ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވަދާކުރެއްވުމަށް އެ ޕާޓީގެ ރިޔާސީ ޓިކެޓް، ޖޭޕީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ޤާސިމް އިބްރާހީމާއި ހަވާލު ކުރެއްވުމުން އެމްޑީޕީގެ ރައީސް މުހައްމަދު ނަޝީދު ޤާސިމަށް މަރުޚަބާ ދަންނަވައިފިއެވެ.
ޤާސިމާއި ރިޔާސީ ޓިކެޓް ހަވާލުކޮށްފައިވަނީ ރޭ ބޭއްވި ޚާއްސަ ރަސްމިއްޔާތެއްގައެވެ. ޖޭޕީގެ ރިޔާސީ ޓިކެޓު ޕާޓީގެ ލީޑަރަށް އަރުވާފައި މިވަނީ ޖޭޕީގެ ރިޔާސީ ޕްރައިމަރީއަށް ހުޅުވާލި ފުރުޞަތުގައި ޤާސިމް ފިޔަވާ އިތުރު ބޭފުޅަކު ވާދަކުރައްވާފައި ނުވާތީއެވެ. މި ޖަލްސާގައި ޕާޓީގެ ރިޔާސީ ޓިކެޓް ޤާސިމަށް އެރުވުމަށްފަހު، ޖުމްހޫރީ ޕާޓީން ވަނީ އެޕާޓީގެ ރިޔާސީ ކެމްޕޭންވެސް ވަނީ ރަސްމީކޮށް ލޯންޗްކޮށްފައެވެ. އެގޮތުން ކެމްޕޭންގެ ސްލޯގަން ކަމުގައިވާ "ހާސްކަނޑާލާ، ހަމަޖެހޭނެ" އާއި ކެމްޕޭންގެ ރަސްމީ ލަވަ މި ޖަލްސާގައި ވަނީ އިފްތިތާޙްކޮށްފައެވެ.
ޤާސިމަށް މަރުހަބާ ދަންނަވައި ރައީސް ނަޝީދު ވިދާޅުވީ މިނިވަން އިންސާފުވެރި އިންތިޚާބަކަށް މަގުފަހި ކުރުމަކީ ސިޔާސީ ހުރިހާ ލީޑަރުން ކުރަންޖެހޭ ކަމެއްކަމަށެވެ. އެމަގަށް މަސައްކަތް ކުރުމުގެ ފުރުސަތު ހޯދައި ދިނުމަށް ޤާސިމްގެ ކިބައިން ނަޝީދުވަނީ އެދިވަޑައިގެންފައެވެ. ރިޔާސީ އިންތިޚާބުގައި ނަޝީދުވެސް ވާދަ ކުރައްވާނެކަމަށް ބެލެވެއެވެ.
ޖުމްހޫރީ ޕާޓީގެ ރިޔާސީ ކެނޑިޑޭޓްގެ ޓިކެޓް ލިބިވަޑައިގެންނެވި އޮނަރަބަލް ޤާސިމް އިބްރާހިމަށް މަރުހަބާ. މިނިވަން އިންސާފުވެރި އިންތިޚާބަކަށް މަގުފަހި ކުރުމަކީ އަޅުގަނޑުމެން އެންމެންގެވެސް ވާޖިބެއް.
– ރައީސް ނަޝީދު ވިދާޅުވިއެވެ.
ރައީސް ނަޝީދަކީ ކުރިއަށް އޮތް ރިޔާސީ އިންތިޚާބުގައި ޤާސިމާއިއެކު މަސައްކަތް ކުރެއްވުމަށް ބައިއަތު ހިފި ބޭފުޅެކެވެ. ގިނަ މަޝްވަރާތަކެއް ޤާސިމާއި ނަޝީދާއި ބޭއްވި ނަމަވެސް ރައީސް ނަޝީދު ހުށަހެޅުއްވި ކަންކަމަށް އެއްބަސްވުނެވެވި، ރައީސް ނަޝީދާއި ޤާސިމްގެ މަސައްކަތް ވަނީ ނިމުމަކަށް އައިސްފައެވެ. މައުލޫމާތު ލިބިފައިވާ ގޮތުގައި މިހުށަހެޅުން ތަކުގެ ތެރޭގައި ބަރުލަމާނީ ނިޒާމަށް ވެރިކަން ބަދަލު ކުރުމުގެ ހުށަހެޅުންވެސް ހިމެނެއެވެ.
ޤާސިމާއި ރައީސް ނަޝީދުގެ މަޝްވަރާތަށް ކާމިޔާބު ނުވުމުން ޤާސިމް ވިދާޅުވީ ރައީސް ނަޝީދަކީ އެހެން މީހަކަށް ވެރިކަން ލިބުމަށް އެދޭނެ މީހެއް ނޫންކަމަށެވެ. ރައީސް ނަޝީދު އަބަދުވެސް ބޭނުންވާނީ އެމަނިކުފާނަށް ވެރިކަމުގެ އާރާއި ބާރު ލިބިދޭގޮތަށް ވެރިކަން ހޯދުމަށް ކަމަށް ޤާސިމް ވިދާޅުވިއެވެ.
ރައީސް ނަޝީދު ގެންދަވަނީ ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމުގެ މަސައްކަތް ކުރައްވަމުންނެވެ. އެޕާޓީން ނިންމާފައިވަނީ ރިޔާސީ އިންތިޚާބުގައި ކެނޑިޑޭޓަކު ނެރުމަށެވެ. އެޕާޓީން ވާދަކުރާނެ ކެނޑިޑޭޓަކީ ރައީސް ނަޝީދުކަމަށް ބެލެއެވެ.
