އިދިކޮޅު ކޯލިޝަނުން މިރޭ މާލޭގައި ކުރިއަށް ގެންދިޔަ މުޒާހަރާގެ ތެރެއިން ޕީއެންސީގެ ނައިބް ރައީސް އަދި މަޑުއްވަރީ ދާއިރާގެ މެމްބަރު އާދަމް ޝަރީފް ހައްޔަރުކޮށްފިއެވެ.

ރައީސް ޔާމީން މިނިވަން ކުރުމަށް ގޮވާލައި އިދިކޮޅު ކޯލިޝަން މާލޭގައި ކުރިއަށް ގެންދާ ސިލްސިލާ މުޒާޖަރާގެ ތެރެއިން މިރޭގެ މުޒާހަރާވެސް ކުރިއަށް ގެންގޮސްފައިވަނީ ޕީޕީއެމް އޮފީސް ހިމެނޭ ސަރަހައްދުގެ ބޮޑު ތަކުރުފާނު މަގުގައެވެ. މުޒާހަރާގެ ބައިވެރިން ވަނީ ރައީސް ޔާމީން މިނިވަން ކުރުމަށް ގޮވާލައި އަޑު އަފުލާފައެވެ.

ފުލުހުން ވަނީ ވަކި ހިސާބަކުން މުޒާހަރާގެ ތެރެއަށް ވަދެ ބައެއް މީހުން ހައްޔަރުކޮށްފައެވެ. މެމްބަރު އާދަމް ޝަރީފާއި، ޕީޕީއެމްގެ ލީޑަރޝިޕްގެ އިސް ބޭފުޅުންވެސް ބައިވެރިިވި މިމުޒާހަރާގައި އާދަމް ޝަރީފް ހައްޔަރު ކޮށްފައިވަނީ މުޒާހަރާގެ ބައިވެރިންނާއި އެކު ހުއްޓައެވެ.

އާދަމް ޝަރީފް ހައްޔަރުކޮށް ފުލުނުންގެ ވެހިކަލްގައި ވަނީ ގެންގޮސްފައެވެ. މިހާތަނަށް އަދި އޭނާ ދޫކޮށްލިކަމެއް އެނގިފައި ނުވެއެވެ. މަޖިލީހުގެ މެމްބަރަކު ހައްޔަރު ކޮށްފައި ބަހައްޓާނަމަ އެކަން ވަގުތުން މަޖިލީހުގެ އިދާރާއަށް ފުލުހުން އަންގަން ޖެހެއެވެ.

އިދިކޮޅު ކޯލިޝަންގެ މުޒާހަރަތައް އިތުރަސް ވަރުގަދަ ވެފައިވަނީ ރައީސް ޔާމީންގެ ޝަރީއަތްތައް ފުލުފުލުގައި ކޮންމެ ދުވަހަކު އެތައް ގަޑިއިރަކަށް ކުރިއަށް ގެންދާ ދަނޑިވަޅެއްގައެވެ.