ރައްޔިތުންގެ މަޖިލީހުގެ ރިޔާސަތުގައި ތިބެންޖެހޭނީ ރަން ރީނދޫ އެމްޑީޕީ މެމްބަރުން ކަމުގައި ރައްޔިތުންގެ މަޖިލީހުގެ ދުވާފަރު ދާއިރާގެ މެމްބަރު އިސްމާއިލް އަހުމަދު ވިދާޅުވެއްޖެއެވެ.

އޭނާ މިހެން ވިދާޅުވީ މަޖިލީހުގެ ނައިބް ރައީސް ކަމުގެ މަޤާމުން އީވާ ވަކި ކުރުމަށް މަޖިލީހަށް މައްސަލަ ހުށަހަޅާފައި ވަނިކޮށެވެ. ރައްޔިތުންގެ މަޖިލީހުގެ ރިޔާސަތު ބަލަހައްޓަވަނީ އެމްޑީޕީއަށް ނިސްބަތްވާ ތިން މެމްބަރުންނެވެ. އެމްޑީޕީގެ ލީޑަރޝިޕްގައި އުފެދުނު ޚިޔާލުތަފާތުވުންތަކާއެކު މަޖިލީހުގެ ރިޔާސަތު ބަލަހައްޓަވާ ތިން ބޭފުޅުންނަކީވެސް އެމްޑީޕީއާ ދެކޮޅަށް މަސައްކަތް ކުރައްވާ ތިން ބޭފުޅުންނެވެ. މިޚިޔާލު ތަފާތުވުންތަކުގެ ތެރެއިން މަޖިލީހުގެ ނާއިބް ރައީސް އީވާ އާއި، ވިލުފުށި ދާއިރާގެ މެމްބަރު ޙަސަން އަފީފް ވަނީ އެމްޑީޕީން ވަކިވެފައެވެ.

މެމްބަރު އިސްމާއިލް ވިދާޅުވީ މަޖިލީހުގެ ރިޔާސަތު ބަލަހައްޓަން ޖެހޭނީ އެމްޑީޕީގެ ރަން ރީދޫ މެމްބަރުން ކަމަށެވެ. މަޖިލީހުގެ ރިޔާސަތުގައި އެމްޑީޕީ ނޫން މެމްބަރެއްގެ ގޮތުގައި އިނުމަކީ ވާނެ ކަމެއް ނޫންކަމަށާއި، އެޖާގަ އެމްޑީޕީން ނުދޭނެކަމަށް އިސްމާއިލް ވިދާޅުވިއެވެ. އަދި ރިޔާސަތުގައި އިންނަ މީހަކު އެމްޑީޕީ ދޫކޮށް ދާނަމަ ޖެހޭނީ މަޤާމުންވެސް އިސްތިއުފާ ދޭންކަމަށް އިސްމާއިލް ވިދާޅުވިއެވެ.

މަޖިލީސް ރައީސް އަދި ނައިބު ރައީސް މަގާމުގައި ތިބެންޖެހޭނީ ރަން ރީނދޫ އެމްޑީޕީގެ މެމްބަރުން! އެމްޑީޕީ ދޫކޮށް ދާމީހާ ޖެހޭނީ ރީތިގޮތުގައި އެމަގާމު ދޫކޮށްލަން! އެހެނެނޫނީ ޖެހޭނީ ބޭރު ކުރަން!

– އިސްމާއިލް ވިދާޅުވިއެވެ.

ރައްޔިތުންގެ މަޖިލިހުގެ ގަވާއިދުގައިވާ ގޮތުން މަޖިލިހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާ އަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރުމުންނެވެ. މަޖިލީހުގެ މެމްބަރުންގެ އަދަދަކީ 87 ކަމަށް ވާއިރު، ހުރިހާ މެމްބަރުން ހާޒިރުވެ ވޯޓުގައި ބައިވެރިވެއްޖެ ނަމަ އީވާ މަގާމުން ދުރުކުރަން 44 ވޯޓު ބޭނުންވާނެއެވެ.

މަޖިލީހުގެ ނާއިބް ރައީސްގެ އިތުބާރު ނެތްކަމަށް އެމްޑީޕީގެ ޕީޖީ ގްރޫޕުން ހުށަހަޅުއްވާފައިވާއިރު، ޗާގޯސް މައްސަލާގައި ބަންޑާރަ ނާއިބް އިބްރާހީމް ރިފްޢަތާއި، ޚާރިޖީ ވަޒީރު ޝާހިދުގެ އިތުބާރު ނެތްކަމުގެ މައްސަލައެއް މަޖިލީހުގައި ހިމެނޭ އިދިކޮޅު މެމްބަރުން ވަނީ މަޖިލީހަށް ވައްދާފައެވެ.