މިނިސްޓްރީ އޮފް އިސްލާމިކް އެފެއަޒުން މިއަހަރުގެ ފަޤީރުންގެ ދަފްތަރުގައި ރަޖިސްޓްރީ ވުމުގެ ފުރުޞަތު ހުޅުވާލައްވައިފިއެވެ.
އިސްލާމިކް މިނިސްޓްރީން ވިދާޅުވީ ފަގީރުންގެ ދަފްތަރުގައި އަލަށް ރަޖިސްޓްރީވާން ބޭނުންވާ މީހުންނަށް އެ ފުރުސަތު މިމަހުގެ 22 ވަނަ ދުވަހުގެ ނިޔަލަށް ހުޅުވާލައްވާފައިވާކަމަށެވެ. އަދި އެމުއްދަތުގެ ތެރޭގައި ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރު 12:00 އާ ދެމެދު މިނިސްޓްރީއަށް ފޯމު ހުށަހެޅޭނެކަމަށެވެ. އިސްލާމިކް މިނިސްޓްރީން ހުޅުވާލައްވާފައިވަނީ މާލެ އާއި ވިލިމާލެ އަދި ހުޅުމާލެ އިން ފަގީރުންގެ ގޮތުގައި ރަޖިސްޓަރީ ވުމަށެވެ.
އިސްލާމިކް މިނިސްޓްރީން ވިދާޅުވީ ފަޤީރުންގެ ލިސްޓުގައި ރަޖިސްޓްރީވުމުގެ ފުރުޞަތު ހުޅުވާލެއްވިނަމަވެސް މި އަހަރު ފިތުރު ޒަކާތުގެ ފައިސާ ލިބިފައިވާ މީހުންގެ ތެރެއިން ހާލަތު ބަދަލުވުމުގެ ސަބަބުން ދަފުތަރުން އުނިވެފައިވާކަން އަންގާފައި ނެތް މީހުންނަކީ މި ވަގުތު ވެސް ފަގީރުންގެ ދަފްތަރުގައި ތިބި މީހުންކަމަށެވެ. އަދި އެމީހުން އަލުން ރަޖިސްޓަރީވާން ނުޖެހޭނެކަމަށްވެސް މިނިސްޓްރީން ވިދާޅުވެއެވެ. މި އާއިލާތަކުގައި ވެސް މި މަހުގެ 22 އަށް 18 އަހަރު ފުރޭ ކުއްޖަކު ހުރިނަމަ ނުވަތަ 65 އަހަރު ފުރޭ މީހަކު ހުރި ނަމަ އަލުން ފޯމު ހުށަހަޅަން ޖެހޭނެ ކަމަށް މިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން އެންމެ ފަހުން އާއްމުކޮށްފައިވާ ފަޤީރުންގެ ލިސްޓުގައި 8446 މީހުން ތިބިއެވެ. މީގެ ތެރެއިން، 1736 މީހުންނަކީ މާލެ ސަރަހައްދުން ރަޖިސްޓްރީކޮށްފައިވާ މީހުންނެވެ.
