ސިފައިންގެ އެއްވެސް މީހަކު ސިޔާސީ އޮއިވަރުގައި ނުޖެހެން ޑިފެންސް މިނިސްޓަރު މާރިޔާ އަހުމަދު ދީދީ އެދިވަޑައިގެންފިއެވެ.
ސިފައިންގެ 131 ވަނަ އަހަރީ ޖަލްސާގައި ވާހަކަފުޅު ދައްކަވަމުން ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވީ، ބާރުގަދަ ޤައުމުތަކުގެ ވާދަވެރިކަން އިންޑިއާ ކަނޑުގައި އިތުރުވަމުން ދިއުމުގެ ސަބަބުން، ސަރަޙައްދުގެ އިސްތިރާޖީ މާޙައުލުގެ ހަލަބޮލިކަން އިތުރުވެ، އެކަމުގެ އަސަރު ރާއްޖެއަށްވެސް ކުރަމުންއަންނަކަމަށެވެ.
މިނިސްޓަރގެ ވާހަކަފުޅުގައި މަލްޓިޕާޓީ ޑިމޮކްރެސީއެއްގައި، އޭރަކު ހުންނަ ވެރިއަކު ހިތްހަމަނުޖެހޭ އިރަށް، ޑިއު ޕްރޮސެސް އެއް ނެތި، ސިފައިން ވަޒީފާއިން ވަކިކޮށް އަދަބުތައް ދީ ހެދުމަކީ، އެމީހެއްގެ އަމިއްލަ ފުރާނައަށްވުރެ ޤައުމުގެ ސަލާމަތް އިސްކޮށް، ރައްޔިތުންގެ ފުރާނަ އާއި މުދާ ސަލާމަތްކުރުމަށް ހުވާކޮށްގެން ތިބޭ ބަޔަކާމެދު ވެވޭ ބޮޑު ބޭއިންސާފެއްކަމަށް ސިފަކުރެއްވިއެވެ. އެހެންކަމުން، ސިޔާސީ ނުފޫޒާއި ތަފާތުކުރުން ތަކުން އެއްކިބާވެ، ރޭވި ތަރުތީބު ކުރެވިފައިވާ، އަދި ޕްރޮސީޖަރަލް ފެއަރނެސް އާއި ނެޗުރަލް ޖަސްޓިސްގެ އުޞޫލުތަކަށް އިޙްތިރާމްކުރާ އަސްކަރީ ޢަދުލުގެ ނިޒާމެއް، ޤައުމީ ދިފާޢީ ބާރުގައި ތަޢާރަފްކުރެވި ހިނގާތާ މިހާރު 2 އަހަރު ވެއްޖެކަމަށްވެސް މިނިސްޓަރ ވިދާޅުވިއެވެ.
މިއަހަރަކީ ރިޔާސީ އިންތިޚާބު އޮންނަ އަހަރުކަން ހާމަކުރައްވަމުން މިނިސްޓަރ ވަނީ، ސިފައިންނަކީ ސިޔާސީ ޙަރަކާތްތަކުގައި ބައިވެރިވުން ޤާނޫނުން މަނާ ކުރެވިފައިވާ ބައެއްކަން ހަނދާންކޮށްދެއްވާފައެވެ. އެގޮތުން އެއްވެސް ސިފައިންގެ މީހަކު ސިޔާސީ އޮއިވަރުގައި ޖެހި، ސިޔާސީ ކަންކަމުގައި ބައިވެރި ނުވުމަށް މިނިސްޓަރ ނަސޭހަތްތެރިވެ ވަޑައިގެންނެވިއެވެ.
އެހެންނަމަވެސް، ސިފައިންނަކީ ސިޔާސީ ހަރަކާތްތަކުގައި ބައިވެރިވުން ގާނޫނުން މަނާ ކުރެވިފައިވާ ބައެއްކަން ހަނދާންކޮށް ދިނުމާއެކު، އެއްވެސް ސިފައިންގެ މީހަކު ސިޔާސީ އޮއިވަރުގައި ޖެހި، ސިޔާސީ ކަންކަމުގައި ބައިވެރި ނުވުމަށް ތިޔަ ހުރިހާ ސިފައިންނަށް އަޅުގަނޑު ނަސޭހަތްތެރިވަން.
– މާރިޔާ ވިދާޅުވިއެވެ.
މިނިސްޓަރ ވިދާޅުވީ، ސިޔާސީގޮތުން ވިސްނުން ތަފާތުވުމުން، ރައްޔިތުންގެ މަޖިލިސްގެ މެމްބަރުންގެ މަސައްކަތަށް ހުރަސް އެޅުމަށް ސިފައިން ބޭނުންކޮށް، މަޖިލިސްގެ ތަޅުމުންނާއި ފާރުތައްމަތިން ސިފައިންލައްވާ މަޖިލިސް މެމްބަރުން އުކުން މާޒީއަށް ގޮސްފައިވާކަމަށެވެ. ހިތްހަމަނުޖެހޭ ޙުކުމެއް ލިބުމުން ސިފައިން ބޭނުންކޮށްގެން ފަނޑިޔާރުން ހައްޔަރުކޮށް، ފަނޑިޔާރުންގެ ޤާނޫނީ ވާޖިބަށް ހުރަސްއަޅާ، ކޯޓުގެ ޙުރުމަތް ކެނޑުންވެސް މާޒީގެ ސޮފްހާތަކަށް ވަދެގެން ގޮސްފައިވާކަމަށްވެސް މިނިސްޓަރ ވިދާޅުވިއެވެ.
ޤައުމީ ސަލާމަތަކީ ސިޔާސީ ހަތިޔާރަކަށް ހަދާ، ސިފައިން ބޭނުންކޮށްގެން ރައްޔިތުންގެ ހިތްތަކުގައި ބިރުވެރިކަމާއި ޤައުމުގައި ނާމާންކަން ފެތުރުންވެސް މާޒީވެ ހިނގައްޖެކަމަށާއި، އެހުރިހާ ކަމެއް މި ޙާޞިލުކުރެވެނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޤާނޫނަށް ބޯލެނބުމަށް ދެއްވާ އަހަންމިއްޔަތުކަމުގެ ސަބަބުންކަމަށްވެސް ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވިއެވެ.
