ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވެރިކަމުގައި ހުންނަވަނިކޮށް ވެރިކަމުން ބޭލިގޮތަށް، މަޖިލިހުގެ ރިޔާސަތުން ބާލަން ޖެހިދާނެކަމުގެ އިންޒާރު ތިނަދޫ ދެކުނު ދާއިރާގެ މެމްބަރު ސަނީފް ދެއްވައިފިއެވެ.
މަޖިލިސް ޖަލްސާގައި ވަހަކަ ދައްކަވަމުން ސަނީފު ވިދާޅުވީ ރައްޔިތުންގެ މަޖިލިހުގެ 55 މެމްބަރުން ސޮއިކޮށްފަށް އޮތް ޕެޓިޝަން މަޖިލިހަށް ހުށަހެޅިމާ، ދެން ފިލާ އޮންނަންޏާ ޖެހޭނީ އިސްތިއުފާ ދޭން ކަމުގައެވެ.
ކޮންކަމަކާތޯ ފިލާ އެ އޮންނެވީ! ލަދުހަޔާތް ކުޑައީ. ލަދު ހަޔާތް ކުޑައީ. ދެން ޖެހޭނީ ދިވެހި ރައްޔިތުން ނުކުންނަން. އަޅުގަޑުމެންނަކީ ދިވެހި ރައްޔިތުން އިންތިޚާބު ކޮށްފަ ތިބި ބައެއް. އަޅުގަޑުމެންގެ ޙައްގުތަކަށް ރިޔާސަތުން އަރަންޏާ.. އަރާކަމަށް ވެއްޖެއްޔާ ރައްޔިތުން ނުކުމެ ޖެހޭނީ ވެރިކަމުން ބޭލިގޮތަށް މިމަޖިލިހުގެ ގޮނޑިންވެސް ބާލުވަން.
ރައްޔިތުންގެ މަޖިލިހުގެ ރިޔާސަތުން ނަޝީދު އިސްތިއުފާ ނުދެއްވައިފިނަމަ ނަޝީދު ރިޔާސަތުން ބާލާނެކަމުގެ އިންޒާރު ދެއްވަމުން، އަދި ވެރިކަމުން ނަޝީދު އިސްތިއުފާ ދެއްވުމުގެ ކުރިން ރައްޔިތުން މަގުތަކަށް ނުކުމެ ހިގައިދިޔަ ކަންކަމަށް އިޝާރާތް ކުރައްވަމުން ސަނީފު ވިދާޅުވިއެވެ.
ސަނީފު ވިދާޅުވީ މަޖިލިސް ރައީސްކަމަކީ ވަކި އާއިލާއަކަށް ލިބިފައި އޮންނަ ވެރިކަމަކަށް ވާކަށް ރައްޔިތުން ނޭދޭ ކަމަށާއި، އަދި ރައްޔިތުންގެ މަޖިލިހަކީ ކެނެރީގޭ ގޮނޑިކޮއްކޮ މަޖިލިހަކަށް ވާކަށްވެސް ބޭނުން ނުވާކަމުގައެވެ.
ދިވެހި ރައްޔިތުންނެއް ނޭދޭ، ކޮންމެހެން މީ ވަކި އާއިލާއަކަށް ލިބިފައި އޮންނަ ވެރިކަމެއްގެ ގޮތުގައި އޮންނާކަށް. ދިވެހި ރައްޔިތުންނެއް ނޭދޭ މި މަޖިލީހަކީ ކެނެރީގޭ ގޮނޑިކޮއްކޮ މަޖިލީހަކަށް ވާކަށް. އަޅުގަޑުމެނެއް ބޭނުމެއް ނުވޭ. އިސްތިއުފާ ދީ.
ނަޝީދު ރައްޔިތުންގެ މަޖިލިހުގެ ރިޔާސަތުން އިސްތިއުފާ ދިނުމަށް ގޮވާލައްވަމުން ސަނީފް ވިދާޅުވިއެވެ.
ސަނީފް ނަޝީދު ރިޔާސަތުން ބާލާނެކަމަށް އިންޒާރު ދެއްވާފައިވާއިރު، މަޖިލިހުގެ އައްލަބިއްޔަތު ސޮއިކޮށް، މަޖިލިހަށް ގަރާރު ހުށަހެޅުމުންވެސް ނަޝީދު ގެންދަވަނީ ރިޔާސަތުން އިސްތިއުފާ ދިނުމަށް ދެކޮޅު ހައްދަވަމުންނެވެ. އެހެންނަނަމެވެސް ނަޝީދު ވިދާޅުވެފައިވަނީ، މަޖިލިހުން މިހާރު ފޮނުވާފައިވާ ނޯޓިސްއަށް 14 ދުވަސް ހަމަވުމުން، މަޖިލިސް ރައީސްގެ ހައިސިއްޔަތުން މިހާރު ހުންނެވި މުރައިދޫގެ ދޫކޮށްލައްވާނެ ކަމުގައެވެ.
