ރާއްޖޭގެ ކަނޑުގެ ސަރަހައްދުން ބައެއް ވިއްކާލާފައިވާ ކަމަށް ބުނެ "ކަނޑު ވިއްކުމާ ދެކޮޅު އިއްތިހާދު"ން މިރޭ ބާއްވާ އެއްވުމަކުން ޗާގޯސްގެ މައްސަލާގައި އިޓްލޮސް އިން ނިންމާފައިވާ ނިންމުންވެސް ބަދަލެއް ނުވާނެކަމަށާއި، އަދި ރައީސުލްޖުމްހޫރިއްޔާގެ މަޤާމުން އެމަނިކުފާނު ވަކިވެސް ނުކުރެވޭނެ ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ރާއްޖޭގެ ކަނޑުގެ ސަރަހައްދުން ބައެއް ވިއްކާލާފައިވާ ކަމަށް ބުނެ "ކަނޑު ވިއްކުމާ ދެކޮޅު އިއްތިހާދު"ން މިރޭ މާލޭގައި ބާއްވާ އެއްވުމާއި ދެކޮޅުކަން ހާމަކޮށް ޤާސިމްގެ އަމިއްލަ ޗެނަލުން ގެނެސްދިން ޚާއްސަ އިންޓަރވިއު އެއްގައި ޤާސިމް ވިދާޅުވީ ޗާގޯސް މައްސަލާގައި އެންމެ ފުރަތަމަ ދެކޮޅު ހަދާ ބަޔާން ނެރުނު މީހަކީވެސް އެމަނިކުފާނު ކަމަށެވެ. އެގޮތުން މިދިޔަ އަހަރު އޮކްޓޯބަރު މަހު ބަޔާން ނެރުއްވާފައިވާނެކަމަށެވެ.

ޤާސިމް ވިދާޅުވީ މިރޭ މިބާއްވާން އުޅޭ ބައްދަލުވުމުން ހޯދޭނެ ނަތީޖާއެއް ނެތްކަމަށެވެ. އަދި ހާސިލް ކުރެވޭނެ ކަމެއްވެސް ނެތްކަމަށެވެ. މިކަނުން ފަސާދަވެސް ފިޔަވައި ވާނެ އެއްވެސް ކަމެއް ނެތްކަމަށެވެ.

އަޅުގަނޑުގެ ސުވާލަކީ މިކަމުން އިޓްލޮސްގެ ނިންމުމަށް އެއްވުމެއް ބާއްވައިގެން ކޮންމެ ވާހަކައެއް ދައްކައިގެންވެސް ހޯދޭނެ ނަތީޖާއެއް އެބައޮތްހޭ؟ އިޓްލޮސްގެ ނިންމުމަށް ބަދަލެއް ގެނެވޭނެހޭ؟ އެއްވެސް ނަތީޖާއެއް ނިކުމެދާނެހޭ؟ މިކަމުން ހޯދޭނެ އެއްވެސް ރަނގަޅު ނަތީޖާއެއް މިކަމުން ނިކުންނަ ތަނެއް ނުފެނޭ. ސިޔާސީ ގޮތުން މޮޅުތަކެއް ހޯދަން ބަޔަކު ކުރާހާ ކަމަކަށް ޖޭޕީގެ މީހުން ދާން ނުޖެހޭ.

– ޤާސިމް ވިދާޅުވިއެވެ.

ޤާސިމް ވިދާޅުވީ މިއެއްވުމުގެ މަގުސަދަކީ ރައީސް ޞާލިހު މަޤާމުން ވަކި ކުރުންކަމުގައި ވާނަމަ އެކަންވެސް ނުކުރެވޭނެކަމަށެވެ. ރައީސް ޞާލިހު މަޤާމުން ވަކި ކުރެވޭނެ ގޮތްތަކެއް އޮތްކަމަށާއި، އެނޫންގޮތަކަށް މަގުމައްޗަށް އެއްވެސް ރައީސް މަޤާމުން ވަކި ކުރެވޭނެކަމަށް ގަބޫލު ނުކުރައްވާ ކަމަށް ޤާސިމް ވިދާޅުވިއެވެ.

މިއެއްވުން ބާއްވައިގެން ރައީސުލްޖުމްހޫރިއްޔާ ދުރުކުރެވޭނެ ގޮތެއްވެސް ނެތް. ޤާނޫނު އަސާސީގައި އެބައޮތް ރައީސް ވަކިކުރެވޭނެ ގޮތެއް. މަޖިލީހަށް އެމަނިކުފާނުގެ ނޯކޮންފިޑެންސް ވޯޓެއް ނަގައި ސްޕްރީމް ކޯޓުން އެކަން ނިންމައިފިނަމަ ރައީސް މަޤާމުން ވަކިވެދާނެ.

– ޤާސިމް ވިދާޅުވިއެވެ.

ޤާސިމް ވިދާޅުވީ މިމައްސަލާގައި ނަތީޖާ ނެރެވޭނީ ބައިނަލް އަގުވާމީ ފަރާތްތަކާއި ވާހަކަ ދައްކަވައިގެން އިޓްލޮސްގެ ނިންމުން ބަދަލު ކުރެވޭނެ ގޮތްތަކެއް ހޯދައިގެން ކަމަށެވެ. މިގޮތަށް ބަޔަކު އެއްވެ އަޑުގަދަ ކޮށްގެން ކުރެވޭނެ ކަމެއް ނެތްކަމަށް ޤާސިމް ވިދާޅުވިއެވެ. ޤާސިމް ވަނީ މިރޭގެ އެއްވުމަށް ޖޭޕީގެ އެއްވެސް މެމްބަރަކު ބައިވެރި ނުވުމަށް ގޮވާލާފައެވެ. މިއީ ނަތީޖާ ނެރެވޭނެ ބައްދަލުވުމެއް ނޫންކަމަށް ތަކުރާރުކޮށް ޤާސިމް ވިދާޅުވިއެވެ.

ކަނޑުވިއްކުމާ ދެކޮޅު އިއްތިހާދުގައި ޕީޕީއެމް، ޕީއެންސީ، އެމްއެންޕީ އަދި ކުރީގެ ދެ ވަޒީރުން ކަމަށްވާ ކުރީގެ ބަންޑާރަނައިބު ޑރ. މުހައްމަދު މުނައްވަރާއި، ކުރީގެ ހޯމް މިނިސްޓަރު އުމަރު ނަސީރު ހިމެނެއެވެ. މީގެއިތުރުން މި އިއްތިހާދުގައި ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީގެ ކެންދޫ ދާއިރާގެ މަޖިލިސް މެންބަރު އަލީ ހުސައިން ވެސް ބައިވެރިވެވަޑައިގަންނަވައެވެ. ނަމަވެސް އަލީ ބައިވެރިވަނީ އަމިއްލަ ހައިސިއްޔަތުން ކަމަށް އެ ޕާޓީން ބުނެއެވެ.

މާލޭ އާޓިފިޝަލް ބީޗްގައި ބާއްވާ މި އެއްވުމުގައި، ކަނޑުގެ ސަރަހައްދު ވިއްކުމާ ދެކޮޅުކަން ހާމަކުރުމުގެ ގޮތުން ޕެޓިޝަނެއްގައި ސޮއިކުރުން ކުރިއަށް ގެންދާނެ ކަމަށް އެ އިއްތިހާދުން ބުނެއެވެ.