ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ ކެމްޕެއިން ރަސްމީކޮށް ފެށުމަށް ހަމަޖެހިފައިވަނީ އަންނަ މަހުގެ ފުރަތަމަ ހަފްތާގައިކަމަށް މައުލޫމާތު ލިިބިއްޖެއެވެ.
އެމްޑީޕީގެ ރިޔާސީ ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވުމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް، ރިޔާސީ ޓިކެޓް ހަވާލުކޮށްފައިވަނީ ފެބުރުއަރީ މަހުގެ ތެރޭގައެވެ. ރައީސް ޞާލިހަށް އެމްޑީޕީގެ ރިޔާސީ ޓިކެޓް ލިބިފައިވަނީ އެމްޑީޕީގެ ރިޔާސީ ކެނޑިޑޭޓް ކަނޑައެޅުމަށް ބޭއްވި ޕްރައިމަރީ އެމްޑީޕީގެ ރައީސް މުހައްމަދު ނަޝީދުގެ މައްޗަށް ކުރި ހޯއްދަވައި ގެންނެވެ.
ޕްރައިމަރީގައި ރައީސް ޞާލިޙަށް 61 އިންސައްތަ ލިބިވަޑައިގެންފައިވާއިރު، އެއީ 24572 ވޯޓެވެ. ރައީސް ނަޝީދަށް ލިބިވަޑައިގަތީ 15631 ވޯޓާއެކު %39އެވެ.
އެމްޑީޕީގެ ފަރާތުން ރައީސް ޞާލިހުގެ ކެމްޕެއިން ހަރަކާތްތައް އަތޮޅު ތެރޭގައި މިހަފްތާ ބަންދުގައި ކުރިއަށް ގެންދާއިރު، ކެމްޕެއިން ފެށުމަށްޓަކައި ރާއްޖޭގެ ހުރިހާ ރަށެއްގައި ވަނީ އެމްޑީޕީގެ ބޮޑު ދިދައެއް ނަގާފައެވެ. އެމްޑީޕީގެ ލީޑަރޝިޕްގެ އިސް ބޭފުޅަކު ވިދާޅުވީ މިދަތުރަކީ ކުރިއަށް ރިޔާސީ ކެމްޕެއިނަށް ތައްޔާރުވުމަށާއި، އެމްޑީޕީގެ މެނިފެސްޓޯއަށް ބޭނުންވާ މައުލޫމާތު އެއްކުރުމަށް ކުރިއަށް ގެންދެވޭ ހަރަކާތެއްކަމަށެވެ.
މިހަރަކާތަށްފަހު އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ޞާލިހުގެ ކެމްޕެއިން ރަސްމީކޮށް ފެށުމަށް ހަމަޖެހިފައިވަނީ އަންނަ މަހުގެ ފުރަތަމަ ހަފްތާގައިކަމަށް އޭނާ ވިދާޅުވިއެވެ. ކެމްޕެއިން ލޯންޗު ކުރުމަށް ނިންމާފައިވާ ވަކި ތަނެއް އަދި ނިންމާފައި ނުވެއެވެ. ނަމަވެސް މިހަރަކާތް ވަރަށް ބޮޑުކޮށް ބޭއްވުމަށް އެމްޑީޕީން ދަނީ މަސައްކަތް ކުރަމުންނެވެ.
