ޔުއެފާ ޔޫރޮޕާ ކޮންފަރެންސް ލީގުގެ ސެމީ ފައިނަލް ފުރަތަމަ ލެގުގައި އޭޒީ އާލްކްމަރ ބަލިކޮށް ފައިނަލަށް ދިއުމުގެ ފުރުސަތު ވެސްޓް ހޭމް ޔުނައިޓެޑުން ބޮޑުކޮށްފިއެވެ.
ވެސްޓް ހޭމްގެ ދަނޑުގައި ކުޅުނު މިމެޗް އެޓީމުން ކާމިޔާބުކުރީ ފަހަތުން އަރާ 2 ލަނޑު އެއްލަނޑުންނެވެ. މިސީޒަންގެ ޔުއޭފާ ޔޫތު މުބާރާތް ކާމިޔާބުކޮށްފައިވާ އޭޒީ އާލްކްމަރ އިން މެޗްގެ ބޮޑު ބައި ކޮންޓްރޯލް ކުރި ނަމަވެސް ގިނަ ހަމަލާ ފެނިގެންދިޔައި ވެސްޓް ހޭމްގެ ފަރާތުންނެވެ. މިމެޗްގެ ފުރަތަމަ ލަނޑު މެޗްގެ 41 ވަނަ މިނެޓްގައި ޖަހާ މެޗްގެ ލީޑު ނަގާފައިވަނީ އާލްކްމަރއިންނެވެ. މިލަނޑު އެޓީމަށް ކާމިޔާބުކޮށްދިނީ ޓިޖާނީ ރެއިންޑަރސްއެވެ. ނަމަވެސް މިލަނޑު ޖެހުމުގައި ވެސްޓް ހޭމްއިން މިމުބާރާތުގައި ބޭނުން ކުރަމުން އަންނަ ކީޕަރ އަލްފަންސޯ އަރެއޯލާ އަށް ރަނގަޅަށް ތައްޔާރު ނުވެވި ހުރުން ބޮޑު ބައެއް ކުޅުނު ކަމަށް ގިނަ ފަރާތްތަކުން ފާހަގަ ކުރިއެވެ.
މިނަތީޖާ އާއެކު 1980 ވަނަ އަހަރަށް ފަހު ތައްޓެއް ހޯދުމަށް މަސައްކަތް ކުރަމުންދާ ވެސްޓް ހޭމްގެ އުއްމީދު ތަކަށް ކޮންމެވެސް ވަރެއްގެ ހީނަރު ކަމެއް އައިނަމަވެސް ދެވަނަ ހާފްގައި އެޓީމުން ނިކުތީ އާހިތްވަރާއެކުއެވެ. ނަތީޖާއަކަށް ވެގެންދިޔައީ ދެވަނަ ހާފްގައި އެޓީމްގެ ހަމަލާތައް އިތުރުވެ އާލްކްމަރ އިތުރަށް ހާސްކަމުގެ ތެރެއަށް ވެއްޓިގެންދިއުމެވެ. އެގޮތުން މިމެޗްގެ ނަތީޖާ ވެސްޓް ހޭމްއިން އެއްވަރު ކުރީ މެޗްގެ 67 ވަނަ މިނެޓްގައި ލިބުނު ޕެނަލްޓީއަކުންނެވެ. މިޕެނަލްޓީ އެޓީމަށް ކާމިޔާބު ކޮށްދިނީ ސައިދު ބެންރަހްމާއެވެ. އަދި މެޗްގެ 75 ވަނަ މިނެޓްގައި މިކައިލް އެންޓޯނިއޯ ޖަހާދިން ލަނޑާއެކު މިމެޗްގެ ލީޑު ވެސްޓް ހޭމްއިން ނެގިއެވެ.
މިކާމިޔާބީއާއެކު ދެވަނަ ލެގަށް ދާއިރު ވެސްޓް ހޭމްއަށް ކުޑަ ލީޑެއް ލިބިފައިވީ ނަމަވެސް އެމެޗް ފަސޭހަ ނުވާނެކަމަށް ވެސްޓް ހޭމްގެ ކޯޗް ޑޭވިޑް މޮޔެސް ހާމަކުރިއެވެ. ނަމަވެސް އެމެޗަށް ނިކުންނައިރު ކުޑަ ލީޑަކުންވެސް ކުރީގައި އޮވެވުމަކީ އޭނާއަށް ލިބިގެންދާ ހިތްހަމަޖެހުމެއް ކަމަށްވެސް އޭނާ ހާމަކުރިއެވެ.
