ހުޅުމާލޭގައި މިރޭ ބާއްވާ "ފުރަވީރުން" އިވެންޓެއްގައި ހަވާ އަރުވާނީ ފަސް މިނިޓަށް ކަމަށް އެމްއެންޑީއެފުން ބުނެފި އެވެ.
އެމްއެންޑީއެފްއިން ހާމަކޮށްފައިވާ ގޮތުގައި "ފުރަވީރުން" ގެ ނަމުގައި ބާއްވާ އިވެންޓާއި ގުޅިގެން ހަވާ އެރުވުމަށް ހަމަޖެހިފައިވަނީ މިރޭ 11:00 ގައި ކަމަށެވެ. އެ އިވެންޓް އޮންނާނީ، ހުޅުމާލެ ސެންޓްރަލް ޕާކް ސަރަޙައްދުގަ އެވެ.
"ފުރަވީރުން" ގެ ނަމުގައި މިރޭ ބާއްވާ އިވެންޓް ސޯޝަލް މީޑިއާގައި ޕްރޮމޯޓްކުރާތާ ދުވަސްކޮޅެއްވެފައިވާ އިރު، މި އިވެންޓް މިރޭ ފަށާނީ 9:00 ގަ އެވެ.
މި އިވެންޓާ ގުޅުވައި ސޯޝަލް މީޑިއާ މެދުވެރިކޮށް 5،000ރ. ގެ ފައިސާގެ އިނާމަކާ އެކު ހާއްސަ ޗެލެންޖަކަށް ވެސް ދޫކޮށްލި އެވެ. އެއީ "ފުރަވީރުން" ގެ ލޯގޯގައި ފެންނަ އަތަކީ ކާކުގެ އަތެއްކަން ދިމާކުރުމެވެ. އެގޮތުން ޖަވާބު ދިމާކޮށްގެން އިނާމު ލިބޭ ނަސީބުވެރިޔާ މިރޭ އިއުލާންކުރާނެ އެވެ.
"ފުރަވީރުން" ގައި ތަފާތު ހަރަކާތްތައް ކުރިއަށް ގެންދާނެ އެވެ. އޭގެ ތެރޭގައި ރާއްޖޭގެ ފުޓުބޯޅަ ފްރީސްޓައިލް ކިންގް ސައިފް ޒާހިރު (ސުޕަމޭން)ގެ ފުޓުބޯޅައިގެ ޗަރުކޭހަކާއި ބޮޑުބެރާއި ލައިވް މިއުޒިކާއި އަލިފާނުގެ ހުނަރު ދައްކާލަދޭ "ފަޔާ ޑާންސް" އާއި ސްޓޭޖް ޝޯއެއް ވެސް ހިމެނެ އެވެ.
