އައިޖީއެމްއެޗް ކައިރީގައި ހުރި ބޭންކް އޮފް މޯލްޑިވްސް، ބީއެމްއެލްގެ އޭޓީއެމް މެޝިނަކަށް ގެއްލުންދީފިއެވެ.
މި އޭޓީއެމް އަށް ގެއްލުންދީފައިވަނީ ރޭ ފަތިހު ކަމަށް އެނގިފައިވެއެވެ. އޭޓީއެމް ފަޅާލައި ފައިސާ ނެގި ކަމެއް އަދި ނެގީ ކިހާ އަދަދެއްގެ ފައިސާއެއް ކަމެއް ކަށަވަރެއް ނުވެއެވެ.
މީސް މީޑިއާގައި ވަނީ އޭޓީއެމް މެޝިންތައް ހުންނަ އިމާރާތް ތެރޭގައި ފުލުހުން ހަރަކާތްތެރިވަމުންދާ ވީޑިއޯއެއް އާއްމުވެފައެވެ. އެ ވީޑިއޯގައި އެތަނުގެ ތެރޭގައި ދެ ތިން ފުލުހުން ފެނިގެންދާއިރު، މަގުމަތީގައިވެސް ފުލުހުން ހަރަކާތްތެރިވަމުންދާތަން ފެނިގެން ދެއެވެ.
މި މައްސަލައާ ގުޅިގެން ފުލުހުންގެ މީޑިއާ އޮފިޝަލަކު ވިދާޅުވީ، އައިޖީއެމް ކައިރީގައި ހުންނަ އޭޓީއެމް މެޝިންތަކުގެ ތެރެއިން އެއް މެޝިނަށް ގެއްލުން ދީފައިވާ މައްސަލައެއް ފަތިހު 5:11ގައި ފުލުހުންނަށް ރިޕޯޓްކޮށްފައިވާ ކަމަށެވެ.
މި މައްސަލަ ފުލުހުން ތަހުގީގު ކުރަމުންދާ ކަަމަށްވެސް އޮފިޝަލް ވިދާޅުވިއެވެ.
