ދައުލަތުގެ މީޑިއާ، ޕީއެސްއެމުން އިންތިޒާމުކޮށްގެން ބާއްވާ އެންމެ ބޮޑު އަދި އެންމެ ވާދަވެރި މުބާރާތުގެ ހުށަހެޅުންތައް ނިމި، ނަތީޖާ އަންނަ ހޮނިހިރު ދުވަހު ފާޅުކުރަން ތައްޔާރުވާން ފަށައިފި އެވެ.
267 ބައިވެރިންނާއެކު އިންޓަރ ސްކޫލް ލަވަ މުބާރާތް ފަށާފައިވަނީ މިމަހުގެ 16 ދުވަހުއެވެ. މިއަހަރުގެ ސްކޫލް ކުދިންގެ ލަވަ މުބާރާތުގައި މާލެއާއި އަތޮޅުތަކުގެ ސްކޫލްތައް ހިމެނޭހެން 32 ސްކޫލަކުން ވަނީ ބައިވެރިވެފައެވެ.
8 އަހަރުގެ މެދުކެނޑުމަކަށް ފަހު މި އަހަރު އަލުން މި މުބާރާތް ބާއްވާ އިރުގައި މުބާރާތް ކުރިއަށް ގެންގޮސްފައިވަނީ ހަ އުމުރުފުރާއަކަށް ބަހާލައިގެންނެވެ. އެއީ 6 އަހަރުން ދަށް، 9 އަހަރުން ދަށް، 11 އަހަރުން ދަށް، 13 އަހަރުން ދަށް، 16 އަހަރުން ދަށް އަދި 19 އަހަރުން ދަށެވެ.
ފަހަރު މުބާރާތުގެ ޖަޖުންނަކީ:
– ކާނަލް އަލީ މަނިކު (ދާރީ)
– އާދަމް ނަސީރު އިބްރާހިމް
– ޝިފާ ތައުފީގު
– މުހައްމަދު އާމިރު އަހުމަދު (ފަރެސް)
– މަރިޔަމް އުނޫޝާ
– މުހައްމަދު ސުހައިލް (ކޮޕްސް ބޭންޑް)
– ފާތިމަތު ފެޒްލީން (ޑިޓިއުން ބޭންޑް)
މިއަހަރު ސްކޫލް ކުދިންގެ ލަވަ މުބާރާތް ބާއްވަނީ އެޑިއުކޭޝަން މިނިސްޓްރީ އާއި ޔޫތް މިނިސްޓްރީ އަދި ނޭޝަނަލް ސެންޓާ ފޯ ދި އާޓްސްގެ އިތުރުން ޕަބްލިކް ސާވިސް މީޑިއާ (ޕީއެސްއެމް) ގުޅިގެންނެވެ.
"އިންޓަ ސްކޫލް ލަވަ މުބާރާތް" އެންމެ ފުރަތަމަ ބޭއްވީ 1988 ގަ އެވެ. އެންމެ ފަހުން މި މުބާރާތް ބާއްވާފައި ވަނީ 2015 ވަނަ އަހަރު އެވެ.
