ތުރުކީގެ ރިޔާސީ އިންތިޚާބު އެގައުމުގެ މިހާރުގެވެސް ރައީސް ތައްޔިބު އެރެދޮގާން ކާމިޔާބު ކުރައްވައިފިއެވެ. އިދިކޮޅު 6 ޕާޓީއެއް އެކުވެގެން އުފެއްދި ކޯލިޝަންގެ ކެނޑިޑޭޓް ބަލިކޮށް، އިންތިޚާބުގެ ދެވަނަ ބުރު އެރެދޮގާން ކާމިޔާބު ކުރެއްވީ ވޯޓު ލީ މީހުންގެ 52.14 އިންސައްތަ ހޯއްދަވައިގެންނެވެ.
އެރެދޮގާންއާއި ވާދަކުރި އިނދިކޮޅު ކެނޑިޑޭޓަށް ލިބުނީ ވޯޓުގެ 47.86 އިންސައްތަ ވޯޓެވެ.
މިމަހުގެ ކުރީކޮޅު ބޭއްވުނު ތުރުކީގެ ރިޔާސީ އިންތިޚާބުގެ ފުރަތަމަ ބުރުގައި އެއްވެސް ކެނޑިޑޭޓަކަށް 50 އިންސައްތައާއި އެއްވޯޓަށްވުރެ އިތުރަށް ވޯޓު ނުހޯއްދެވުމާއި ގުޅިގެން އެގައުމުގެ ގާނޫނު އަސާސީގައި ބުނާ ގޮތުގެ މަތިން ބާއްވާ، ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވިފައިވަނީ އިއްޔެއެވެ.
މިއިންތިޚާބު އެރެދޮގާން ކާމިޔާބު ކުރުމާއެކު އޭނާއަށް އިތުރު 5 އަހަރުގެ ދައުރެއް ކަށަވަރު ވެގެންދާނެއެވެ. އެރެދޮގާން ތުރުކީގެ ވެރިކަން ކުރައްވަމުން ގެންދަވާތާ 20 އަހަރު ވަނީ ވެފައެވެ. އޭނާ އެންމެ ފުރަތަމަ އެގައުމުގެ ބޮޑުވަޒީރުކަމަށް ވަޑައިގެންނެވީ 2003 ވަނަ އަހަރުއެވެ. އެއަށްފަހު ތުރުކީގެ ރައީސްކަމަށް ވަޑައިގެންފައިވަނީ 2014 ވަނަ އަހަރުއެވެ.
ތުރުކީގެ ރައީސްކަމަށް ވަޑައިގެންނެވުމަށްފަހު އޭނާވަނީ އެގައުމުގެ ގާނޫނު އަސާސީ ބަދަލުކޮށް، އޭރު ތުރުކީގައިއޮތް ބަރުލަމާނީ ނިޒާމު ރިޔާސީ ނިޒާމަކަށް ބަދަލު ކުރައްވާ، ބޮޑުވަޒީރުގެ މަގާމް އުވާލައްވާ ރައީސަށް ބޮޑެތި ބާރުތައް ލިބޭގޮތަށް ވެރިކަމުގެ ނިޒާމު ބަދަލު ކުރައްވާފައެވެ.
އެރެދޮގާން އިތުރު ދައުރަކަށް އިންތިޚާބު ވުމާއި ގުޅިގެން، އޭނާވަނީ، ޒަމާނީ ތުރުކީގެ ބާނީ މުސްތަފާ ކަމާލް އަޓާޓުކުއަށްވުރެވެސް ދިގުމުއްތަކަށް ތުރުކީގެ ވެރިކަން ކުރައްވާފައެވެ. އަޓާޓުކު ތުރުކީގެ ވެރިކަން ކުރައްވާފައިވަނީ 15 އަހަރުގެ މުއްދަތަކަށެވެ. އެރެދޮގާންއާއި ވާދަކޮށްފައިވަނީ މީގެ 100 އަހަރު ކުރިން އުފެއްދި، މުސްތަފާ ކަމާލް އަޓާޓުގެ ޕާޓީގެ ކެނޑިޑޭޓެވެ.
