ރާއްޖެއަށް އަންނަމުންދާ އިސްލާހީ ބަދަލުތައް އެއްދުވަހުން އަނެއް ދުވަހަށް ކުރިއަރުވަމުން ދިއުމުގަ އެންމެ މުހިންމު ކަމެއްގެ ގޮތުގައި އޮތީ އިލްމުވެރިން އެއް ވިސްނުމެއްގައި ދެމި ތިބުން ކަމުގައި އަދާލަތު ޕާޓީގެ ރައީސް، ޝެއިޚް އިމްރާން ވިދާޅުވެއްޖެއެވެ.

ރިޔާސީ އިންތިޚާބަށް ތައްޔާރުވުމުގެ ގޮތުން ޢަދާލަތު ޕާޓީގެ ރައީސް ޝައީޚް ޢިމްރާން ޕާޓީގެ ބައެއް މެންބަރުންނާ ބައްދަލުކުރެއްވުމަށް ރޭއް ބޭއްވި ހަފްލާއެއްގައި ވާހަކަ ދައްކަވަމުން އިމްރާން ވިދާޅުވީ ރާއްޖެއަށް ހެޔޮ ބަދަލު އަންނާނީ އަދި ރާއްޖެ އިސްލާހު ވެގެން ދާނީ، އިލްމުވެރިންގެ ފަހަތުގައި އެންމެ އެކީ ސާބިތުވެ ތިބެވިގެން ކަމުގައެވެ.

ރާއްޖެއަށް އަންނަ ބަދަލުތަކާއި، ރާއްޖެއަށް އަންނަ އިސްލާހުތައް އަޅުގަޑުމެންނަށް ވަރަށް ރަގަޅަށް އެގެންޖެހޭ. އަޅުގަޑުމެންނަކީ މުޅި ދުނިޔެއާއި އެކަހެރިވެ ވަކިން ދިރިއުޅެވެން އޮތްބައެއް ނޫން. ދުނިޔެއާއި ގުޅި ލާމެހި، ދުނިޔެއަށް އަންނަ ބަދަލުތަކުގެ ތެރޭގައި، އެއާއެކުގަ ކުރިޔަށް ދެވެން އޮތް ބައެއް.

އިމްރާން ވިދާޅުވިއެވެ.

އިމްރާން އިތުރަށް ވިދާޅުވީ، އެހެންކަމުން ޚާއްސަކޮށް އިސްލާމީ ދުނިޔޭގެ ސިޔާސީ ހަރަކާތްތަކާއި ސިޔާސީ ޕާޓީތައް މަސައްކަތް ކުރާ ގޮތާއި، ކުރިއަރާ ގޮތާއި، އެޕާޓީތަކުގެ ވިސްނުން ބައްޓަން ކުރަމުންދާ ގޮތާއި، ދަރުސްތަކުން އިބުރަތް ލިބިގަނެގެން އޭގެ މައްޗަށް މަސައްކަތް ބައްޓަން ކުރަންޖެހިފައިވާ ކަމުގައެވެ.

ރިޔާސީ އިންތިޚާބަށް އާމަޒުކޮށް އަދާލަތު ޕާޓީގެ ބައެއް މެމްބަރުންނާއެކީ ރޭ ބޭއްވުނު ބައްދަލުވުމުގައި އިމްރާން ވިދާޅުވީ ރިޔާސީ އިންތިޚާބުގައި އަދާލަތު ޕާޓީން ވަރަށް މުހިންމު ދައުރެއް އަދާކުރަން ޖެހޭ ކަމަށާއި، އެޕާޓީގެ އަމާޒާއި މަގުސަދު އާންމު ރައްޔިތުން ކިޔައިދޭން ޖެހޭ ކަމުގައެވެ. އަދި އެ މަގުސަދު އާންމު ރައްޔިތުންނަށް ސާފު ކޮށްދެވުނު ވަރަކަށް އާންމު ރައްޔިތުން އެޕާޓީއާއެކު ސާބިތުވެ ތިބުމަށް މަގުފަހިވެގެން ދާނެކަމުގައިވެސް އިމްރާން ވިދާޅުވިއެވެ.

ކުރިޔަށް އޮތް ރިޔާސީ އިންތިޚާބަށް އަދާލަތު ޕާޓީންވަނީ ރައީސް ސާލިހާއެކީ ކޯލިޝަން ހަދާފައެވެ. އަދި އެޕާޓިން އިސް ބައެއް ބޭފުޅުން ތިއްބެވީ ރައީސް ސާލިހުގެ ސަރުކާރުގެ އިސް މަގާމްތަކުގައިކަންވެސް ފާހަގަ ކޮށްލެވެއެވެ.