ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެމަނިކުފާނުގެ އާއިލީ ގެކޮޅު ގ.ކެނެރީގެއަށް ބަދަލުވެވަޑައިގެންފިއެވެ.
ނަޝީދު ރައްޔިތުންގެ މަޖިލީހުގެ ރައީސްކަމަށް ވަޑައިގެންނެވިފަހުން ދުވަސްކޮޅަކު އަނބިކަނބަލުން ލައިލާ އަލީގެ ގެކޮޅުކަމަށްވާ މ.ޔާގޫތުގޭގައި ދިރިއުޅުއްވުމަށްފަހު، ދިގު މުއްދަތެއް ދިރިއުޅުއްވީ ކެނެރީގޭގައެވެ.
ރައީސް ނަޝީދު ކުރިން ދިރިއުޅުއްވަމުން ގެންދެވީ މަޖިލީހުގެ ރައީސް ހުންނެވުމަށް ސަރުކާރުން ހަމަޖައްސަވާދެއްވި މ. މުރައިދޫގޭގައެވެ. ސަރުކާރުން ރައީސް ނަޝީދު މުރައިދޫގެއަށް ބަދަލު ކުރެއްވީ 2021 ވަނަ އަހަރުގެ މޭމަހު އެމަނިކުފާނު އަވަހާރަކޮށްލުމަށް ދެވުނު ބޮމުގެ ހަމަލާއަށްފަހު ސަލާމަތީ ސަބަބުތަކަށްޓަކާ މަޖިލީހުގެ ރައީސް ހުންނަވާނެ ވަކި ގެއެއް ބޭނުންވާނެކަމަށް ސަލާމަތީ ބާރުތަކުން ލަފާ ދެއްވުމާއި ގުޅިގެންނެވެ.
ނަޝީދުުގެ މައްޗަށް އިތުބާރުނެތްކަމުގެ ވޯޓެއް ނެގުމަށް ރައްޔިތުންގެ މަޖިލީހަށް އެމަނިކުފާނު އެއިރު އެ ޕާޓީއެއްގެ ރައީސްކަމުގައި ހުންނެވި އެމްޑީޕީން ހުށަހެޅުމާ ގުޅިގެން، މަޖިލީހުން ދިން 14 ދުވަހުގެ ނޯޓިސް ހަމަވުމުން މުރައިދޫގެއިން ނިކުމެވަޑައިގަންނަވާނެކަން މަޖިލީހުގެ އިދާރާއިން އިއުލާނުކުރިއެވެ.
ރައްޔިތުންގެ މަޖިލީހުގެ އަމީން އާމަށް ނަޝީދުގެ އޮފީހުން ފޮނުވި ސިޓީފުޅެއްގައި ވިދާޅުވެފައިވަނީ އެމަނިކުފާނުގެ އިތުބާރު ނެތްކަމުގެ ވޯޓު މަޖިލީހަށް ހުށައަޅާފައިވުމާއި އެކު އަދި އެ ނޯޓިސްގެ މުއްދަތު 26 ޖޫން 2023 އަށް ހަމަވާތީވެ ރައްޔިތުންގެ މަޖިލިސްގެ ރައީސް ހުންނަވާ ރަސްމީ ގެކޮޅު މ.މުރައިދޫ ގެއިން ގ.ބޭރުވެލި އަށް ބަދަލުވުމަށް ނިންމަވާފައިވާ ކަމަށެވެ.
ނަޝީދު ކެނެރީގެއަށް ބަދަލުވެ ވަޑައިިގެންނެވިއިރު، ގެ ސާފު ކުރުމުގައި އިސްކޮށް ހަރަކާތްތެރިވީ ދަ ޑިމޮކްރެޓްސްގެ އިސް މެމްބަރުންނާއި، އެމަނިކުފާނާއި އަރިސް ބޭފުޅުންނެވެ.
ނަޝީދު މިހާރު ދިރިއުޅުއްވާ ކެނެރީގެ ހުންނަނީ ހަނި މަގެއްގައިކަމުން އެމަނިކުފާނުގެ ސެކިއުރިޓީ ބެލެހެއްޓުމުގައި ގޮންޖެހުންތަކެއް ކުރިމަތިވާކަން އެމަނިކުފާނަށް ދިން ހަމަލާއަށްފަހު ސިފައިން ފާހަގަކުރިއެވެ. ރައީސް ނަޝީދު ކެނެރީގެއަށް ބަދަލުވެވަޑައިގަތުމުން ދެން އެމަނިކުފާނުގެ ސެކިއުރިޓީއަށް އަންނާނެ ބަދަލެއް އަދި ސަރުކާރުން ހާމަކޮށްފައެއް ނުވެއެވެ.
