ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަބްދުލް މުހުސިން ހަމީދު، ޖޭފޯ، ވެރިކަން ކުރާ މައި ޕާޓީ އެމްޑީޕީއަށް ސޮއިކޮށްފިއެވެ.
ޖޭފޯ މިހާތަނަށް ނިލަންދޫ ދާއިރާގެ ގޮޑި ތަމްސީލް ކުރައްވާފައިވަނީ މިނިވަން މެމްބަރެއްގެ ގޮތުގައެވެ. ޖޭފޯ އެމްޑީޕީއާއި ސޮއިކުރެއްވީ ރައީސް ޞާލިހު ފ.އަތޮޅަށް ކުރައްވާ ދަތުރުފުޅުފައި ޖޭފޯގެ އުފަންރަށް އަދި ފ.އަތޮޅުގެ ވެރިކަންކުރާ ރަށް ނިލަންދޫއަށް މިހާރު ކުރައްވާ ދަތުފުޅުގެ ތެރެއިންނެވެ.
19 ވަނަ މަޖިލީހަށް ޖޭފީ އިންތިޚާބުވީ ޕީޕީއެމްގެ ޓިކެޓްގައި ވާދަކުރެއްވި ޚަލީލް ބަލިކުރައްވާފައެވެ. ޖޭފޯ ވަނީ 17 ވަނަ މަޖިލީހުގައިވެސް ނިލަންދޫ ދާއިރާގެ ގޮޑި ފުރުއްވާފައެވެ. ޖޭފޯ އެމްޑީޕީއަށް ސޮއި ކުރުމާއިއެކު މަޖިލީހުގައި ހިމެނޭ އެމްޑީޕީ މެމްބަރުންގެ އަދަދު ވަނީ 56 އަށް އަރާފައެވެ. ނިލަންދޫ ދާއިރާގެ މެންބަރު އެމް.ޑީ.ޕީއަށް ސޮއިކުރައްވާފައިވާއިރު، އެމަނިކުފާނުގެ އާއިލާގެ ގިނަ ބަޔަކުވެސް ވަނީ އެމް.ޑީ.ޕީއާއި ގުޅިފައެވެ.
ޚިޔާލު ތަފާތުވުންތަކުގެ ތެރެއިން އެމްޑީޕީގެ 12 މެމްބަރަކު ވަނީ އެޕާޓީން ވަކިވެފައެވެ. އަދި އެބޭފުޅުން ގެންދަވަނީ ވަކި ސިޔާސީ ޕާޓީއެއް އުފެއްދުމަށް މަސައްކަތް ކުރަމުންނެވެ.
17 ވަނަ ރައްޔިތުންގެ މަޖިލީހުގައާއި، 19 ވަނަ ރައްޔިތުންގެ މަޖިލީހުގެ މެމްބަރުކަންވެސް ކުރައްވާ މެމްބަރު ޖޭފޯއަކީ ވަރަށް އާދައިގެ ދިރިއުޅުމެއް އުޅޭ މަޖިލިސް މެމްބަރުންގެ ތެރޭގައި ހިމެނޭ މެމްބަރެކެވެ. 17 ވަނަ މަޖިލިސް ނިންމާލުމަށްފަހު ޖޭފޯ ވަނީ ޔޫތު މިނިސްޓްރީގެ ނައިބުކަންވެސް ކުރައްވާފައެވެ.
މެމްބަރު ޖޭފޯ ވަނީ ދާއިރާގައި ރައްޔިތުންގެ ކަންބޮޑުވުން ގިނަ މައްސަލަތަކެއް މަޖިލީހުގެ ސަމާލުކަމަށް ގެންނަވައިފައެވެ. އަދި މަޖިލީހުގައި ވަޒީރުންނާއި ސުވާލު ކުރުމަށް ހުޅުވާލެވޭ ފުރުސަތު ތަކުގައާއި، މުހިންމު ބިލްތަކަށް މެމްބަރު ޖޭފޯ ދަނީ ބަހުސް ކުރައްވަމުންނެވެ. ޖޭފޯއަކީ މަޖިލީހަށް ބަރާބަރަށް ހާޒިރުވާ މަދު މެމްބަރުންގެ ތެރޭގައިވެސް ހިމެނޭ މެމްބަރެކެވެ.
