މޯލްޑިވްސް އިސްލާމިކް ބޭންކްގެ އޭޓީއެމްއެއް ހުޅުމާލެ ދެވަނަ ފިޔަވަހީގައި ހުޅުވައިފިއެވެ.
މި އޭޓީއެމް ބަހައްޓާފައިވަނީ ހުޅުމާލެ ފޭސް 2 ވިނަރެސް ފްލެޓްގައެވެ.
މިއީ ހުޅުމާލެ ފޭސް 2 ގައި ބެހެއްޓި ފުރަތަމަ އޭޓީއެމްއެވެ. މޯލްޑިވްސް އިސްލާމިކް ބޭންކްއިން މަޢުލޫމާތުދޭ ގޮތުގައި މިވަގުތު އެމްއައިބީން ހުޅުމާލެ ފޭސް 2 ގައި ހުޅުވީ އެންމެ އޭޓީއެމްއެއްކަމަށެވެ. އެހެންނަމަވެސް މުސްތަޤްބަލުގައި އޭޓީއެމް ގިނަކޮށް ކަސްޓަމަރުންނަށް ދެވޭ ހިދުމަތް ފުޅާކުރާނެކަމަށް އެ ބެންކްއިން ބުނެފައިވެއެވެ.
މި އޭޓީއެމްއިން ކަސްޓަމަރުންނަށް 24 ގަޑިއިރު ހިދުމަތް ލިބޭނެކަމަށް އެމްއައިބީން ބުނެއެވެ. ފޭސް 2 ގައި ގިނަ އަދަދެއްގެ އާބާދީއެއް ދިރިއުޅެމުން އަންނައިރު ޚާއްސަ އިސްކަމެއްދީގެން މި އޭޓީއެމް ސަރވިސްކުރުމާއި އަދި ފައިސާ އެޅުމުގެ ކަންކަން ކުރިއަށްދާނެކަމަށް އެމްއައިބީން ބުނެއެވެ. މި އޭޓީއެމްއާއެކު އެމްއައިބީން ރާއްޖޭގެ އެކި ކަންކޮޅުތަކުގައި ހުޅުވާފައިވާ އޭޓީއެމްގެ އަދަދު ވަނީ 24 އަށް އަރާފައެވެ.
