ރާއްޖޭގެ ދެކުނުން އައްޑޫ އަތޮޅުގެ ބޭރުން އޮންނަ ޗާގޮސްގެ މިލްކުވެރިކަން ބައިނަލްއަގުވާމީގޮތުން މޮރިޝަސްއަށް އޮތް ކަމަށް ބައިނަލްއަގުވާމީ ގޮތުން ކަނޑައެޅިގެން ދިއުމަށްފަހު، މޮރިޝަސްއާއި ރާއްޖޭގެ ކަނޑުގެ ސަރަަހައްދާއި ގުޅޭގޮތުން އިޓްލޮސްއިން އިއްވާފައިވާ ހުކުމް އިސްތިއުނާފް ކުރުމަށް ސަރުކާރަށް ގޮވާލާ ޖޭޕީގެ ކައުންސިލުން މިއަދު ގަރާރެއް ފާސްކޮށްފިއެވެ.

ޖޭޕީގެ ކައުންސިލްގައި ބައިވެރިވި 70 މެމްބަރުންގެ އިއްތިފާގުން މިއަދު ފާސްކުރި ގަރާރުގައި ބުނެފައިވަނީ، ރާއްޖޭގެ ކަނޑުގެ ސަރަހައްދުގެ ބައެއް އުނިވުމަށް އެޕާޓީން ނޭދޭތީއާއި އަދި އެ މައްސަލާގައި އިޓްލޮސްއިން ނިންމާފައިވާ ނިންމުމަކީ ޖޭޕީން ކަންބޮޑުވާކަމެއް ކަމުގައި ވާތީ، ޖޭޕީއަށް ރިޔާސީ އިންތިޚާބު ކާމިޔާބު ކުރެވިއްޖަނަމަ، ގާނޫނީ މާހިރުންގެ އެހީގައި މައްސަލަ ދިރާސާ ކުރުމަށްފަހު އެހުކުމް އިސްތިއުނާފް ކުރުމަށް އިއްތިފާގު ވާކަމުގައެވެ.

އަދި އޭގެ އިތުރުންވެސް ގަރާރުގައި ބުނެފައިވަނީ، މިމައްސަލާގައި ރައީސް ސާލިހު މޮރިޝަސްގެ ބޮޑުވަޒީރަށް ފޮނުއްވާފައިވާ ސިޓީފުޅު އާންމު ކުރެއްވުމަކީ ގައުމީ މަސްލަހަތު އެކުލެވޭ ކަމަށްވާތީ އެ ސިޓީފުޅު އާންމުކުރުމަށް ބާރުއެޅުމާއެކު މިމައްސަ އިސްތިއުނާފް ކުރުމަށް ސަރުކާރަށް ގޮވާލާ ކަމުގައެވެ.

މިމައްސަލާގައި ރާއްޖޭގެ ރައީސުލްޖުމުހޫރިއްޔާ މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު އާންމު ކުރެއްވުމަކީ ގައުމީ މަސްލަހަތު އެކަމުގައި ވަރަށްބޮޑަށް އެކަމުގައި އެކުލެވޭކަމަށް ދެކޭތީ އެ ސިޓީފުޅު ހާމަކުރުމަށް ބާރުއެޅުމާއެކު، ހުކުމް އިސްތިއުނާފް ކުރުމުގެ ފުރުސަތު އޮތްކަމަށް ރާއްޖޭގެ ބައެއް ގާނޫނީ ބޭފުޅުން ވިދާޅުވަމުން ގެންދަވާތީ ލަސްނުކޮށް އެހުކުމް އިސްތިއުނާފް ކުރުމަށް ކުރަންޖެހޭ އެންމެހާ ކަންކަން ކުރުމަށާއި، އަދި ވީހާވެސް އަވަހަކަށް އެހުކުމް އިސްތިއުނާފް ކުރުމަށް ދިވެހި ސަރުކާރަށް އިލްތިމާސްކޮށް މި ގަރާރު ހުށަހަޅަމެވެ.

ޖުމުހޫރީ ޕާޓީގެ މަޖިލިސް މެމްބަރު އަލީ ހުސެއިން ޖޭޕީގެ ކައުންސިލަށް ހުށަހެޅުއްވި ގަރާރުގައި ސަރުކާރަށް ގޮވާލާފައިވެއެވެ.

މި ގަރާރާއި ގުޅޭގޮތުން ޖޭޕީގެ ކައުންސިލްގެ ބައްދަލުވުމުގައި ބައެއް މެމްބަރުންވަނީ ފުޅާ ދާއިރާއެގައި ބަހުސްކޮށްފައެވެ. މި ބަހުސްގައި ކައުންސިލްގެ ހުރިހާ މެމްބަރުންވެސް ވަނީ ރާއްޖޭގެ ކަނޑުން ބައެއް ގެއްލިގެން ގޮސްފައިވާކަމަށް ވިދާޅުވެ، އެކަމުގައި ސަރުކާރުގެ އިހުމާލު އޮތްކަމަށް ވިދާޅުވެފައެވެ. އަދި ބަހުސްގައި ބައިވެރިވި ހުރިހާ މެމްބަރުންވެސް ވަނީ ތާރީޚީގޮތުން ޗާގޮސްގެ މިލްކުވެރިކަމަށް ރާއްޖެއަށް ދައުވާކުރެވޭނެކަމަށްވެސް ވިދާޅުވެފައެވެ.

މިއަދުގެ ގަރާގާއި ގުޅޭގޮތުން ވާހަކަ ދައްކަވަމުން ޖޭޕީގެ ލީޑަރު ގާސިމް އިބުރާހިމްވެސް އަދި ގަރާރާއި ގުޅޭގޮތުން ވާހަކަދެއްކެވި މެމްބަރުންވެސް ބާރު އަޅުއްވާފައިވަނީ މިމައްސަލާގައި ގައުމުގެ މަސްލަހަތު ނުގެއްލޭ ގޮތެއްގެ މަތިން، ގެއްލިގެން ގޮސްފައިވާކަމަށް ބުނާ ސަރަހައްދު އަލުން އަބުރާ ހޯދުމަށް ކުރެވެން ހުރި ގާނޫނީ މަސައްކަތް ކުރުމަށެވެ.