ކުރިޔަށް އޮތް ރިޔާސީ އިންތިޚާބަށް އެކި ޕާޓީތަކުން ވާދަކުރާނޭ ކެނޑިޑޭޓުން އިއުލާންކޮށް، އެކި ޕާޓީތަކުން އެކި ތައްޔާރީތައް ވަމުންދާއިރު، އަބަދުވެސް ގިނަ ބައެއްގެ ޝައުގުވެރިކަން ހުއްޓިފައި އޮންނަނީ ރިޔާސީ އިންތިޚާބަށް އަމާޒުކޮށް އެކުލަވާލާ ކޯލިޝަންތަކަށެވެ. ސަބަބުތަކެއް ނެތިއެއް ނޫނެވެ.

ދިވެހިރާއްޖޭގެ ޑިމޮކްރަސީގެ ކުރި ހަޔާތުގައި ކުރަމުންދާ މި ދަތުރުގައި، ފާއިތުވެދިޔަ ކުރު މާޒީގައި ބޭއްވިފައިފާ ހުރިހާ އިންތިޚާބުތަކެއްވެސް ނިމިގެން ގޮސްފައިވަނީ ގިނަ ޕާޓީތައް އެކުލެވިގެން ހެދި ކޯލިޝަންތަކުން ކާމިޔާބު ކޮށްގެންނެވެ.

2008 ވަނަ އަހަރު ރައީސް ނަޝީދު އިންތިޚާބު ކާމިޔާބު ކުރެއްވި ހިސާބުން ފެށިގެން، ޖެހިގެން އައި 2023ގެ ރިޔާސީ އިންތިޚާބުގެ އިތުރުން އޭގެ ފަހުން އައި 2018ވަނަ އަހަރުގެ ރިޔާސީ އިންތިޚާބު ރައީސް ސާލިހު ކާމިޔާބު ކުރެއްވި ހިސާބަށް ބަލާލުމުންވެސް މިހަގީގަތް އަބަދުވެސް ފެންނަމުން އައިސްފައިވަނީ ހަމަ މި ބީދައިންނެވެ.

އެހެންކަމުން، ކުރިޔަށް އޮތް، 2023 ވަނަ އަހަރުގެ ރިޔާސީ އިންތިޚާބު ކާމިޔާބު ކުރެއްވޭނެކަމަށް އިއްޔެވެސް މިއަދުވެސް ގިނަ ބަޔަކު ގަބޫލުކުރަމުން އައިސްފައިވަނީ ފުޅާ ކޯލިޝަނެއް އެކުލަވާލޭވޭ ރިޔާސީ ކެނޑިޑޭޓަކަށެވެ. ގިނަ ޕާޓީތަކުން އެކުލަވާލާ ކޯލިޝަނަކަށް މެނުވީ ރިޔާސީ އިންތިޚާބު ކާމިޔާބު ނުކުރެވޭނެކަމަށް ވިދާޅުވެ، އެ ސިޔާސަތު ފާއިތުވެދިޔަ އެމްޑީޕީގެ ރިޔާސީ ޕްރައިމަރީގައި ރައީސް ސާލިހު ވިއްކަވާފައިވަނީވެސް މި ހަގީގަތުގެ މައްޗަށް ބިނާކޮށް ކަމުގައިވެސް ދަންނަވާން ޖެހެއެވެ.

އެހެންކަމުން، ކުރިޔަށް އޮތް ރިޔާސީ އިންތިޚާބަށް އަމާޒުކޮށް ކޯލިޝަންތައް އެކުލަވާލުމަށް ވެރިކަންކުރާ އެމްޑީޕީގެ އިތުރުން އިދިކޮޅު ޕީޕީއެމްއާއި އަދި އެނޫންވެސް ފަރާތްތަކުން މިހާތަނަށް ވަނީ ތަފާތު މަސައްކަތްތައްކޮށް، ތަފާތު ފޯމިއުލާތައް ޖައްސަވާފައި ވެއެވެ.

އޭގެ ތެރޭގައި މިއަދު އެންމެ ޚާއްސަ ގޮތެއްގައި ފަހަގަވާން އޮތީ އެމްޑީޕީއާއި ޚިޔާލު ތަފާތުވެ، އެޕާޓީގެ އެތެރޭގައި ވަކި ސިޔާސީ ހަރަކާތެއްގެ ގޮތުގައި މަސައްކަތް ކުރާން ފެއްޓެވި ރައީސް ނަޝީދުގެ ފިކުރެއްގެ ދިރުމުން ޖުމުހޫރީ ޕާޓީއާއެކީ އެކުލަވާލި ކޯލިޝަންއެވެ.