އިންތިޚާބު ކާމިޔާބު ކުރެވުމާއި ގުޅިގެން އެރެދޮގާންވަނީ އިސްތަންބޫލްގައި ހުންނަ އޭނާގެ ރަސްމީ ގެކޮޅުގެ ބޭރަށް ނުކުމެވަޑައިގެން އޭނާއަށް ތާއީދުކުރާ ފަރާތްތަކަށް ޝުކުރު އަދާކޮށްފައެވެ.
"އަހަރެމެން މިވަނީ 4 ކެނޑިޑޭޓަކާއި ވާދަކޮށް އިންތިޚާބުގެ ދެވަނަ ބުރުވެސް ކާމިޔާބު ކޮށްފަ. އިރާދަކުރެއްވިއްޔާ ތިޔަ ރައްޔިތުން ތިޔަ ކުރެއްވި އިތުބާރު، ފާއިތުވި 21 އަހަރެކޭ އެއްފަދައިން ބޭކާރު ވެގެނެއް ނުދާނެ،" އެއްވެތިބި ސަޕޯޓަރުންނާއި މުޚާތަބްކޮށް ވާހަކަ ދައްކަވަމުން އެރެދޮގާން ވިދާޅުވިއެވެ.
މިއިންތިޚާބު ތުރުކީގައި ބޭއްވިގެން މިދިޔައީ ތުރުކީގެ ފަހުގެ ތާރީޚެއްގައި އެގައުމަށް އައި އެންމެ ވަރުގަދަ ބިންހެލުމުގައި، އެގައުމުގެ ދެކުނުގައި 50،000 މީހުން މަރުވެ، 5.9 މިލިއަން މީހުން ގެދޮރި ނެތިގެން ދިޔަތާ 4 މަސް ފަހުންނެވެ.
އަދި ހަމަ އެއާއެކު އެގައުމަށް އިގްތިސާދީ ގޮތުން ބޮޑެތި ގޮންޖެހުންތަކާއި ކުރިމަތިލާން ޖެހިފައިވާ ދަނޑިވަޅެއްގައިވެސް މެއެވެ. މިއިންތިޚާބު ވެފައިވަނީ 20 އަހަރަށްވުރެ ދިގު މުއްދަތަކަށް ތުރުކީގައި ވެރިކަން ކުރައްވަމުން ގެންދަވާ ތައްޔިބު އެރެދޮގާންއަށް ކުރިމަތިލައްވަން ޖެހިވަޑައިގެންނެވި އެންމެ ގޮންޖެހުން ބޮޑު އިންތިޚާބު ކަމުގައެވެ.
ތުރުކީގެ ރައީސް އެރެދޮގާން ބަލިކުރުމަށް 6 ޕާޓީއެއް އެކުވެގެން އުފައްދާފައިވާ ކޯލިޝަންއިން ދެވަނަ ބުރާއި ކުރިމަތި ލިއިރު، ފުރަތަމަ ބުރުގައި 3 ވަނަ ހޯއްދެވި ސިނާން އޯގަން އެރެދޮގާންއަށް ތާއިދު ކުރާކަން ހާމަ ކުރުމާއި ގުޅިގެން، ދެވަނަ ބުރު ފަސޭހަމަކާއެކު އެރެދޮގާން ކާމިޔާބު ކުރާނެކަމަށް ކުރިންވެސް ބެލެވިފައި ވެއެވެ.
އިންތިޚާބުގެ ފުރަތަމަ ބުރުގައި 3 ވަނަ ހޯއްދެވި އޯގަން ވިދާޅުވެފައިވަނީ ދެވަނަ ބުރުގައި އޭނާ އެރެދޮގާންއަށް ތާއީދުކުރަން ނިންމީ، މި އިންތިޚާބުގައި އެރެދޮގާންގެ ޕާޓީން ޕާލަމެންޓުގެ މެޖޯރިޓީ ހޯދާފައިވާތީ ކަމުގައެވެ.
