ސްޕެނިޝް ލީގުގައި ރޭ ކުޅުނު މެޗުގައި ރެލިގޭޝަނުން ސަލާމަތްވާން މަސައްކަތް ކުރަމުން އަންނަ ރެއާލް ވަޔޮޑޮލިޑް އިން 3-1 އިން ލީގު ޗެމްޕިއަންކަން ކަށަވަރުކޮށްފައިވާ ބާސެލޯނާ ބަލިކޮށްފިއެވެ.
މެޗުގައި ބާސާގެ ހަމައެކަނި ލަނޑު ލެވަންޑޯސްކީ ޖެހީ ވަޔޮޑޮލިޑުން ތިން ލަނޑު ޖެހިފަހުންނެވެ. ވަޔޮޑޮލިޑަށް ލީޑް ލިބުނީ ދެވަނަ މިނިޓްގައި ކްރިސްޓެންސަން އަތުން ބައިކޮޅަށް ވަން ގޯލަކުންނެވެ. ދެވަނަ ގޯލް ޕެނަލްޓީއަކުން ޖެހީ ލަރީންއެވެ. އަދި ދެވަނަ ހާފްގައި ތިންވަނަ ގޯލް ޖެހީ ޕްލާޓާއެވެ. ލީގު ޗެމްޕިއަންކަން ކަށަވަރުވުމަށްފަހު ކުޅުނު ފުރަތަމަ މެޗުގައި ބާސެލޯނާ ވަނީ ރެއާލް ސޮސިއެޑާޑް އަތުން 2-1 ން ބަލިވެފައެވެ. ލީގު ތަށި އުފުލާލީ އެމެޗަށްފަހުއެވެ.
ބާސެލޯނާ ބަލިކުރި ރެއާލް ވަޔޮޑޮލިޑަކީ މެޗަށް ނިކުއިންއިރު ރެލިގޭޝަންގައި އޮތް ޓީމެކެވެ. އެކަމަކު ބާސާ އަތުން ހޯދި ތިން ޕޮއިންޓާއެކު މިހާރު އޮތީ ތިން ޕޮއިންޓްގެ ލީޑަކާއެކު އެޒޯނުން ބޭރުގައެވެ. މިއީ ބްރެއިލްއާއި ރެއާލްގެ ކުރީގެ ތަރި ރޮނަލްޑޯގެ ކްލަބެވެ.
ސްޕެނިޝް ލީގުގައި ރޭގެ މެޗުތައް ފެށުމުގެ ކުރިން ވަނީ ނަަސްލީ ތަފާތު ކުރުމާ ދެކޮޅަށް ކުރާ މަސައްކަތަށް ބާރުއެޅުމުގެ ގޮތުން ދެ ޓީމުން އެއްވެ، ބެނާއެއްގައި ޖަހާފައިވާ މެސެޖެއް ދައްކާލައިފައެވެ. ނަސްލީ ތަފާތު ކުރުމުގެ މައްސަލަ ހޫނުވެފައި މި ވަނީ ރެއާލް މެޑްރިޑްގެ ބްރެޒިލް ފޯވާޑް، ވިނީޝިއުސް ޖޫނިއާއާ ނަސްލީ ގޮތުން ވެލެންސިއާ ދަނޑުގައި ތިބި ގިނަ ސަޕޯޓަރުންތަކެއް ދިމާކޮށްލާފައިވާއިރު، އެ އަށް މީޑިއާގެ ޕްރެޝަރު ވެސް ބޮޑުވެފައިވާތީއެވެ.