އެމްޑީޕީ ދޫކޮށް، އެމްޑީޕީގެ ތެރެއިން އުފެއްދުމަށް މަސައްކަތްކުރާ ޕާޓީއާއި ގުޅޭ އެމްޑީޕީގެ ގިނަ މެމްބަރުންނަކީ ބޭނުންވި ނާޖައިޒް ފައިދާ ނެގުމުގެ ފުރުސަތު މިސަރުކާރުން ނުދިނުމުން ވަކިވެގެންދާ މީހުންކަމަށް ސަރުކާރުގެ ތެޔޮ ކުންފުނި، ފިއުލް ސަޕްލައި މޯލްޑިވްސްގެ މެނޭޖިންގ ޑިރެކްޓަރ މުހައްމަދު ޤަސަމް ވިދާޅުވެއްޖެއެވެ.

އޭނާ މިހެން ވިދާޅުވީ އެމްޑީޕީގެ ރައީސް މުހައްމަދު ނަޝީދު އިސްކޮށް ހުންވައިގެން އުފެއްދުމަށް މަސައްކަތް ކުރައްވަމުންދާ އާ ސިޔާސީ ޕާޓީއަށް އެމްޑީޕީގެ އިސް މަޤާމުތަކުގައި ތިއްބެވި ބައެއް ބޭފުޅުންނާއި، ސަރުކާރުގެ އެކި މަޤާމުތަކުގައި ތިއްބެވި ބޭފުޅުންނާއި، މަޖިލިސް ބައެއް އެމްޑީޕީ މެމްބަރުން ދިއުމަށް އެމްޑީޕީން ވަކިވަމުންދާތީ އެކަމާއި ގުޅިގެން ކުރެއްވި ޓުވީޓެއްގައެވެ.

އެމްޑީޕީން ވަކިވާ ގިނަ މެމްބަރުން އެންމެ ބޮޑަށް ކުރާ ތުހުމަކީ އެމްޑީޕީއާއި، ރައީސް އިބްރާހިމް މުހައްމަދު ޞާލިހު ވެވަޑައިގެންނެވި ވައުދުތަކުގެ ތެރެއިން ވައްކަމާއި ދެކޮޅަށް ވީ ވައުދު ތަންފީޒު ނުވެ މިސަރުކާރުގެ ވައްކަން އިންތިހާއަށް ދިއުމުގެ ތުހުމަތެކެވެ. ޤަސަމް ވިދާޅުވީ މިސަރުކާރުގެ ބޮލުގައި ބޮޑެތި ވައްކަންތަކުގެ ތުހުމަތު އަޅުވައި ޕާޓީން ވަކިވަނީ އެންމެ މަޤުސަދެއް އޮވެގެންކަމަށެވެ.

އެގޮތުން ޕާޓީން ވަކިވާ މީހުންގެ ތެރެއިން މިތުހުމަތު ކުރާ ގިނަ މީހުންނަކީ ސަރުކާރުގެ ތެރެއިން ބޭނުންވި ނާޖައިޒް ފައިދާ ނުލިބުމުން ޕާޓީން ވަކިވަމުންދާ މެމްބަރުންކަމަށް އޭނާ ވިދާޅުވިއެވެ. އޭނާ ވިދާޅުވީ މިސަރުކާރުން އަދި ރައީސް އިބްރާހިމް މުހައްމަދު ޞާލިހު ރައްޔިތުންނަށް ކޮށްދެއްވަމުން ދަނީ އިޚުލާސްތެރި ވެރިކަމެއް ކަމަށެވެ. ރައީސް ޞާލިހުގެ ޒަޢާމަތުގައިި ރާއްޖެ ދެކެމުންދަނީ އުފާވެރި ދުވަސްތަކެއް ކަމަށް ޤަސަމް ވިދާޅުވިއެވެ.

