ރާއްޖޭގައި ރުއްގަހަށް ޖެހޭ ބަލި އިތުރުވުމާއި، ރުކުގެ އާބާދީ ދަށްވުމުގެ ސަބަބުން ކުރުނބާ އަދި ކާށި ލިބުން ދަތިވެފައިވާތީ ރާއްޖެ ގެނައި ރުއްތަކުގެ ތެރެއިން ނ އަދި ރ އަތޮޅުގެ ރަށްތަކަށް ރުއް ހަދިޔާކޮށްފިއެވެ.
ރާއްޖޭގައި ރުއްގަހަށް ޖެހޭ ބަލީ އިތުރުވުމާއި، ރުކުގެ އާބާދީ ދަށްވުމުގެ ސަބަބުން ކުރުނބާ އަދި ކާށި ލިބުން ވަނީ ދަތިވެފައެވެ. އެކަމަށް ޙައްލެއް ގެނައުމަށް ސަރުކާރުން ފެއްޓެވި މަސައްކަތުގެ ދަށުން ވަނީ ފަސް ހާސް ރުއް ރާއްޖެ ގެނެސްފައެވެ. އަދި އެ ރުއްތަށް އަތޮޅުތެރޭގެ އެކި ރަށްތަކަށް ދަނީ ބަހަމުންނެވެ. އެގޮތުން 7 އަތޮޅެއްގެ 11 ރަށަކަށް މި ރުއްތައް ބެހުމަށް ސަރުކާރުން ނިންމާފައިވެއެވެ. މި ޕްރޮގްރާމްގެ ދަށުން ހއ އަދި ހދގެ ބައެއް ރަށްތަކަށް މިހާރު ވަނީ ރުއް ހަދިޔާކޮށްފައެވެ. އަދި މިހާރު ކުރިއަށްދަނީ ނ އަދި ރ އަތޮޅުގެ ރަށްތަކަށް ރުއް ހަދިޔާކުރުމުގެ މަސައްކަތެވެ.
ރާއްޖެ ގަނައު ރުއްތައް އިންދުމަށް ނ އަތޮޅަށް ވަަޑައިގެން މިނިސްޓަރ އޮފް ފިޝަރިޒް، މެރިން ރިސޯސަސް އެންޑް އެގްރިކަލްޗަރ ޑރ.ޙުސައިން ރަޝީދު ޙަސަން ވިދާޅުވީ މިހާރު ރަށްރަށަށް ރުއްތައް ބަހަމުން އަންނަނީ، އެ ރުއްތަކުގައި ބައްޔެއް ނެތްކަން ކަށަވަރުކުރުމަށް ފަހުކަމަށެވެ. އެހެންކަމުން އެރުއްތަކަށް ބައެއް އެރިޔަ ނުދިނުމަށާއި، ކެމިކަލް ބޭނުން ނުކުރުމަށް މިނިސްޓަރ އެދިވަޑައިގެންނެވިއެވެ. އަދި އެ ރުއްތައް ފޯދި، ދެ އަހަރާ ބައިގެ ތެރޭގައި މަންފާ ލިބެން ފަށާނެކަމަށް މިނިސްޓަރ ވިދާޅުވިއެވެ.
މިނިސްޓރ ވަނީ ރަށްރަށުގައި ރުއްގަނޑެއް ހެއްދިނަމަވެސް، އެ ސަރަހައްދުގައި ދަނޑުވެރިކަން ކުރުމަށް އެ ބިމުގެ ބޭނުންހިފުމަށްވެސް ކައުންސިލްތަކުގައި އެދިވަޑައިގެންފައެވެ. ސަބަބެއްކަމަށް މިނިސްޓަރ ވިދާޅުވީ މީހުން ދިރިއުޅޭ ރަށްރަށުގައި ކާބޯތަކެތީގެ ރައްކާތެރިކަމަށް ބޭނުންވާ މިންވަރަށް ކާނާ ހެއްދުމެވެ. މިނިސްޓާރ ވަނީ މި ރުއްތަކުން ކައުންސިލްތަކަށް އާމްދަނީ ލިބޭނެކަމަށްވެސް ވިދާޅުވެފައެވެ.
