މަޝްހޫރު މޮޑެލް ފާތިމަތު ޒަޔާން އިބްރާހިމް (ކައިޒީން) އޭނާގެ ބައްޕައާ ދެކޮޅަށް ބޯޓެއްގެ މައްސަލާގައި ކުރާ ދައުވާގެ ޝަރީއަތް މަޑުޖައްސާލަން ހައި ކޯޓުން މިއަދު އަމުރުކޮށްފިއެވެ.
ކައިޒީން ދައުވާކުރީ އޭނާ 3.6 މިލިއަން ރުފިޔާ ދީގެން ބައްޕަ ލައްވައި ބޯޓެއް ގަތުމުން އެ ބޯޓު އޭނާގެ ރުހުން ނެތި ބައްޕަގެ ނަމަށް ރަޖިސްޓްރީކުރި ކަމަށް ބުނެ އެވެ. ކައިޒީން ދައުވާކުރީ އެ ބޯޓު އޭނާގެ ނަމަށް ބަދަލު ކުރުމަށެވެ.
އެ މައްސަލާގައި މަދަނީ އިޖްރައާތުގެ ގާނޫނުގައި ބުނާގޮތަށް ޖަވާބު ހުށަހަޅާފައި ނުވާތީ ބައްޕަގެ ޣައިރު ހާޒިރުގައި ހުކުމްކޮށްދޭން ކައިޒީންގެ ފަރާތުން ސިވިލް ކޯޓުގައި އެދުމުން އެ ކޯޓުން މިދިޔަ ފެބްރުއަރީ މަހު ނިންމީ އެގޮތަށް ހުކުމް ނުކުރެވޭނެ ކަމަށެވެ. އެ ނިންމުން ކައިޒީންގެ ފަރާތުން އިސްތިއުނާ ކުރުމަށް ފަހު، އެ މައްސަލަ ހައި ކޯޓުން ނިމެންދެން ސިވިލް ކޯޓުގެ ޝަރީއަތް މަޑުޖައްސާލުމުގެ އަމުރަކަށް އެދުނެވެ.
ހައި ކޯޓުން މިއަދު ނެރުނު އަމުރުގައިވަނީ ޣައިރު ހާޒިރުގައި ހުކުމް ކުރުމާ މެދު އެ ކޯޓުން ގޮތެއް ނިންމުމުގެ ކުރިން ސިވިލް ކޯޓުގެ އަޑުއެހުންތައް ކުރިއަށް ގެންގޮސްފި ނަމަ އެ މައްސަލައިގެ ބޭނުން ކެނޑިގެން ހިނގައިދާނެ ކަމަށެވެ. އެހެންވެ، ސިވިލް ކޯޓުގެ ޝަރީއަތް މަޑުޖައްސާލަން އެންގީ ކަމަށް އަމުރުގައިވެއެވެ.
ހައި ކޯޓުން އެ މައްސަލަ ބައްލަވަނީ ފަނޑިޔާރު ދީބާނާޒް ފަހުމީ އާއި ފަނޑިޔާރު މުހައްމަދު ފައިސަލްގެ އިތުރުން ފަނޑިޔާރު މުހައްމަދު ސަލީމެވެ.
މޮޑެލް ކުރުމަކީ ރާއްޖޭގައި މާބޮޑު އާމްދަނީއެއް ލިބޭ ކަމެއް ނޫން ނަމަވެސް ކައިޒީން އަކީ "މުއްސަނދި ދިރިއުޅުމެއް" އުޅެމުން އަންނަ މީހެކެވެ. އޭނާގެ މީސް މީޑިއާ އެކައުންޓްތަކުގައި ކުރާ ޕޯސްޓްތަކަށް ބަލާއިރު އޭނާގެ އުފަންދުވަސް ފާހަގަ ކުރަން ވެސް ރާއްޖެއިން ބޭރުގައި ހަފްލާތައް ބާއްވައެވެ. ނަމަވެސް އޭނާގެ ވިޔަފާރީގެ ތަފްސީލްތަކެއް މީޑިއާއަށް ހާމަވެފައެއް ނުވެއެވެ.
