މާލޭގައި ތޫނު ހަތިޔާރު ބޭނުންކޮށްގެން ހިންގަން އުޅުނު މާރާމާރީއެއް ހުއްޓުވައި ފުލުހުން މީހަކު ހައްޔަރުކޮށްފިއެވެ.
ފުލުހުން ބުނީ ރޭ 11:25 ހާއިރު މަޖީދީމަގު ޑައިންމޯ ކައިރީގައި މާރާމާރީ ހިންގަން އުޅުނު ބަޔަކު ހުއްޓުވާފައިވާ ކަމަށެވެ. މި މައްސަލައާ ގުޅިގެން ހައްޔަރުކޮށްފައިވަނީ 25 އަހަރުގެ ދިވެހި ފިރިހެނެކެވެ.
މާރާމާރީ ހިންގަން އުޅުނު ދެ މީހަކު ދުއްވި ސައިކަލު އެ ސަރަހައްދަށް ދޫކޮށްލުމަށްފަހު ފިލާފައިވާ ކަމަށާއި އެ ސައިކަލު ޓޯކޮށްފައިވާ ކަމަށް ފުލުހުން ބުނެއެވެ.
ފިލި މީހުން ދެނެގަނެ އެ މީހުން ހޯދުމުގެ މަސައްކަތް ކުރަމުންދާ ކަމަށް ފުލުހުން ވަނީ ބުނެފައެވެ.
މިފަހަކަށް އައިސް މާލެއާއި، އަތޮޅު ތެރޭގައި ތޫނު ހަތިޔާރު ބޭނުންކޮށްގެން މީހުންނަށް ހަމަލާދީ މާރާމާރީ ހިންގުމާއި މީހުން މެރުން ވަނީ އާންމުވެފައެވެ. މިގޮތުން މިދިޔަ ބުދަ ދުވަހުގެރޭ އައްޑޫ ސިޓީގައި ދެބެއިންގެ ދެމެދުގައި ހިނގި ހަމަނުޖެހުމެއްގައި ތޫނު ހަތިޔާރެއް ބޭނުންކޮށްގެން ހަމަލާއެއްގައި ކޮއްކޮ އަތުން ބޭބެ ވަނީ މަރުވެފައެވެ.
