ރާއްޖޭގައި 30 އަހަރު ވެރިކަން ކުރެއްވި އަލް އުޘްތާޒު މައުމުން އަބްދުލް ޤައްޔޫމް ވަރުގެ މޮޅު، ކުޅަދާނަ ބޭފުޅެއް މިޤައުމުގަ ވެރިކަމެއް ނުކުރައްވާ ކަމުގައި ރައްޔިތުންގެ މަޖިލީހުގެ ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތަފާ ވިދާޅުވެއްޖެއެވެ.

މުސްތަފާ މިހެން ވިދާޅުވީ ރައީސް މައުމޫންގެ ވެރިކަމަށްފަހު މިހާތަނަށް އުފެދުނު ކޮންމެ ވެރިކަމެއްގައިވެސް ރައްޔިތުންގެ ކަންބޮޑުވުން އޮތް ގިނަ ކަންތައްތަކެއް އޮވެ، ވައްކަމާއި، ދަރަންޏާއި، ދައުލަތުގެ ހިންގުންވެސް ދޯދިޔާވެފައިވާތީ އަމާޒުވެފައިވާ ފާޑުކިޔުންތަކާއި ގުޅިގެން ކުރެއްވި ޓުވީޓެއްގައެވެ.

މުސްތަފާ ވިދާޅުވީ ކުރީގެ ރައީސް މައުމޫންގެ ވެރިކަމުގައި އެމަނިކުފާނު ޤައުމު ހިންގެވީ އެންމެ 4 ބިލިޔަން ރުފިޔާގެ ކުޑަ ބަޖެޓަކުން ކަމަށެވެ. ނަމަވެސް މިއަދު އެކަން އޮތީ އެހެންތޯ މުސްތަފާ ވަނީ ސުވާލު އުފައްދަވާފައެވެ. ރައީސް މައުމޫންގެ ވެރިކަމުގައި ކުޑަ ބަޖެޓަކުން ޤައުމު ހިންގަވަމުން ދިޔަ އިރުވެސް އެއްވެސް ބޮޑު ދަރަންޏެއް، އަދި ރައްޔިތުންގެ ބޮލުގައި އެޅިފައިވާ ދަރަނިވެސް އިންތިހާއަށް ކުޑަކަމަށް މުސްތަފާ ފާހަގަ ކުރެއްވިއެވެ.

އޭނާ ވިދާޅުވީ ރައީސް މައުމޫންގެ ވެރިކަމުގައި އެކި މަޤާމުތަކަށް އައްޔަން ކުރެއްވި ބޭފުޅުންނަކީވެސް ރައްޔިތުންގެ އިޚުތިރާމާއި ލޯބި ލިބުނު ވެރިން ތަކެއް ކަމަށެވެ. އޭރުގައި ހިތައް އެރި ގޮތަކަށް ވައްކަން ކުރެވޭނެ މަގު ބަންދުވެފައިވާއިރު، މިއަދު މިޤައުމުގައި ކަންކަން ހިނގާ ގޮތާއި އޭރާއި އަޅާ ކިޔާލުމުން އުޑާއި ބިމާހާވެސް ތަފާތުކަމަށް މުސްތަފާ ވަނީ ވިދާޅުވެފައެވެ.

މައުމޫން އަބްދުލް ޤައްޔޫމް ވަރުގެ މޮޅު ކުޅަދާނަ ބޭފުޅެއް މިޤައުމުގަ ވެރިކަމެއް ނުކުރޭ. 4 ބިލިޔަން ރުފިޔާއިން މުޅި ޤައުމު ހިފެހެއްޓެވި! މަޤާމުތަކަށް ލާފަ ތިއްބެވީ އެވަރުގެ މޮޅެތި ކުޅަދާނަ މީހުން! ހިތައް އެރި ވައްކަމެއް ކޮރަޕްޝަނެއް ނުހިންގޭ. ޤައުމުގެ ދަރަނި ތަކެއް ނެތް.

– ކުރީގެ މެމްބަރު މުސްތަފާ ވިދާޅުވިއެވެ.

ކުރީގެ ރައީސް މައުމޫން ވެރިކަން ކުރެއްވީ ނޫ ޤާނޫނު އަސާސީގެ ދަށުންނެވެ. ފެހި ޤާނޫނު އަސާސީ ތަސްދީގު ކުރައްވާ ރާއްޖެ މިދެކޭ ޑިމޮކްރަސީ ގެނެސްދެއްވި ވެރިއަކީ ރައީސް މައުމޫނެވެ. ފެހި ޤާނޫނު އަސާސީގެ ދަށުން ބޭއްވި މަލްޓި ޕާޓީ އިންތިޚާބުގައި ރައީސް މައުމޫންގެ ވެރިކަން ބަދަލު ކުރުމަށް ރައްޔިތުން ވަނީ ވޯޓު ދީފައެވެ. އެފަހުން އުފެދުނު ކޮންމެ ވެރިކަމެއްގައިވެސް ދައުލަތުގެ ބަޖެޓުގައި ބޮޑު ބަޖެޓެއް ދަނީ ފާސްކުރަމުންނެވެ.

އަދި ކޮރަޕްޝަނާއި، ދައުލަތުގެ ތެރޭގައި ހިންގޭ އެކި ނޭއްގާނީ ކަންކަން ވަނީ އިތުރުވެފައެވެ. ދައުލަތުގެ ތެރޭގައި ހިންގާ ވައްކަންތަކާއި، މަރުތަކާއި ބޮޑެތި ޖަރިމާތައް މިއަދު ނުބެލި ވަނީ ސިޔާސީ ކަމަކަށް ވެފައިކަމަށް ގިނަ ބޭފުޅުން ދަނީ ބުނަމުންނެވެ.