އުމުރު ކުރު ކޯލިޝަނެއްގެ ގޮތުގައި ފާހަގަވެގެންދިޔަ މި ކޯލިޝަންގެ ފަރާތުން ކޮމިޓީ ބައްދަލުވުންތައް ބައްވާ، ލީޑަރުން ސަން އައިލޭންޑުގައި ބައްދަލުވެ ސައްލާކޮށް، އަދި މެނިފެސްޓޯ އެކުލަވާލުމުގެ މަޝްވަރާތައްވެސް ކުރިޔަށް ގެންދިއުމަށްފަހު، ކުއްލި ގޮތަކަށް އަމިއްލަފުޅު އުފަން ދުވަހާއި ދިމާކޮށް ނަޝީދު އާ ޕާޓީއެއް އުފައްދަވަން އިއުލާން ކުރެއްވި ހިސާބުން މިކޯލިޝަންގެ އުމުރު ހުސްވެ، އެކީ ނެތިގެން ދިޔައީއެވެ.

އެހެންނަމަވެސް، ގާސިމް އިބުރާހިމްއާއެކު ކޯލިޝަން ހެއްދެވުމުގެ ނަމުގައި ނަޝީދު ކުރެއްވި މަސައްކަތްތަކާއި ގުޅޭގޮތުން މިއަދު ގިނަ ބަޔަކުދަނީ ސުވާލު އުފައްދަމުންނެވެ. އެއީ އިޚްލާސްތެރިކަމެއް އޮވެގެން، ގާސިމް އިބުރާހިމްގެ ކެނޑިޑަސީއަށް ރުހި ގަބޫލުވެ، ކުރިޔަށް އޮތް ރިޔާސީ އިންތިޚާބަށް އަމާޒުކޮށްގެން ނަޝީދު ކުރެއްވި ސިޔާސީ މަސައްކަތެއް ތޯއެވެ.

ނުވަތަ ހީލަތްތެރި ރޭވުމެއްގެ ދަށުން، ގާސިމް އިބުރާހިމް ރިޔާސީ ރޭހަށް ނެރުއްވައި، ރައީސް ސާލިހާ ގާސިމްއާ ދެބޭފުޅުންނަށް އިންތިޚާބުގެ ފުރަތަމަ ބުރުގައި އެއް ޕްލެޓްފޯމެއްގައި މަސައްކަތް ކުރުމުގެ މަގު އެކީ ބަންދުކުރުމަށް ރޭއްވެވި "ރޮކެޓެއްތޯ" މިއީ މިއަދު ހަގީގަތުގައިވެސް ގިނަ ބައެއްގެ ހިތުގައި އުފެދިފައިވާ ސުވާލެކެވެ.

ގާސިމް ރިޔާސީ ރޭހަށް ނިކުންނެވުމަށް އެންމެ ބޮޑަށް ހިތްވަރު ދެއްވީ ނަޝީދު!

ކުރިޔަށް އޮތް ރިޔާސީ އިންތިޚާބުގައި ވާދަ ކުރައްވާނޭކަން ގާސިމް އިބުރާހިމް އިއުލާން ކުރައްވާފައިވަނީ، ރައިސް ސާލިހުއާއި ރައީސް އޮފީހުގައި ބައްދަލު ކުރެއްވުމަށްފަހު، ޖެހިގެން އައި ހަފްތާގައެވެ. އެހެންނަމަވެސް އެހާތަނާއި ހަމައަށްވެސް ގިނަ ބަޔަކު ގަބޫލު ކުރަމުން އައީ ޖުމުހޫރީ ޕާޓީ ކުރިޔަށް އޮތް ރިޔާސީ އިންތިޚާބުގައިވެސް ދެމި އޮންނާނި މިހާރުވެސް އެޕާޓީ އޮތް މަގާމުގައި، ރައީސް ސާލިހުގެ ކޯލިޝަންގައި ހިމެނޭ އެންމެ ބޮޑު އެއްޕާޓީގެ ގޮތުގައި ކަމުގައެވެ.

