މިއަދަކީ ރާއްޖޭގެ ޑިމޮކްރެސީގެ ހަޔާތުގައި ކަޅު ދުވަހެއް ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލިހުގެ ރިޔާސަތާ ހަވާލުވާނެ ބޭފުޅަކު ނެތި، ގާނޫނީ ހުސްކަމަކަށް ގޮސްފައިވާއިރު، މަޖިލިހުގެ ރައީސް މުހައްމަދު ނަޝީދު މިއަދު ހެނދުނު ފެނުނީ އެ އިދާރާގެ ގޯތިތެރޭގެ ކުޑަދަށުގައި އިދިކޮޅުގެ ބައެއް މެމްބަރުންނާ އެކު އިންނަވަނިކޮށެވެ. ނަޝިދާ އެކު، ނައިބު ރައީސް އީވާގެ އިތުބާރު ނެތްކަމުގެ މައްސަލަ އެމްޑީޕީން އިސްވެ ހުށަހެޅުމުން ރިޔާސަތު ބަލަހައްޓަވަން އެ ދެ ބޭފުޅުން ވެސް ވަނީ އިންކާރު ކުރައްވައިފައެވެ.
މިމައްސަލާގައި ކަންބޮޑުވުން ފާޅުކޮށް މިއަދު މަޖިލީހުގައި ހިމެނޭ ޕީޕީއެމް، ޕީއެންސީ މެމްބަރުން ވަނީ ކަންބޮޑުވުން ފާޅު ކޮށްފައެވެ. މަޖިލީހުގެ އިދާރާގައި ނޫސްވެރިންނާއި ވާހަކަ ދައްކަވަމުން ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ ރައީސް ނަޝީދައި މިއަދު ދިމާވުމުން މަޖިލިސް ހުއްޓުވާފައި އޮތް އޮތުމާއިމެދު އެމަނިކުފާނު ނުހަނު ކަންބޮޑުވާކަމަށެވެ. އަދި މިއީ ޑިމޮކްރަސީގެ ހަޔާތުގައި ކަޅު ދުވެއްގެ ގޮތުގައި އެމަނިކުފާނު ސިފަ ކުރައްވާކަމަށެވެ.
ރައީސް ނަޝީދުވެސް ވިދާޅުވީ އެމަނިކުފާނުވެސް ވަރަށް ކަންބޮޑުވާ ކަމެއްކަމަށް މީ. ސަރުކާރުން މަޖިލިސް ތަޅުއަޅުވައިގެން މަޖިލީހުގެ މަސައްކަތްތައް ހުއްޓާލާފައި އޮތުމުން. ރައީސް ނަޝީދު ސިފަ ކުރެއްވީ މިއީ ރާއްޖޭގެ ޑިމޮކްރެސީގެ ހަޔާތުގައި ކަޅު ދުވަހެއްގެ ގޮތުގަ.
– ޝިޔާމް ވިދާޅުވިއެވެ.
މަޖިލިސް އެކީގައިހެން ހުއްޓިފައި އޮންނަތާ ތިން ހަފުތާއެއްހާ ދުވަސް ފަހުން، ނޫސްވެރިންނާ ބައްދަލުކުރައްވައި ނަޝީދު އިއްޔެ ވިދާޅުވީ ރިޔާސަތާ ހަވާލުވެވަޑައިގަންނަވަން އިންކާރު ކުރެއްވީ ދުނިޔޭގެ "ބެސްޓް ޕްރެކްޓިސް" އާ އެއްގޮތަށް ކަމަށެވެ.
އަދި މަޖިލީހުގެ މެމްބަރުންގެ ބޮޑު އަޣުލަބިއްޔަތަކުން އިތުބާރު ނެތް ކަމުގެ މައްސަލަ ހުށަހެޅުމުން، އިސްތިއުފާ ނުދެއްވަނީ މައްސަލާގައި ސޮއި ކުރެއްވި ނަމަވެސް، ވޯޓު އެހެން ގޮތަކަށް ދެއްވުމުގެ ވިސްނުން ބައެއް މެމްބަރުން ގެންގުޅުއްވާތީ ކަމަށް ނަޝީދު އިއްޔެ ވިދާޅުވިއެވެ.
