ސީޓީ ކައުންސިލެއް އެކުގައި ވެރިކަން ކުރާ ޕާޓީއަކުން ވަކިވުމަކީ ބޮޑު ޒަލްޒަލާއެއް ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުޅުދުއްފުށީ ސިޓީ ކައުންސިލަށް ދެ އަހަރު ފުރުން ފާހަގަކުރުމަށް އެ ރަށުގައި ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން ނަޝީދު ވިދާޅުވީ ރާއްޖޭގެ ވެރިކަމުގެ އާރާ ބާރުގައި އޮތް ވެރިކަން ކުރާ ޕާޓީއަކުން ރާއްޖޭގެ ސިޓީ ކައުންސިލެއް އެކީ ވަކިވުމަކީ އާދައިގެ ކަމެއް ނޫންކަމަށެވެ.
މިއީ ސިޓީ ކައުންސިލުން ރައްޔިތުންގެ ތަރައްޤީއަށް ބޭނުންވި ކަންކަން ސަރުކާރަކަށް ނުކޮށް ދެވުމުން ނިކުތް ނަތީޖާއެއްކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވަނީ ކައުންސިލަރުންގެ ނިންމުމަށް ވަރަށް ބޮޑަށް ތައުރީފް ކުރައްވާފައެވެ.
ސީޓީ ކައުންސިލެއް އެކުގައި ވެރިކަން ކުރާ ޕާޓީއަކުން ވަކިވާ ހާދިސާ، އެއީ ސިޔާސީ ޒަލްޒަލާ. އެއީ ސިޔާސީ ހާދިސާއެއް. އެހާދިސާގެ ސާފު ސާދާ މާނައަކީ ތިބޭފުޅުންގެ އުންމީދު. ކުޅުދުއްފުށީ ރައްޔިތުންގެ ބޭނުން ވަނީ އެމީހުންގެ ރަށުގެ އެމީހުންގެ ސިޓީގެ ތަރައްޤީ. ބޭނުން ވަނީ ތަނަވަސްކަން. ހާސްކަމުގައި ނޫޅުން. ފެންބިލް ކަރަންޓު ބިލް ދެއްކުން.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވި ގޮތުގައި ކުޅުދުއްފުށީގެ ހުރިހާ ކައުންސިލަރުން ސަރުކާރުން ވީއްލުމަކީ އަމިއްލަ ފައިމައްޗަށް ތެދުވުމެވެ. އެއީ އޮބެހެއްޓިފައި ނުތިބެ, ކައުންސިލްގެ އުންމީދުތައް ހާސިލުކުރުމަށް ނުއުފުލާނެ އެއްވެސް ތަކުލީފެއް ނެތްކަމުގެ ރަމްޒެއް ކަމަށް ވިދާޅުވިއެވެ.
ކުޅުދުއްފުށި ސިޓީ ކައުންސިލަށް 2 އަހަރު ފުރުމުގެ މުނާސަބާގައި ބާއްވާ ޚާއްޞަ ރަސްމިޔާތުގައި، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ބައިވެވަޑައިގަތުން pic.twitter.com/NzWBY1EIZP
— People's Majlis (@mvpeoplesmajlis) June 13, 2023
މިދިޔަ ލޯކަލް ކައުންސިލްތަކުގެ އިންތިހާބުގައި އެމްޑީޕީއަށް ހުރިހާ ގޮނޑިއެއް ލިބުނު ހަމައެކަނި ސިޓީއަކަށްވީ ކުޅުދުއްފުއްޓެވެ. އޭގެ ކުރިން އޮތް މަޖިލިސް އިންތިހާބެކޭ އެއްގޮތަށް، އެމްޑީޕީއަށް ތާއީދު ކުރާ ބޮޑު އާބާދީއެއް އޮންނަ އެ ރަށުން ކައުންސިލް އިންތިހާބުގައި ދައްކާލަދަނީ އެއީ އެމްޑީޕީގެ ބޮޑު "ކިއްލާއެއް" ކަމެވެ.
އެކަމަކު، ކުޅުދުއްފުށީ މޭޔަރާއި ކައުންސިލުގެ ހުރިހާ މެމްބަރުން، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދު ކުރާ ފެކްޝަން އެމްޑީޕީން ވަކިވެ، އުފައްދަމުންދާ އާ ޕާޓީ "ދަ ޑިމޮކްރެޓްސް" އާ ވަނީ ގުޅިފައެވެ. މިއާއިއެކު އެއްބުރުން އެމްޑީޕީއަށް މުޅި ކުޅުދުއްފުށި ގެއްލުނީއެވެ.
ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީގައި ކުޅުދުއްފުށިން އެންމެ ގިނަ ވޯޓުލީ ނަޝީދަށެވެ. އެ ސިޓީއިން ނަޝީދަށް 245 ވޯޓު ލިބިވަޑައިގެންނެވި އިރު ރައީސް ސޯލިހަށް ލިބިވަޑައިގަތީ 219 ވޯޓެވެ.
