ސާފް ޗެމްޕިއަންޝިޕުގައިި ވާދަކުރާ ދިވެހި ޤައުމީ ޓީމުގެ ފުރަތަމަ މެޗު މިރޭ ކުޅޭނެއެވެ.
މިރޭ ރާއްޖެ ގަޑިން 7 ޖަހާއިރު ފަށާ މިމެޗުގައި ވާދަކުރާނީ ބޫޓާނާއެވެ. ސާފް ޗެމްޕިއަންޝިޕުގައި ރާއްޖެއިން ހިމެނެނީ ގްރޫޕް ބީގައެވެ. މި ގްރޫޕްގައި ރާއްޖޭގެ އިތުރުން ހިމެނެނީ ލެބަނަން، ބަންގްލަދޭޝް އަދި ބޫޓާންއެވެ. މުބާރާތުގެ ފުރަތަމަ މެޗުގައި އަންނަ ބުރާސްފަތި ދުވަހު ރާއްޖެއިން ނުކުންނާނީ ބަންގްލަދޭޝްއާ ދެކޮޅަށެވެ.
ރާއްޖެއިން މިމުބާރާތަށް ތައްޔާރުވުމަށްޓަކައި، ޖަޕާނުގައި ކޭމްޕު ކޮށްފައިވެއެވެ. ކޭމްޕު ނިންމާލުމަށްފަހު ރާއްޖޭގެ ޓީމުނ ގޮސްފައިވަނީ މުބާރާތް ބާއްވާ ޤައުމު އިންޑިއާއަށެވެ.
އިންޑިއާގެ ބެންގަލޫރުގައި ބާއްވާ ސާފް ޗެމްޕިއަންޝިޕް 2023 އަށް ތައްޔާރުވުމަށް ޤައުމީ ފުޓްބޯޅަ ޓީމުން ޖަޕާނަށް ކުރި ކޭމްޕުގައި އެކުވެރިކަމުގެ މެޗެއް ނުލިބުނު ނަމަވެސް، އެންމެ ފަހުން ކުޅުނު ފަސް މެޗުގެ ނަތީޖާ އެއީ ލިބޭ ހިތްހަމަޖެހުމެއް ކަމަށް ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ ވަނީ ބުނެފައެވެ.
މޮރިއޭރޯ ބުނީ ރާއްޖޭގެ ވިސްނުމަކީ މި މުބާރާތުގައި ކުޅޭ މެޗަކަށްފަހު މެޗެއް ރަނގަޅު ކުރަމުން ދިޔުން ކަމަށެވެ. އަދި މިއީ އުނދަގޫ މުބާރާތެއް ކަމަށާއި، މުބާރާތައް ނުކުންނަ ކޮންމެ ޓީމެއްގެ އަމާޒަކީ މުބާރާތް ކާމިޔާބުކުރުން ކަމަށެވެ. އެކަމަކު އެކަންވާނީ އެންމެ ޓީމަކަށްކަން މޮރިއޭރޯ ފާހަގަކުރިއެވެ.
މިރޭ ރާއްޖެ ކުޅޭ މެޗު އައިސް ޓީވީއާއި، ޔެސް ޓީވީން ވަގުތުން ގެނެސްދޭނެއެވެ.
