މިގޮތުން ޖުމުހޫރީ ފިކުރަށް ރައްޔިތުން ފުރުސަތު ދެއްވައިފިނަމަ، ރައްޔިތުންގެ އުދާސްތަކަށް ހައްލު ހޯދާ ދެވޭނެވަރުގެ މެނިފެސްޓޯއެއް އެކުލަވާލައްވާފައިވާކަން ފާހަގަ ކުރައްވަމުން ގާސިމް ވިދާޅުވީ ޖޭޕީގެ މިފަހަރުގެ މެނިފެސްޓޯއަކީ ރައްޔިތުންގެ ދުޅަހެޔޮކަން ހޯދާ ދޭނެ މެނިފެސްޓޯއެއް ކަމުގައެވެ.

އަދި ގާސިމްވަނީ އެނާގެ ވެރިކަމުގައި ޒައްރެއްގެ މިންވަރުވެސް ރާއްޖޭގެ އިމުން ގެއްލިގެންދިޔަ ނުދެއްވާނެކަމުގައި ވިދާޅުވެފައެވެ. މިގޮތުން އިޓްލޮސްގެ ހުކުމުން ގެއްލިގެން ދިޔަ ރާއްޖޭގެ ކަނޑުގެ ސަރަހައްދުގެ ބައި ހޯއްދެވުމަށް، ބައިނަލްއަގުވާމީ އެކްސްޕާޓުންގެ އެހީގައި ވެރިކަމުގެ ފުރަތަމަ ދުވަހުން ފެށިގެން މަސައްކަތް ފައްޓަވާނެކަމަށް ގާސިމް ވިދާޅުވިއެވެ.

އޭގެ އިތުރަށްވެސް މެނިފެސްޓޯގެ ތަފްސީލުތަކަށް ވަޑައިގަންނަވަމުން ގާސިމް ވިދާޅުވީ ވެރިކަމުގެ ފުރަތަމަ 3 އަހަރު ތެރޭ ދައުލަތުގެ ދަރަނި ޖީޑިޕީގެ ނިސްބަރުން 120 އިންސައްތައިން 90 އިންސައްތައަށް ދަށް ކޮށްދެއްވާނެ ކަމުގައެވެ. އަދި ދައުލަތުގެ ޚަރަދު ޖީޑީޕީގެ ނިސްބަރުން 30 އިންސައްތައަށް ދަށްކޮށް، އާމްދަނީ 30 އިންސައްތަ މަތިކޮށްދެއްވާނެކަމަށްވެސް ވިދާޅުވިއެވެ.

އޭގެ އިތުރުންވެސް ގާސިމްވަނީ 5 އަހަރުގެ ދައުރުގައި ރާއްޖޭގެ އެކި ކަންކޮޅުތަކުގައި 20،000 ހައުސިން ޔުނިޓް އެޅުއްވުމަށާއި، ވެރިކަމުގެ ފުރަތަމަ 100 ދުވަހުގެ ތެރޭގައި ހިޔާފްލެޓްގެ ހުރިހާ މައްސަލައެއް ހައްލުކޮށް ދެއްވުމުގެ އިތުރުން މަސްވެރިންނަށް ލުއި ލޯނު ހަމަޖައްސަވާ ދެއްވުމުގެ އިތުރުން ރާއްޖެއަށް ޑިޖިޓަލް ކަރަންސީ ތައާރަފް ކޮށް، އިލާމިކް ޓުއަރިޒަމްވެސް ރާއްޖެއަށް ތައާރަފް ކޮށްދެއްވާނެކަމަށްވެސް ވައުދުވެ ވަޑައިގެންފައެވެ.