ޓްރާންސްޕޯޓު މިނިސްޓަރު އައިޝަތު ނަހުލާ ބާތިލް ކޮށްފައިވާ 50 އަށްވުރެ ގިނަ ވެހިކަލް ރަޖިސްޓްރީތަކެއްގެ މައްސަލަ ޝަރުޢީ 3 މަރުހަލާގައި ރަޖިސްޓްރީ ބާތިލް ނޫންކަމަށް ކަނޑައެޅުމާއެކު، ޓްރާންސްޕޯޓު މިނިސްޓްރީ ތެރެއިން ވައްކަން ކޮށްފައިވާކަން އެބަ ޔގީން ކުރެވޭކަމަށް ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރު ސައުދު ވިދާޅުވެއްޖެއެވެ.

ސައުދު ކުރި ޓްވީޓެއްގައި ވަނީ، މިނިސްޓްރީއިން ސައްހަ ނޫން ލިޔެކިޔުންތަކެއް ބޭނުންކޮށްގެން 50 ވެހިކަލެއްގެ ރަޖިސްޓްރީގެ މައްސަ؛ލަ ޝަރުޢީ 3 މަރުހަލާގައި ރަޖިސްޓްރީ ބާތިލް ނޫންކަމަށް ކަނޑައެޅުމާއެކު، އެހާތަނުން އެކަންވެސް ނިމުނީ ތޯ ސުވާލު ކުރައްވާފައެވެ. އަދި އޭނާވަނީ ވައްކަމެއް ކޮށްފިކަން އިނގޭއިރު ވައްކަން ކުރި ބަޔަކު ހޯދުމަށް އެންޓި ކޮރަޕްޝަން ކޮމިޝަން އޭސީސީ އާއި މަޖިލީހަށް ގޮވާލާފައެވެ.

"އަޅުގަނޑު ހިތަށް އަރަނީ މިހިސާބުން މިކަން މި ނިމުނީ ތޯ؟ ވައްކަމެއް ކޮށްފިކަން އެބަ އިނގޭ، އެކަން ކުރި ބަޔަކު ހޯދަން އޭސީސީ އަދި މަޖިލިސް ކޮބައިތޯ؟ ސައުދުގެ ޓްވީޓްގައި ވިދާޅުވެފައި ވެއެވެ.

Minister @aishath_nahula baathil kuri 50 ah vuren gina vehical registry Rajjeyge sharuee 3 maruhalaaing vanee registry baathil noon kamah kada alhaafa.Alhugadu hithah aranee mihisaabun mikan ves nimuneetho?vakkameh kohfi kan eba engey ekan kuri bayaku hoadhan @ACC_Maldives adhi…

— Saudulla Ahmed (@saudullaahmed1) June 13, 2023

ޓްރާންސްޕޯޓް މިނިސްޓްރީން ވަނީ ގިނަ ވެހިކަލެއްގެ ރަޖިސްޓްރީ ބާތިލުކޮށްފައިވާ ކަމަށް އިޢުލާންކޮށް، މި ވެހިކަލްތަކުގެ ރަޖިސްޓްރީ ބާތިލުކުރީ ޤަވާއިދާއި ޚިލާފަށް ރަޖިސްޓްރީ ކޮށްފައިވާ ވެހިކަލްތަކެއްކަން ފާހަގަކުރެވިފައިވާތީ ކަމަށް ބުނެފައެވެ.

މި ވެހިކަލުތަކުގެ ތެރޭގައި ރާއްޖޭގައި ރަޖިސްޓްރީ ކުރެވޭ ޢުމުރު ހަމަވެފައިވާ ވެހިކަލްތަކާއި، އަދި ގަވާޢިދާ ޚިލާފަށް މާލޭ ޒޯނަށް ރަޖިސްޓްރީ ބަދަލުކޮށްފައިވާ ވެހިކަލްތައް ހިމެނޭ ކަމަށް މިނިސްޓްރީން ވަނީ ހާމަކޮށްފައެވެ.

