުމަށް ހާއްސަ ސަމާލުކަމެއް ވަނީ ދީފައެވެ.
މެންޗެސްޓާ ސިޓީގެ ބާނާޑޯ ސިލްވާ ހޯދުމުގެ މަސައްކަތްވެސް އެ ޓީމުން ދަނީ ކުރަމުންނެވެ.