އެމްޑީޕީން ރިޔާސީ އިންތިޚާބަށް ތައްޔާރުވަމުންދާއިރު، އެޕާޓީއަށް އޮތް އެންމެ ބޮޑު ގޮންޖެހުމަކީ ޕާޓީގެ ރައީސް މުހައްމަދު ނަޝީދު އެމްޑީޕީގެ ކެނޑިޑޭޓަށް ތާއީދު ނުކޮށް އެމްޑީޕީއާއި ފެޔަށްޖެހި އާ ޕާޓީއެއް އުފެއްދުމަށް ނިންމުމެވެ. ރައީސް ނަޝީދަށް ތާއީދު ކުރާ މަޖިލީހުގެ 12 މެމްބަރަކު ރައީސް ޞާލިހާއި ދެކޮޅުވެފައިވާއިރު، އާ ޕާޓީ އުފެއްދުމުގެ މަސައްކަތް އެބޭފުޅުން ދަނީ ކުރަމުންނެވެ. މައުލޫމާތު ލިބިފައިވާ ގޮތުގައި އާޕާޓީ އުފެއްދުމަށް ވާންޖެހޭ ތައްޔާރީތައް މިހާރު ވަނީ ވެފައެވެ.
އަދި ޕާޓީ މިފެށޭ ހަފްތާގައި އިލެކްޝަންގައި ރަޖިސްޓްރީކޮށް މެމްބަރުން އިތުރު ކުރުމުގެ ބޮޑު ހަރަކާތެއް ފެށުމަށް ވަނީ ނިންމާފައެވެ. ރިޔާސީ އިންތިޚާބުގައި ފިކުރެއްގެ ދިރުމުންވެސް ކެނޑިޑޭޓަކު ނެރުމަށް ވަނީ ނިންމާފައެވެ. މިއީ އެމްޑީޕީއަށް އޮތް ބޮޑު ގޮންޖެހުމެއްކަމަށް އެޕާޓީންވެސް ދެކެއެވެ.
ރިޔާސީ އިންތިޚާބުގައި ކެނޑިޑޭޓުންގެ ގޮތުގައި ވާދަކުރުމަށް ހުޅުވާލާނީ 23 ޖުލައިން 3 އޯގަސްޓުގެ ނިޔަލަށެވެ. އަދި ކެނޑިޑޭޓުންގެ ނަންތައް ތަރުތީބުކޮށް 9 އޯގަސްޓްގައި އިޢުލާންކުރާނެއެވެ. ކެންޑިޑޭޓުން ކެމްޕެއިން ކުރުމަށް 10 އޯގަސްޓުން ފެށިގެން 8 ސެޕްޓެމްބަރާ ހަމައަށް ފުރުޞަތު ދެއްވުމަށްވެސް ކޮމިޝަނުން ވަނީ ނިންމަވައިފައެވެ.
ރިޔާސީ އިންތިޚާބުގައި ވެރިކަންކުރާ މައި ޕާޓީން ވާދަކުރައްވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އިދިކޮޅު ޕީޕީއެމްއިން ވާދަކުރަން ނިންމާފައިވަނީ ކުރީގެ ރައީސް ޔާމީނެވެ. ނަމަވެސް އެމަނިކުފާނު ގެންދަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެހެންކަމުން އެމަނިކުފާނަށް އިންތިޚާބުގައި ވާދަކުރެވިދާނެކަމާމެދު ވަނީ ސުވާލެއްގެ ތެރޭގައެވެ.
ޙުކުމް އިސްތިއުނާފުކޮށްފައިވާއިރު، މަތީ ކޯޓުން މި މައްސަލާގައި ނިންމާ ގޮތަކުން ރައީސް ޔާމީނަށް ވާދަކުރުމުގެ ފުރުޞަތު ވެސް ލިބިދާނެއެވެ. އިންތިޚާބުގައި ދެން ވާދަކުރައްވާނެ ކަމަށް އިޢުލާން ކުރައްވާފައިވަނީ އެމްއެންޕީގެ ފަރާތުން އެޕާޓީގެ ރައީސް މުޙައްމަދު ނާޒިމާއި، ޖުމްހޫރީ ޕާޓީގެ ލީޑަރު ޤާސިމް އިބްރާހީމާއި، މިނިވަން ކެނޑިޑޭޓުންގެ ގޮތުގައި ޑރ.މުޙައްމަދު މުނައްވަރުގެ އިތުރުން ޢުމަރު ނަޞީރެވެ.