އުސޫލާ ހިލާފަށް ރަޖިސްޓްރީ ކުރި ކަމަށް ބުނާ ވެހިކަލްތަކެއްގެ ރަޖިސްޓްރީ ބާތިލްކުރަން ޓްރާންސްޕޯޓް މިނިސްޓްރީން ނިންމި ނިންމުން މަޑުޖައްސާލަން ސިވިލް ކޯޓުން އެންގި އެންގުމާ ދެކޮޅަށް ސުޕްރީމް ކޯޓަށް ދައުލަތުން ހުށަހެޅި މައްސަލަވެސް އެންމެފަހުން ބަލައިނުގަތުމަށް އެ ކޯޓުންވެސް ވަނީ ނިންމައިފިއެވެ.

ގަވާއިދާ ހިލާފަށް ރަޖިސްޓްރީ ކުރިކަމަށް ތުހުމަތުކޮށް 200 އެއްހާ ވެހިކަލްގެ ރަޖިސްޓްރީ ބާތިލް ކުރަން ޓްރާންސްޕޯޓު މިނިސްޓްރީން ނިންމާފައި ވަނިކޮށް އޭގެ ތެރެއިން 87 ވެހިކަލްގެ ރަޖިސްޓްރީ ބާތިލް ކުރުން މަޑުޖައްސާލަން ސިވިލް ކޯޓުން ވަނީ ވަގުތީ އަމުރެއް ނެރުނީ 2022 ވަނަ އަހަރުގެ އޮކްޓޯބަރު މަހުއެވެ.

ސިވިލް ކޯޓުން ނެރުނު ވަގުތީ އަމުރު ޓްރާންސްޕޯޓް މިނިސްޓްރީން ފުރަތަމަ ހައި ކޯޓުގައި އިސްތިއުނާފް ކުރިއެވެ. އިސްތިއުނާފް މައްސަލާގައު ހައިކޯޓުން ކުރި ހުކުމްގައި ބުނެފައިވަނީ، އެ ވެހިކަލްތަކުގެ ރަޖިސްޓްރީގެ ސައްހަ ކަމާ މެދު ގޮތެއް ނިންމޭނީ ސިވިލް ކޯޓުން ބަލާ މައުޟޫއީ މައްސަލައިގެ ތެރެއިން ކަމަށެވެ. އެ ހުކުމުގައި އިތުރަށް ބުނެފައިވަނީ ކޯޓުން ގޮތެއް ނުނިންމަނީސް އުޅަނދުގެ ރަޖިސްޓްރީ ބާތިލްވެފައި އޮވެއްޖެނަމަ ގެއްލުން ލިބޭނީ އުޅަނދުގެ ވެރިފަރާތަކަށް ކަމަށެވެ. އަދި އެކަމަކު ދައުލަތަށް ލިބޭނެ ގެއްލުމެއް ނެތް ކަމަށް ހައި ކޯޓުގެ ހުކުމުގައި ވަނީ ބުނެފައެވެ.

ދައުލަތުން ވަނީ ހައިކޯޓުގެ ހުކުމް ސުޕްރީމް ކޯޓަށްވެސް ހުށަހަޅާފައެވެ. ސުޕްރީމް ކޯޓުގެ ރަޖިސްޓްރާ ވަނީ، ހައި ކޯޓުގެ ނިންމުން ގޯސް ކަމަށް ބަލަންޖެހޭ ގާނޫނީ ސަބަބެއް ދައުލަތަށް ބުނެދެވިފައި ނުވާކަމަށް ނިންމާފައެވެ. އަދި އެ މައްސަލަ ބަލައިގަނެވެން ނެތް ކަމަށް ސުޕްރިމް ކޯޓުގެ ރެޖިސްޓްރަރ ނިންމާފައި ވެއެވެ. ސުޕްރީމް ކޯޓުގެ ގަވާއިދު އޮންނަ ގޮތުން ރަޖިސްޓްރާގެ ނިންމުންތައް އެ ކޯޓުގެ ފަނޑިޔާރުންގެ މަޖިލީހަށް ހުށަހެޅުމުގެ ފުރުސަތު އޮވެއެވެ.

އެހެންނަމަވެސް އެ މައްސަލަ ފަނޑިޔާރުންގެ މަޖިލިހަށް ހުށަހަޅާފައިވާކަމުގެ މައުލޫމާތު ލިބިފައެއް ނުވެއެވެ.