އިރުމަތީ އިންޑިއާގައި ހިނގި ނުރައްކާތެރި ރޭލު އެކްސިޑެންޓުގައި އިހުމާލުވީ ފަރާތްތަކަށް ހަރުކަށި އަދަބު ދޭނޭ ކަމަށް އިންޑިއާގެ ބޮޑުވަޒީރު ނަރެންދުރަ މޯޑީ ވައުދު ވެއްޖެއެވެ.
މީހުން ގޮވައިގެން ދަތުރު ކުރަމުންދިޔަ ރޭލަކާއި މުދާ އުފުލާ ރޭލެއް މުޑި އަރައިގެން އިންޑިއާގެ އޮޑިޝާ ސްޓޭގައި މިހަފްތާގެ ހުކުރު ދުވަހު ހިނގި ނުރައްކާތެރި މި އެކްސިޑެންޓުގައި މަރުވި މީހުން އަދަދު 288 އަށް އަރާފައިވާއިރު، މި އެކްސިޑެންޓުގައި އަނިޔާވި މީހުންގެ އަދަދު މިހާރުވަނީ 800 އަށް އަރާފައެވެ.
މި ހާދިސައަށްފަހު މީހުން ސަލާމަތް ކުރުމަށް ހިންގުނު އޮޕަރޭޝަން މިހާރުވަނީ ނިންމާލާފައެވެ. އޮފިޝަލުން ވިދާޅުވެފައިވަނީ އަނިޔާވި މީހުންނާއި އަދި ރޭލުގެ އެތެރޭގައި ތާށިވެފައިވާ އެންމެ މިހާރު ސަލާމަތް ކުރެވިފައިވާކަމުގައެވެ.
އިންޑިއާގެ ބޮޑުވަޒީރު ނަރެންދު މޯޑީވަނީ އިއްޔެގެ ވަގުތެއްގައި މި ހާދިސާ ހިނގި ސަރަހައްދަށް ޒިޔާރަތް ކޮށްފައެވެ. މި ޒިޔާރަތުގައި މޯޑީ މި ހާދިސާ ސިފަ ކުރައްވާފައިވަނީ ވަރަށް "ވޭންހުރި" ހާދިސާއެއްގެ ގޮތުގައެވެ.
މޯޑީވަނީ މިހާދިސާގައި ހޮސްޕިޓަލުގައި ފަރުވާ ދެމުންދާ މީހުންނާއިވެސް ބައްދަލު ކުރައްވާފައެވެ. އެމީހުންނާ ބަދަލު ކުރައްވާ މޯޑީ ވިދާޅުވެފައިވަނީ، އަނިޔާވި މީހުންނަށް ފަރުވާ ކުރުމުގައި "ނުފޮރުޅާ އެންމެ ގާކޮޅެއްވެސް" ނުބާއްވާނެ ކަމުގައެވެ.
އިންޑިއާގެ ބަލަސޯރު ޑިސްޓްރިކްޓްގައި ގިނަ ޓްރެއިންތަކެއް މުޑި އަރައިގެން ހިނގި މި އެކްސިޑެންޓް ހިނގާން މެދުވެވިވީ ސަބަބު އަދިވެސް ދެނެގަނެވިފައެއް ނުވެއެވެ.
މި ހާދިސާއާއި ގުޅިގެން މިހާރު ޚާއްސަ ތަހުގީގެއް ލޯންޗު ކޮށްފައިވާއިރު، އިންޑިއާގެ ސައުތު އީސްޓާން ރެއިލްވޭގެ ޗީފް ޕަބްލިކް ރިލޭޝަންސް އޮފިސަރު ކޭއެސް އާނަންދު ވިދާޅުވެފައިވާ ގޮތުގައި، މިހާތަނަށް ލިބެންހުރި މައުލޫމާތުތަކުން ފާހަގަވެފައިވާ ގޮތުގައި މިހާދިސާ ހިގަން މެދުވެރިވީ ސިގަލް ފެއިލިއަރއެއްގެ ސަބަބުން ކަމުގައެވެ.
މިހާދިސާގައި ފަސެންޖަރުން އުފުލާ ދެ ރޭލެއް ހިމެނޭއިރު، އެކްސިޑެންޓް ހިނގިއިރު މި ދެ ރޭލުގައި 2،000 ފަސެންޖަރުން ތިބި ކަމަށް ބެލެވެއެވެ.
މި އެކްސިޑެންޓް ހިނގާފައިވަނީ ހުކުރުދުވަހު އިންޑިއާގެ ގަޑިން އިރުއޮއްސި 7 ޖަހާކަންހާއިރު އެވެ. އެކްސިޑެންޓުގައި ތިން ރޭލެއް ވަނީ މުޑި އަރާފައެވެ. އެއީ، ބެންގަލޫރުން ވެސްޓް ބެންގާލްގެ ހޯރާއަށް ދަތުރު ކުރަމުންދިޔަ ހޯރާ ސުޕަރފާސްޓް އެކްސްޕްރެސްއާއި، ކަލްކަތާއިން ޗެންނާއިއަށް ދަތުރު ކުރަމުންދިޔަ ކޮރޯމާންޑެލް އެކްސްޕްރެސްއާއި އާއި އަދި އޭގެ އިތުރުން މުދާ އުފުލާ ރޭލެކެވެ.
ކަލްކަތާއިން ޗެންނާއިއަށް ދަތުރު ކުރަމުންދިޔަ ކޮރޯމާންޑެލް އެކްސްޕްރެސް ރޭލު ދަތުރު ކުރަމުން އައިސްފައިވަނީ މުދާ އުފުލާ ރޭލު މަޑު ކޮށްގެން އޮތް ދަނގަޑުގައެވެ. ފަސެންޖަރުންނާއެކު ދަތުރުކުރަމުން އައި މިރޭލު މަޑުކޮށްގެން އޮތް މުދާ އުފުލާ ރޭލާއި އެއް ދަނގަޑެއްގައި ދަތުރުކުރަމުން އައި ސަަބަބު ވަނީ ސާފު ނުވެފައެވެ. މި ރޭލު މުދާ އުފުލާ ރޭލާއި މުޑި އެރުމަށްފަހު ދަގަޑުން ނައްޓައިގެން ގޮސް ޖެހިފައިވަނީ އީ، ބެންގަލޫރުން ވެސްޓް ބެންގާލްގެ ހޯރާއަށް ފަސެންޖަރުން ގޮވައިގެން ދަތުރު ކުރަމުންދިޔަ ހޯރާ ސުޕަރފާސްޓް އެކްސްޕްރެސް ރޭލުގައެވެ. އެއީ މީހުން ބަރާ ކޮށްގެން ދަތުރު ކުރަމުން ދިޔަ ރެލެވެ.
އެހެންނަމަވެސް މީހުން ގޮވައިގެން ދަތުރު ކުރަމުންދިޔަ ދެ ރޭލުގެ ތެރެއިން ފުރަތަމަ ދަގަނޑު ނައްޓައިގެން ދިޔައީ ކޮން ރޭލެއްތޯކަމާއި ގުޅޭގޮތުން އޮފިޝަލުން މިހާތަނަށް ހާމަކޮށްފައިހުރީ ފުށުއަރާ މައުލޫމާތު ތަކެވެ.
މިއީ އިންޑިއާގެ ފަހުގެ ތާރީޚެއްގައި ހިނގާފައިވާ މިފަދަ އެންމެ ނުރައްކާތެރި ހާދިސާއެވެ.