އޭގެ އެންމެ ބޮޑު އެއް ސަބަބަކީ ގާސިމް އިބުރާހިމް އަނބިކަބަލުން އަދި ޖޭޕީގެ އެއް ޑެޕިއުޓީ ލީޑަރުގެ މަގާމުން ހުންނެވި، މި ސަރުކާރުގެ ޓްރާންސްޕޯޓު މިނިސްޓަރު އައިޝަތު ނަހުލާގެ އިތުރުންވެސް ޖޭޕީގެ ސްލޮޓްގައި ތިއްބެވި ގިނަ ވަޒީރުންތަކެއް ރައީސް ސާލިހުގެ ކެބިނެޓްގައި ދެމިތިއްބަވަމުން ގެންދަވާތީވެސް މެއެވެ.

ހަމައެއާއެކު، ފާއިތުވެދިޔަ އެމްޑީޕީގެ ރިޔާސީ ޕްރައިމަރީގައި ފުޅާ ކޯލިޝަނެއްގެ ތެރެއިން ރިޔާސީ އިންތިޚާބުގައި ވާދަ ކުރައްވާނޭކަމަށް ވިދާޅުވެ، ރައީސް ސާލިހު ކެމްޕޭން ކުރައްވާފައިވަނީވެސް މި އުއްމީދުގައި ކަމަށްވެސް ގަބޫލުކުރެއެވެ.

އެހެންނަމަވެސް، އެމްޑީޕީގެ ރިޔާސީ ޕްރައިމަރީން ބަލިވެ، ޕާޓީގެ އެތެރޭގައި ނަޝީދަށް އޮތް ތާއީދު ގެއްލި، ހުރިހާ ބާރުތަކެއް މުށުން ދޫވެ ދިޔަ ހިސާބުން، ދެން ފެންނާން ފެށީ ނަޝީދުގެ އިތުރުން ނަޝީދަށް ތާއީދުކުރާ ފަރާތްތަކުން ވަނީ ގާސިމް އިބުރާހިމް ޕްރޮމޯޓު ކުރާންފެށި މަންޒަރެވެ. ކުރިޔަށް އޮތް އިންތިޚާބުގައި ޖޭޕީގެ ރިޔާސީ ކެނޑިޑޭޓަށް ތާއީދުކުރާނޭކަން އަމަލާއިބަހުން ސާބިތު ކޮށްދެމުންނެވެ.

އަދި އެއަށްވުރެވެސް ދުރަށް ދަތުރުކޮށް، ކޯލިޝަންގެ ދައުވަތު ގާސިމް އިބުރާހިމްއަށް ދީ، ކޮމީޓީތައް އެކުލަވާލާ، ކޯލިޝަންގެ މަޝްވަރާތަަކަށް ނަޝީދުގެ އަރިސް ބޭފުޅުން ކުނޫޒަށްވެސް ވަޑައިގަންނަވާން ފެއްޓެވީއެވެ. ނަޝީދު އަމިއްލަފުޅަށް ސަން އައިލޭންޑަށް ވަޑައިގެން ގާސިމް އިބުރާހިމްއާއެކު ފޮޓޯ ނަންގަވާ، ސޯޝަލް މީޑިއާގައި ނަޝީދުގެ ސަޕޯޓަރުން ކޮޅު ނެތްކޮޅަށް ގާސިމް އިބުރާހިމަށް ސަނާ ކިޔުއްވަންވެސް ފެއްޓެވީއެވެ.

އޭގެ އާޚިރު ނަތީޖާއަކަށް ވެގެންދިޔައީ ކޯލިޝަން ކެނޑިޑޭޓެއްގެ ގޮތުގައި، ނަޝީދުގެ ތާއީދާއެކީ ރިޔާސީ އިންތިޚާބަށް ނިކުންނެވުމަށް ގާސިމް އިބުރާހިމް ފުރިހަމަޔަށް ކަމަރު ބަންނަވާ، އެމަގުން ޖުމުހޫރީ ޕާޓީން ކެންޕޭންވެސް ކުރާން ފަށާފައި ވެއެވެ.

