ސެޕްޓެމްބަރ މަހު އޮންނަ ރިޔާސީ އިންތިހާބުގައި ރަށްވެހިވެފައިވާ ރަށް ނޫން އެހެން ރަށެއްގައި ނުވަތަ ތަނެއްގައި ތިބޭ މީހުން ވޯޓު ލުމަށް ޓަކައި އޮންލަައިންކޮށް ވެސް ރަޖިސްޓްރީ ވެވޭ ގޮތައް އިލެކްޝަންސް ކޮމިޝަނުން ގަވައިދެއް އެކުލަވާލައިފިއެވެ.
އިލެކްޝަން ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވީ މިއަހަރުގެ ރިޔާސީ އިންތިހާބުގައި ތަފާތުކޮށް ކުރަން ހަމަޖެހިފައިވާ ކަންކަމުގެ ތެރޭގައި އޮންލައިންކޮށް ރީ-ރަޖިސްޓާވުން ހިމެނޭ ކަމަށެވެ. މީގެ ކުރިން ރީ-ރަޖިސްޓާ ކުރެވެނީ, އެކަމަށް އެދޭ ކަރުދާސް ފޯމު އިލެކްޝަން ކޮމިޝަނަށް ހުށަހެޅުމުންނެވެ.
މިހާރު ބާއްވަމުން އަންނަ ބައި-އިލެކްޝަންތަކުގައި ވެސް އޮންލައިންކޮށް ރީ-ރަޖިސްޓްރީޝަނަށް ހުށަހެޅޭނެ. އޭރަށް ދުނިޔޭގެ ކޮންމެ ހިސާބެއްގައި ހުރި މީހަކަށް ވެސް އަޅުގަނޑުމެން ގާއިމްކުރާ އޮންލައިން ޕޯޓަލް ނުވަތަ ނިޒާމެއްގެ ތެރެއިން ފަސޭހަކަމާ އެކު ރީ-ރަޖިސްޓްރީކޮށްލެވޭނެ. އިސްމާޢިލް ޙަބީބު ވިދާޅުވިއެވެ.
މިއަހަރުގެ ރިޔާސީ އިންތިހާބުގެ ގަވާއިދު ރޭ އާންމުކޮށްފައިވާއިރު, އެ ގަވާއިދުގައި ވަނީ ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމަށް އެދޭ ފޯމު, ކޮމިޝަނުން ކަނޑައަޅާ ނިޒާމެއްގެ ތެރެއިން ހުށަހެޅުމަށެވެ. މި އަހަރުގެ ރިޔާސީ އިންތިހާބަށް އޮންލައިންކޮށް ރީ-ރަޖިސްޓީ ކުރެވޭއިރު, އަދި އެ ފުރުސަތު ހުޅުވައެއް ނުލައެވެ. ރީ-ރަޖިސްޓްރީ ކުރުމަށް ހުޅުވާލާނީ ވޯޓުލުމުގެ ހައްގު ލިބިގެންވާ މީހުންގެ ރަޖިސްޓްރީ އާންމުކޮށް, އެ ލިސްޓަށް ހުށަހަޅާ ޝަކުވާތައް ބެލުމަށްފަހެވެ.
މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވޯޓުލުމުގެ ހައްޤުލިބިފައިވާ މީހުންގެ ވޯޓާސް ލިސްޓުގައި 282755 މީހުންނަށް ވޯޓުލުމު ޙައްޤު ލިބިފައިވެއެވެ. އޭގެ ތެރޭގައި ހިމެނެނީ 144408 ފިރިހެނުންނާއި 138347 އަންހެނުންނެވެ. ހަބީބު ވިދާޅުވީ ވޯޓުލެވޭ މީހުންގެ ފައިނަލް ލިސްޓު މިއަދު 1 ޖަހާއިރު އާއްމުކުރައްވާނެކަމަށެވެ. އަދި އެ ލިސްޓަށް ޝަކުވާ ހުށަހަޅަން، ގާނޫނުގައި ބުނާ 10 ދުވަހުގެ މުއްދަތެއް ދެއްވާނެ ކަމަށާއި ޝަކުވާ ހުށައެޅުމުގެ ފުރުޞަތު މިމަހުގެ 22އާ ހަމައަށް ހުޅުވާލައްވާފައި އޮންނާނެކަމަށެވެ. އަދި ރީ ރަޖިސްޓްރޭޝަނަށް އަންނަ މަހުގެ 16 ވަނަ ދުވަހުން ފެށިގެން އޯގަސްޓް މަހުގެ 5 ވަނަ ދުވަހާހަމައަށް ހުޅުވާލައްވާނެކަމަށްވެސް ހަބީބު ވިދާޅުވިއެވެ.
