ޔޫކުރެއިންގެ އެންމެ ބޮޑު އެއް ޑޭމްކަމަށްވާ ނޯވާ ކަޚޯވްކާ ޑޭމް ރަޝިއާއިން ގޮއްވާލުމާއި ގުޅިގެން އެގައުމުގެ ޚާސަން ސަރަހައްދުގެ ބޮޑުބައެއް ފެނު އަޑިއަށް ހިގައިދާނެ ކަމުގެ ބިރު ހިވެއްޖެއެވެ.
މިޑޭމް ހުންނަނީ ޔޫކުރެއިންގެ ޚާސަން ސަރަހައްދުގެ ރަޝިއާއިން ހިފާފައިވާ ބައިގައެވެ. ޔޫކުރެއިންގެ އަސްކަރިއްޔާއިން މިހާރުވަނީ ޚާސަންގެ ޑިޕްރޯ ކޯރުގެ އައްސޭރިފަށާއި ގުޅުންހުރި އެތައް ވިލެޖަކުން މީހުން ހުސްކުރާން ޖެހިދާނެތީ، އެ ސަރަހައްދުތައް ދޫކޮށް ދިއުމަށް ތައްޔާރުވެ ތިބުމަށް ގިނަ ވިލެޖްތަކުގެ ރައްޔިތުންނަށް އިލްތިމާސް ކޮށްފައެވެ.
ހަމައެއާއެކު ޚާސަން ސިޓީގެ ރަޝިއާއިން ހިފާފައިވާ ސަރަހައްދުގައި މި ޑޭމްގެ ކައިރި ސަރަހައްދުތަކުން މީހުން ދުރަށް ޖެއްސުމުގެ މަސައްކަތް މި ސަރަހައްދުތަކަށް ރަޝިއާއިން އިސްކޮށްފައިވާ ފަރާތްތަކުން މިހާރުވަނީ ފަށާފައެވެ.
ޔޫކުރެއިން ބުނެފައިވަނީ، މި ޑޭމް ގޮއްވާލުމާއެކު، ފެންގަޑު އެކި ސަރަހައްދުތަކަށް ދެމެމުން ދިޔަނަމަވެސް، ޒަޕޮރިޒިއާ ނިއުކުލިއަރ ޕަވަރ ޕްލާން ހުރި ސަރަހައްދަށް ނުރައްކަލެއް އޮތްކަމަށް އަދި ބެލެވިފައި ނުވާކަމުގައެވެ.
ރަޝިއާއިން މި ޑޭމް ގޮއްވާލާފައިވާކަމަށް ތުހުމަތުކޮށް ވާހަކަ ދައްކަވަމުން ޔޫކުރެއިންގެ ރައީސް ވޮލޮޑިމިރު ޒެލެންސްކީ ވިދާޅުވެފައިވަނީ، މި ކާރިސާއިންވެސް ހާމަވެގެންދާ ހަމައެކަނި ކަމަކީ، އެގައުމުގެ ހުރިހާ ސަރަހައްދަކުންވެސް ރަޝިއާ ސިފައިން ފައްސާލަން ޖެހިފައިވާކަން ކަމުގައި ކަމެވެ.
ޔޫކުރެއިން އިން ކޮންޓްރޯލް ކުރަމުންދާ ޚާސަން ސަރަހައްދުގެ އިސްވެރިން ވިދާޅުވެފައިވަނީ، އެ ސަރަހައްދުތަކުން މިހާތަނަށް 71 ގެއަކުން މީހުން ހުސްކުރަން ޖެހިފައިވާކަމުގައެވެ.
މި ޑޭމް ގޮއްވާލުމާއެކު ކުރިމަތިވަމުންދާ ތިމާވެށީގެ މައްސަލަތަކަށް އިޝާރާތް ކުރައްވަމުން ޔޫއެންގެ ސެކެޓްރީ ޖެނެރަލް އެންޓޯނިއޯ ގުޓަރޭސް ވިދާޅުވެފައިވަނީ، މި ޑޭމް ގޮއްވާލީ ކޮންބައެއްކަން ޔޫއެންއަށް ކަށަވަރު ކުރެވިފައި ނުވިނަމަވެސް، މި ހާދިސާއިންވެސް ކަށަވަރުވެ ޔަގީންވާ އެއް ކަމަކީ، ކުރެވެމުންދާ ޔޫކުރެއިން ހަނގުރާމައިގެ ގެއްލުމާއި ހަލާކުކަން ކަމުގައެވެ.
މި ޑޭމް ގޮއްވާލާފައިވަނީ ރަޝިއާއިންކަމަށް ޔޫކުރެއިން ތުހުމަތު ކޮށްފައިވާއިރު، ރަޝިއާއިން ބުނެފައިވަނީ ޑޭމް ގޮއްވާލާފައިވަނީ ޔޫކުރެއިން ދިން "ޓެރަރިސްޓް ހަމަލާ"އެއްގައި ކަމުގައެވެ.
ޔޫކުރެއިންގެ ކަޚޯވްކާ ޑޭމްއަކީ 1956ވަނަ އަހަރު ބިނާ ކޮށްފައިވާ ހައިޑްރޯ ޕަވަރ ޕްލާންޓެކެވެ. ހައިޑްރޯ ޕަވަރ ޕްލާންޓަކީ ދެމެމުންދާ ފެނުން ހަކަތަ އުފެއްދުމަށް ބިނާ ކޮށްފައިވާ ޑެމްތަކަށް ކިޔާ ނަމެކެވެ. ކަޚޯވްކާ ޑޭމް ރަޝިއާއިން ހިފާފައިވަނީ 2022 ވަނަ އަހަރުގެ ފެބްރުއަރީމަހުއެވެ.
