ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރައްޔިތުންގެ މަޖިލީހުގެ އިމްތިޔާޒަށް އަރައިގަތް ކަމަށް ބުނާ މައްސަލައެއް މަޖިލީހުގެ މެޖޯރިޓީ ޕާޓީ އެމްޑީޕީން ހުށަހަޅުއްވައިފިއެވ.

މިމައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފެއެވެ. ޝަރީފް ހުށަހެޅުއްވި އިމްތިޔާޒުގެ މައްސަލައަކީ ރައްޔިތުންގެ މަޖިލީހުގެ ނައިބް ރައީސް އީވާގެ އިބާރު ނެތް މައްސަލައިގެ ނޯޓިސް ހަމަވެފަހު، މަޖިލީހުގެ ގަވާއިދުގައިވާ ގޮތުގެ މަތީން އެންމެ އަވަހަށް ބާއްވާ ޖަލްސާގައި މަޖިލީހުގެ ރިޔާސަތު މަޖިލިސް ރައީސް ބަލަހައްޓަވަން ވާނީ މަޖިލީހުގެ ރައީސްކަމަށް ވަނީ ބުނެފައެވެ. ނަމަވެސް ރައްޔިތުންގެ މަޖިލީހުގެ ރައީސް ރިޔާސަތަށް އަރަން އިންކާރު ކުރައްވައި މަޖިލީހުގެ އިމްތިޔާޒަށް އަަރައިގެންފައިވާކަމަށް ޝަރީފް ވިދާޅުވިއެވެ.

އިމްތިޔާޒުގެ މައްސަލަ މަޖިލީހުގައި ބަހުސް ކުރުމަށްނެގުނު ވޯޓު ފާސްވީ، 37 މެންބަރުންގެ ވޯޓުންނެވެ. އެ މައްސަލަ ބަލައިގަނެ، ބަހުސްކުރަން ނުފެންނަ ކަމަށް ވޯޓު ދެއްވީ 13 މެންބަރުންނެވެ.

ރައްޔިތުން މަޖިލީހުގެ ރައީސް މަޖިލީހުގެ ރިޔާސަތާއި ހަވާލުވެ ނައިބް ރައީސްގެ އިތުބާރު ނެތް މައްސަލައިގެ މުއްދަތު ހަމަވެ ބޭއްވި ޖަލްސާގައިވެސް އިންނެވީ މަޖިލީހުގެ ކުޑަ ދަށުގައި ކަމަށް ޝަރީފް ވިދާޅުވިއެވެ. ޝަރީފް ވިދާޅުވީ މިއީ މުޅި މަޖިލީހުގެ ނިޒާމަށް އަރައިގަނެ މަޖިލީހުގެ އިމްތިޔާޒަށް އުނިކަން އަންނަ ޢަމަލެއްކަމަށް ޝަރީފް ވިދާޅުވިއެވެ.

މިމައްސަލަ މަޖިލީހުގައި ކުރިއަށް ގެންދިއުމުގައި މަޖިލިސް ރައީސް ޢަމަލު ކުރައްވާފައިވަނީ ޤާނޫނު އަސާސީއާއި މަޖިލީހުގެ ގަވާއިދާއި ޚިލާފަށް ކަމަށް ޝަރީފް ވިދާޅުވިއެވެ. ޝަރީފް ވަނީ މިމައްސަލައަކީ ސީރިއަސް މައްސަލައެއްގެ ގޮތުގައި މަޖިލީހުން ބަލައި ގަތުމަށް އެދިވަޑައިގެންފައެވެ.

މިމައްސަލައިގެ ބަހުސްގައި ސަރުކާރަށް ތާއީދު ކުރައްވާ މެމްބަރުންވަނީ މަޖިލީހުގެ ރައީސް މުހައްމަދު ނަޝީދު މަޖިލީހުގެ ގަވާއިދާއި ޚިލާފްވެ ވަޑައިގެން މަޖިލީހުގެ ޖަލްސާތައް ހުއްޓުވައި، ކޮމެޓީތައް ކުރިއަށް ނުގެންދެވޭނެހެން ކުރައްވާ މަސައްކަތްތަކަކީ ބަލައި ގަނެވޭނެ ކަމެއް ނޫންކަމަށް ވިދާޅުވެފައެވެ. މިމައްސަލާގައި ވާހަކަ ދެއްކެވި އިދިކޮޅު މެމްބަރުން ވަނީ މަޖިލީހަށް ހުށަހަޅޭނެ މައްސަލައެއް ނޫންކަމަށް ވިދާޅުވެފައެވެ. މިމައްސަލައިގެ ބަހުސް ކުރުމަށް ދިން ވަގުތުގައި މައްސަލައަށް ބަހުސް ކުރުމަށްވުރެ ބޮޑަށް ފެނިގެން ދިޔައީ ސިޔާސީ ބަހުގެ ހަމަލާތައް ބަދަލު ކުރެއްވިތަނެވެ.

މަޖިލީހުގެ ގަވައިދުގައިވާ ގޮތުން، އިމްތިޔާޒާ ގުޅޭ މައްސަލައެއް މަޖިލީހަށް ހުށަހަޅާފައިވާ ނަމަ އެހެން ހުރިހާ މަސައްކަތަކަށް ވުރެ ކުރިން އިސްކަން ދޭން ޖެހެއެވެ. އެ އާ ގުޅޭ ގޮތުން ގޮތެއް ނުނިންމައި އިތުރު މަސައްކަތެއް ނުކުރެވޭނެ ކަމަށް ގަވައިދުގައި ވެއެވެ.