އެހެންނަމަވެސް، ޖުމުހޫރީ ޕާޓީއާއި ފިކުރެއްގެ ދިރުމުގެ ކޯލިޝަންގެ އޮޑިއަށް ރަގަޅަށް ކަނޑަށް ނިކުމެވުނު ހިސާބުން ފެނިގެން ދިޔައީ ކުއްލިއަކަށް މަންޒަރު ބަދަލުވެ، ނަޝީދު އޮޑިން ފުންމަވާލައްވާ، އަމިއްލަފުޅު ކެނޑިޑަސީ އިއުލާން ކުރެއްވި މަންޒަރެވެ.

ވީހާލެއްގައި ޖުމުހޫރީ ޕާޓީ ވާން ދޫކޮށްލުމަށްފަހު ނަޝީދު އާ ޕާޓީއެއް ހައްދަވާނެކަން އިއުލާން ކުރެއްވީއެވެ. އަދި އެޕާޓީން ރިޔާސީ ކެނޑިޑޭޓަކު ނެރޭނެކަން އިއުލާންކޮށް، ގާސިމް އިބުރާހީމަށް އެތައް ހުވަފެނެއް ދެއްކެވުމަށްފަހު، ރައީސް ސާލިހާއި އެއް ޕްލެޓްފޯމެއްގައި ގާސިމް އިބުރާހިމް ރިޔާސީ އިންތުޚާބުގެ ފުރަތަމަ ބުރުގައި ދެން މަސައްކަތް ނުކުރައްވާނޭކަން ޔަގީންވުމުން، އަމިއްލަފުޅު ރިޔާސީ ކެމްޕޭނާއި ނަޝީދު އުދުއްސައިގަތީއެވެ.

ނަޝީދު ގާސިމަށް ދެއްވީ ކޮޅުކެއްސެއް؟

އަމިއްލަފުޅަށްވެސް ނަޝީދު އެތައް ފަހަރެއްގެމަތިން ވިދާޅުވެފައިވަނީ ކުރިޔަށް އޮތް ރިޔާސީ އިންތިޚާބުގެ އެންމެ ބޮޑު އަމާޒަކީ ރައީސް ސާލިހު ބަލި ކުރެއްވުން ކަމުގައެވެ. ހުރިހާ ހިސާބެއްވެސް ޖައްސަވާފައިވަނީ ރައީސް ސާލިހަށް އިންތިޚާބު ކާމިޔާބު ކުރެއްވޭނެ މަގުންނެވެ.

އެގޮތުން ފާއިތުވެދިޔަ ދެތިން މަހެއްހާ ދުވަހުގެ ތެރޭގައި ނަޝީދު ކުރައްވާފައިވާ މަސައްކަތްތަކާއި، އެހެންޕާޓީތަކާއެކީ ކުރެއްވި މަސައްކަތްތަކުންނާއި، އަދި ނިންމެވި ނިންމެވުންތަކުން، އެކަމަށްޓަކާ ނުފޮރޮޅުއްވާ އެއްވެސް ގާކޮޅެއް ނެތްކަން ވަރަށްވެސް ސާފުކޮށް ފެންނާން އެބައޮތެވެ. ގާސިމް އިބުރާހިމްއާއެކީ ހެއްދެވި ކޯލިޝަންއަކީ، ގާސިމް "އޮންބޯޑު" ކޮށްގެން ރައީސް ސާލިހަށް ރިޔާސީ އިންތިޚާބު ކާމިޔާބު ވިޔަ ނުދިނުމަށް ޖެއްސެވި "މަޅިފައްޗެއްގެ" ގޮތުގައި މިއަދު މިއޮތީ ސާފުކޮށް ފެންނާށެވެ.

އެ މަޅިފަތީގައި ޖެހިވަޑައިގެން ގާސިމް ކަންފަތިވެގެން ދިޔައީތޯ ނުވަތޯ ނިންމަވާނީ ކިޔުންތެރީންނެވެ. މާޒީން ސާފުވާން އޮތް ހަގީގަތަކީ ނަޝީދަށް އިތުބާރު ކުރެއްވި ކޮންމެ ފަހަރަކުވެސް ނަޝީދުގެ ފަރާތުން ގާސިމަށް ކޮޅުކެހި މެނުވީ އެހެން އެއްޗެއް ލިބިގެން ގޮސްފައި ނުވާތަނެވެ. މިފަހަރުވެސް އަދި މިހާތަނަށް ފެންނާން އޮތް ހަގީގަތަކީވެސް އެއީއެވެ.