ފަހަކަށް އައިސް މާލޭގެ ފިހާރަތަކުން މުދާ ގަތުމަށްފަހު ސައްހަނޫން ޓްރާންސްފަރ ސްލިޕް ހަދައި ވައިބަރކޮށް އޮޅުވާލައި މަކަރާއި ހީލަތުން މުދާ ހޯދަމުންދާ މައްސަލަތައް ގިނަވެފައި ވާތީ އެކަމަށް ސަމާލުވުމަށް ފުލުހުން އިލްތިމާސްކޮށްފި އެވެ.
ފުހުހުން ބުނީ މިފަދަކަންކަން ކޮށްފާނެ ކަމަށް ބަލާބެލުމަށް ހީނުވާ މީހުންވެސް މިފަދަ އަމަލުތަށް ހިންގާފައި އެބަހުރި ކަމަށެވެ. އެހެން ކަމުން ވިޔަފާރިވެރިން މިކަމަށް އިތުރަށް ސަމާލުވުމަށް ފުލުހުން އިލްތިމާސް ކުރެއެވެ.
މި ފަދަ މީހުން އެކަން ކުރާކަން ފާހަގަކުރެވިފައިވަނީ އެޑިޓްކޮށް ހަދާފައިވާ ސައްހަނޫން ސްލިޕެއް، އެ ސްލިޕްގެ ތާރިހާއި ވަގުތާ އަދި ގަންނަން ބޭނުންވާ އެއްޗަކަށް އަރާ އަގު ބަދަލުކޮށް އެޑިޓްކޮށްގެން ކަމަށް ފުލުހުން ބުނެއެވެ. އަދި އެ ސްލިޕްގައި ޖަހާފައިވާ ގަޑީގެ އިރުކޮޅެއް ކުރިން އެ ސްލިޕްގެ އަގަށްވާ ތަކެތި ނަގަން ފިހާރައަށް ގޮސް ވިޔަފާރި ކުރުމަށްފަހު ފައިސާ ދައްކަން ބުނުމުން، ފައިސާ އެކައުންޓަށް ފޮނުވި ކަމުގެ ވަގު ސްލިޕް ފިހާރައިގެ ފޯނަށް ވައިބާކޮށްފައި އޮތްތަން ފެނުމުން ފިހާރައިގެ ސޭޓުވެސް އިތުރަށް އެކައުންޓް ޗެކް ނުކުރާކަން ފާހަގަ ވާކަމަށާއި އެކަމަކީ ވަގުންނަށް އެ ވައްކަން ހިންގަން ފުރުސަތު ބޮޑުވާ ކަމެއް ކަމަށް ފުލުހުން ބުނެއެވެ. އަދި ގިނަ ފަހަރަށް ފޮނުވާ ސްލިޕްގައި އިންނަ އެކައުންޓްގެ ނަންބަރު ރަނގަޅުތޯވެސް ފިހާފައިގެ ސޭޓު ކަށަވަރުކޮށް ނުލާކަމަށް ފުލުހުން ބެނެއެވެ.
މިފަދަ ގޮތްގޮތަށް ވައްކަންކުރާ ވަގުން މޮޅެތި އުކުޅުތައް އީޖާދުކޮށް ޒަމާނާ އެއްގޮތަށް ވައްކަންކުރުން ވެސް ތަރައްގީ ކުރަމުންދާއިރު، މަކަރުވެރިންގެ މި އުކުޅުތަކަށް ވިޔަފާރިވެރިންނާއި ސޭޓުން ރަނގަޅަށް ސަމާލުވެ ތިބުމަށް ފުލުހުން އިލްތިމާސްކުރެއެވެ. ޒަމާނީ ވަސީލަތްތަކާއެކު ވިޔަފާރީގެ ފަސޭހަކަން ބޭނުންކުރި ނަމަވެސް މިފަދަ ކަންކަމުގައި ފަރުވާ ކުޑަ ނުކުރުން މުހިންމެވެ.
އޮންލައިންކޮށް ވިޔަފާރިކުރުމަށްފަހު ފޮނުވާ ސްލިޕްތައް ފޮނުވުމުން އެކައުންޓަށް ޖަމާވެފައިވޭތޯ އާއި އެކައުންޓް ނަންބަރު ރަނގަޅުތޯ ވަގުތުން ބަލާލުމަކީ މިފަދަ ކަންކަމުން ސަލާމަތްވުމަށް ކުރެވިދާނެ ކަމެކެވެ. އޮންލައިން ޓްރާންސްފަރ ކޮށްފިނަމަ ކަސްޓަމަރުގެ މައުލޫމާތު ނޯޓުކުރުމަކީވެސް މިފަދަ މައްސަލަތަކުން ސަލާމަތްވުމަށްޓަކައި އެޅިދާނެ މުހިންމު ފިޔަވަޅެކެވެ. ސަލާމަތާއި ރައްކާތެރިކަމަށްޓަކައި އަދި ފަހުން ލިބޭނެ މާބޮޑު ގެއްލުމަކުން ސަލާމަތްވުމަށް މިއީ ކުރެވިދާނެ ކުޑަކަމެކެވެ.