އެމްޑީޕީ ދޫކޮށް "ފިކުރު ޕާޓީ" އަށްދާ އެންމެން ބަހަނާއަކަށް މިކިޔަނީ ސަރުކާރު ކޮރޮޕްޓު ވާހަކަ. ޕާޓީ ދޫކޮށް ދިޔަ ގިނަ މީހުންގެ ހަޤީގަތަކީ އެމީހުން ބޭނުންވި ނާޖައިޒް ފައިދާ ނެގުމުގެ ފުރުސަތު މިސަރުކާރުން ނުދިނުމުން، ބަޔަކު ކޮންމެ ފަދަ ވާހަކައެއް ދެއްކިޔަސް ހަޤީގަތަކީ ރައީސް އިބޫއަކީ ރައްޔިތުންގެ އަޑުއަހައި، ރައްޔިތުންނަށް ހެޔޮ ވެރިކަމެއް ކޮށްދެއްވާ ވެރިއެއް.

– ޤަސަމް ވިދާޅުވިއެވެ.

ޤަސަމް މިހެން ވިދާޅުވި ނަމަވެސް އެމްޑީޕީގެ ވެރިކަމެއް އޮތެ ވައްކަމާއި ދެކޮޅަށް މަސައްކަތް ކުރުމުގެ ބަދަލުގައި ހިންގެނީ ބޮޑެތި ކޮރަޕްޝަންތައް ކަމަށް އެޕާޓީން ވަކިވާ ގިނަ މެމްބަރުން ދަނީ ތުހުމަތު ކުރަމުންނެވެ. ގިނަ ވައްކަންތަކުގެ މައްސަލަތައް ނުބެލި ވައްކަންތައް ފޮރުވުމަކީ މިސަރުކާރުން އާންމު ކަމަކަށް ހަދާފައިވާކަމަށްވެސް އެބޭފުޅުން ދަނީ ތުހުމަތު ކުރަމުންނެވެ.

އެމްޑީޕީގެ ރައީސް މުހައްމަދު ނަޝީދު އިސްކޮށް ހުންވައިގެން އުފެއްދެވުމަށް މަސައްކަތް ކުރައްވާ އާސިޔާސީ ޕާޓީނަމަކާއި ކުލައެއް ކަނޑައަޅަން އާންމުންގެ ހިޔާލަށް ވަނީ ހުޅުވާލާފައެވެ. ފިކުރެއްގެ ދިރުމުގެ ފަރާތުން އުފައްދާ ޕާޓީއަށް ނަމަކާއި ލޯގޯއާއި ކުލަ ކަނޑައެޅުމަށް ޓަކައި ފުރުސަތު ހުޅުވައިލީ މާދަމާ ހެނދުނު 6:00 އާ ހަމައަށެވެ. އެ ކަމަށް ހިޔާލު ހުށަހެޅުމަށް ފުރަން ޖެހެނީ އޮންލައިން ފޯމެކެވެ.

"ފިކުރެއްގެ ދިރުން" މިއީ އެމްޑީޕީގެ ރިޔާސީ ޕްރައިމަރީގައި ނަޝީދު ބޭނުން ކުރެއްވި ޝިއާރެކެވެ. ޕްރައިމަރީގެ ނަތީޖާއާ މެދު ސުވާލު އުފައްދަވައި އެ ނަމުގައި ފުރަތަމަ އުފެއްދީ އެމްޑީޕީގެ އެތެރޭގެ ގޮތްޕެކެވެ. އެ ހަރަކާތުން އާ ޕާޓީއެއް އުފައްދާނެ ކަން އިިއުލާނު ކުރީ އެ ހަރަކާތުގައި އިސްކޮށް އުޅުއްވި، ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިވުމާ އެކު ފިކުރެއްގެ ދިރުމުގެ ދެން ތިއްބެވި ޕާލަމެންޓޭރިއަނުން އެމްޑީޕީ ވަކިވުމަށް ފަހު މިދިޔަ ބުދަ ދުވަހުއެވެ.

ފިކުރެއްގގެ ދިރުމުން އުފައްދާ ޕާޓީ މިހަފްތާގެ ތެރޭގައި ރަޖިސްޓްރީކޮށް މެމްބަރުންގެ އަދަދު ހަމަކުރުމަކީ މިކަމުގައި އިސްކޮށް ހަރަކާތްތެރިވާ ބޭފުޅުންގެ އަމާޒެވެ.