ރައްޔިތުންގެ މަޖިލީހުގެ ދާއިމީ ކޮމިޓީތައް އަލުން އެކުލަވާލައި ނިމެންދެން މަޖިލީހުގެ މި ހިނގާ ދައުރު ދަންމާލަން އެމްޑީޕީ ޕާލިމަންޓަރީ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މިއަދު އެދިވަޑައިގެންފިއެވެ.
މަޖިލީހުގެ މިއަހަރުގެ ދެވަނަ ދައުރު މިމަހުގެ ނިޔަލަށް ނިމޭނެ އެވެ. މިއަދުން ފެށިގެން މިމަހުގެ ހުރިހާ ދުވަސްތަކަކީ ރަސްމީ ބަންދުދުވަސްތައް ކަމަށް ވާތީ މިއީ އާއްމު އުސޫލުން މަޖިލީހުގެ ޖަލްސާއެއް ބޭއްވޭނެ ފަހު ދުވަހެވެ. އެކަން އެހެން އޮތް އިރު މަޖިލީހަށް ހުށަހަޅާފައިވާ ކަންތައްތަކުގެ ތެރޭގައި ވަރަށް އަވަހަށް ނިންމަން ޖެހޭ ބައެއް ކަންތައްތައް އެބަހުއްޓެވެ.
އަސްލަމް ވިދާޅުވީ މަޖިލީހުގެ ތަޅުމުގައި އެޖެންޑާކޮށް ބަހުސްކުރެވޭ ކަމެއް ވޯޓަށް އަހައި ނިންމަންޖެހޭ ކަމަށް މަޖިލީހުގެ ގަވާއިދުގައި ސާފުކޮށް ބަޔާންކުރާ ކަމަށެވެ. އަދި މިއަދުގެ ޖަލްސާއަކީ މި ދައުރުގެ ފަހު ޖަލްސާ ކަމަށް ނަޝީދު އިއުލާނުކުރައްވާފައި ވާއިރު، މަޖިލީހުގެ ދާއިމީ ކޮމިޓީތައް އެކުލަވާލުން އަންނަ އޯގަސްޓު މަހުގެ 16 ވަނަ ދުވަހު ފެށޭ އަނެއް ދައުރަށް ފަސްވެގެން ދިއުމަކީ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވިއެވެ.
އަޅުގަނޑު ހުށަހަޅަނީ އިތުރު ޖަލްސާއެއް ބާއްވައިގެން ނަމަވެސް އެޖެންޑާގައި ހުރި މުހިންމު މަސައްކަތްތަކުގައި ގޮތެއް ނިމެންދެން ދައުރު އިތުރުކުރަން. މަޖިލީހުގެ މެޖޯރިޓީ ލީޑަރު ވިދާޅުވިއެވެ.
އަސްލަމް ވަނީ ކޮމިޓީތައް އެކުލަވާލާ ގޮތަށް ވޯޓަށް ނާހައި މަޖިލިސް ޗުއްޓީއަށް ދިއުމަކީ ކަންބޮޑުވުމެއްގެ ގޮތުގައި ފާހަގަކުރައްވާފައެވެ. އަސްލަމް ވަނީ އިތުރު ޖަލްސާއެއް ބާއްވައިގެން ނަމަވެސް، މަޖިލީހުގައި ހުރި މުހިންމު މަސައްކަތްތައް ކުރިއަށް ގެންދިއުމަށް ހުށައަޅުއްވާފައެވެ. އަސްލަމް ވިދާޅުވީ މަޖިލިސް ޗުއްޓީގައި އޮންނަ ދުވަސްވަރުވެސް މަޖިލީހުގެ މުހިންމު މަސައްކަތްތައް ކޮމިޓީތަކުގައި ކުރެވެމުންދާކަމަށެވެ. އެހެންކަމުން މަޖިލިސް ޗުއްޓީއަށް ދިއުމުގެ ކުރިން ކޮމިޓީތައް އެކުލަވާލުމުގެ މުހިންމުކަން އަސްލަމް ފާހަގަކުރެއްވިއެވެ.
ނިންމަން އެދުނު މައްސަލަތައް:
– ކޮމިޓީތައް އެކުލަވައިލުމުގެ މައްސަލަ
– އޭޖީ އިބްރާހީމް ރިފްއަތާއި ފޮރިން މިނިސްޓަރު ޝާހިދު ވަކިކުރުމުގެ މައްސަލަ
– މަޖިލީހުގެ ގަވައިދު ބަދަލުކުރުމުގެ މައްސަލަ
– އިލެކްޝަންސް ކޮމިޝަނަށް މެމްބަރަކު އައްޔަން ކުރުން
– މަޖިލީހުގެ ރައީސާއި ނައިބުރައީސް ވަކިކުރުމުގެ މައްސަލަ
މަޖިލީހުގެ ދާއިމީ ކޮމިޓީތަކުގައި ޕާޓީތަކާއި އަމިއްލަ މެމްބަރުން ތަމްސީލުކުރައްވާނެ ގޮތް އަލުން އެކުލަވާލެއްވުމަށް ނިންމެވީ، އެމްޑީޕީގެ މެމްބަރުންތަކެއް އެ ޕާޓީން ވަކިވެވަޑައިގަތުމާއި ގުޅިގެން، މަޖިލިހުގެ ޕާޓީތަކުގެ ދަފްތަރަށް އައި ބަދަލާއި ގުޅިގެންނެވެ.
ކޮމިޓީތަކުގެ މަސައްކަތް ހުއްޓުމަކަށް އައިސްފައި އޮތުމުން، ކޮމިޓީތަކުން ނިންމަންޖެހޭ ބައެއް ކަންކަމާއި މުހިއްމު އެހެން ބައެއް މަސައްކަތްތައްވެސް ވަނީ ހުއްޓިފައެވެ. މިގޮތުން މަޖިލީހަށް ހުށަހެޅިފައިވާ އިތުބާރު ނެތްކަމުގެ މައްސަލަ ކުރިއަށްދާނެ ގޮތާއި ގުޅޭގޮތުން އާއްމު ކޮމިޓީން ގޮތްތަކެއް ކަނޑައަޅަންޖެހޭއިރު، އެ ކޮމިޓީ ނުބޭއްވޭތީ އެކަމުގައި ގޮތްތަކެއް ނުނިމި، އިތުބާރު ނެތްކަމުގެ މައްސަލަތައް އޮތީ މަޑުޖެހިފައެވެ. މަޖިލީހުގައި ދާއިމީ 17 ކޮމިޓީ އޮވެއެވެ.
