ޝަރުއީ ދާއިރާގެ މުވަޒިފުންނަށް ސިޔާސީ ކަންކަމުގައި ބައިވެރި ނުވެވޭނެ ކަމަށް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ވިދާޅުވެއްޖެއެވެ.
ޝަރުއީ ދާއިރާގެ މުވައްޒަފުން އަލަށް އަމަލުކުރަން ފެށި ކޯޑް އޮފް ކޮންޑަކްޓްއާއެކު ޝަރުއީ ދާއިރާގެ މުވައްޒަފުންނަށް ސިޔާސީ ހަރަކާތްތަކުގައި ބައިވެރިވުން ހުއްދަވެފައިވާ ކަމަށް ބުނެ ރިޕޯޓްކޮށްފައިވާތީ ޑީޖޭއޭ އިން ނެރުނު ބަޔާނެއްގައި ވިދާޅުވީ ޝަރުއީ ދާއިރާގެ މުވައްޒަފުންނަކީ ސިޔާސީ ކަންކަމުން އެއްކިބާވެ ތިބެންޖެހޭ ބައެއް ކަމަށެވެ.
ޑީޖޭއޭއިން ވިދާޅުވީ ސިޔާސީ ޕާޓީއެއްގެ މެންބަރަކަށް ވުމާއި ޕާޓީއެއްގެ އެތެރޭގެ އިންތިހާބުތަކުގައި ވޯޓުލުމަކީ ގަވާއިދުން އުވާލި ބާބުގައި މަނާކޮށްފައިވާ ކަމެއް ނޫންކަމުގައެވެ. ޝަރުއީ ދާއިރާގެ މުވައްޒަފުންގެ "އިމްޕާޝިއަލިޓީ" އާ ބެހޭ ގޮތުން ސުވާލު އުފެދިދާނެ އެއްވެސް ކަމެއް ކުރުން އާ ކޯޑް އޮފް ކޮންޑަކްޓުން މަނާވާނެ ކަމަށާއި އޭގެ ތެރޭގައި ސިޔާސީ ކަންކަމާއި އެ ނޫން ވެސް އިޖްތިމާއީ ހަރަކާތްތައް ހިމެނޭ ކަމަށް ޑީޖޭއޭ އިން ވިދާޅުވެއެވެ.
ޑީޖޭއޭ އިން ބުނީ އާ ކޯޑް އޮފް ކޮންޑަކްޓުގެ މަގްސަދަކީ ޝަރުއީ ދާއިރާއަށް އާންމުން ކުރާ އިތުބާރާއި އިހްތިރާމް ދެމެހެއްޓުން ކަމަށާއި މިހާރު އަމަލުކުރަމުން އައި 2011 ވަނަ އަހަރުގެ ގަވައިދުން ދިމާވާ އެތައް ކަމަކަށް ހައްލު ލިބިފައިވާ ކަމަށެވެ.
ޑީޖޭއޭ އިން ވިދާޅުވީ ސިޔާސީ ޕާޓީއެއްގެ މެންބަރަކަށްވުމާއި ޕާޓީގެ އިންތިހާބުތަކުގައި ވޯޓުލުމާއި ތިމާގެ މީހަކު ވޯޓުލާ މަރުކަޒަށް ގެންދިއުމަކީ އެއްވެސް އިރެއްގައި ޝަރުއީ ދާއިރާގެ މުވައްޒަފުންނަށް މަނާ ކަމެއް ނޫން ކަމަށެވެ.
