ވަޒީރެއްގެ އިތުބާރު ނުގެއްލޭކަމަށާއި ގެއްލިގެން އުޅެނީ ޕީޕީއެމް ކެންޑިޑޭޓެއްގެ ޔަގީންކަން ކަމުގައި ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.
މެމްބަރު ޝިފާއު މިހެން ވިދާޅުވީ ރާއްޖެ އާއި ޗާގޮސްއާ ދެމެދުގައިވާ ކަނޑުގެ ފުށުއަރާ ސަރަހައްދުގެ މައްސަލާގައި ބަންޑާރަ ނައިބަށް އެކި ތުހުމަތުކުރައްވައި އިދިކޮޅު ފަރާތްތަކުން މަޖިލީހަށް ހުށަހަޅާފައިވާ އިތުބާރު ނެތްކަމުގެ މައްސަލައާއި ގުޅިގެންނެވެ. ޝިފާއު ވިދާޅުވީ މިމައްސަލަ މަޖިލީހަށް ވެއްދީ އެއްވެސް ހާލެއްގައި ރިއްފަތަށް އިތުބާރު ނެތިގެން ނޫންކަމަށެވެ. ދިމާވެގެން އުޅޭ މައްސަލައަކީ ޕީޕީއެމްގެ ކެނޑިޑޭޓެއްގެ ޔަގީންކަން ގެއްލުނީކަމަށެވެ.
އެއްވެސް ވަޒީރެއްގެ އިތުބާރު ނުގެއްލޭ. ޕީޕީއެމް ކެންޑިޑޭޓެއްގެ ޔަގީންކަން ގެއްލުނީ.
– ޝިފާއު ވިދާޅުވިއެވެ.
ޝިފާއު މިހެން ވިދާޅުވީ ނަމަވެސް އެއީ ކޮން ބޭފުޅެއްކަމެއް ހާމަ ކުރައްވާފައި ނުވެއެވެ. އޭނާ ވަނީ އިއްޔެ މަޖިލީހުގައި ބޭއްވި ނޫސްވެރިންގެ ބައްދަލުވުމަށްވެސް ފާޑުކިޔާފައެވެ. އަދި އެފުރުސަތު މަޖިލީހުން ދީފައިވާގޮތާއި، އެކަމުގައި އަަމަލުކޮށްފައިވާ ގޮތަށްވެސް ޝިފައުވަނީ ފާޑު ވިދާޅުވެފައެވެ.
ގުޅިފައިވާ ސިޔާސީ ޕާޓީތައް ކަމަށްބުނެ މި ޓްވީޓް މަޖިލިސް އަކުން ނުކުރެވޭނެ. އަދި މިތާކު ހަގީގީ އެމް.ޑީ.ޕީ އެއްވެސް ބޭފުޅަކު ނެތް، މުޅިންވެސް ތިބީ އެމް.ޑީ.ޕީ އުފެއްދުމަށް ދެކޮޅުހެދި ފަރާތްތައް.
– ޝިފާއު ވިދާޅުވިއެވެ.
ބަންޑާރަ ނައިބުގެ އިތުބާރު ނެތްކަމަށް މަޖިލީހަށް ހުށަހަޅާފައިވަނީ އިދިކޮޅު ޕީޕީއެމް، ޕީއެންސީއާއި، ޖުމްހޫރީ ޕާޓީއާއި، އެމްއެންޕީ އަދި ރައީސް ނަޝީދަށް ތާއީދުކުރާ މެމްބަރުންގެ ތާއީދާއިވެސް އެކުގައެވެ. މިމައްސަލާގައި އިދިކޮޅު ފަރާތްތަކުން ކުރަމުންދާ ތުހުމަތުތަކާއި ގުޅިގެން އެމްޑީޕީން ވިދާޅުވީ ރާއްޖެ އާއި ޗާގޮސްއާ ދެމެދުގައިވާ ކަނޑުގެ ފުށުއަރާ ސަރަހައްދުގެ މައްސަލާގައި ދިވެހި ސަރުކާރުގެ ފަރާތުން ބަންޑާރަ ނައިބު ވަކާލާތުކުރައްވާފައި ވަނީ ރާއްޖޭގެ އެންމެ މަތީ މަސްލަހަތަށް އިސްކަން ދެއްވައިގެން ކަމަށެވެ.
ގައުމީ މަސްލަހަތާ ގުޅިފައިވާ މައްސަލައެއް އިޓްލޮސް އިން ނިންމި ގޮތުގެ ހަގީގަތް ދިވެހި ރައްޔިތުންނަށް ހާމައަށް ފެންނަން އޮއްވައި, ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތް ކަމުގެ ވޯޓު ނަގަން ކުރާ މަސައްކަތް އެމްޑީޕީން ކާމިޔާބުވިޔަ ނުދެއްވާނެ ކަމަށް އެމްޑީޕީންވަނީ ވިދާޅުވެފައެވެ. އަދި ގައުމުގެ މިނިވަންކަމާއި އިސްތިގުލާލު ދިފާއުކުރައްވައި ބަންޑާރަ ނައިބު ކުރެއްވި މަސައްކަތްޕުޅާ ގުޅުވައި ނަގަން އުޅޭ އިތުބާރު ނެތް ކަމުގެ ވޯޓާ ދެކޮޅަށް, ބަންޑާރަ ނައިބު އިބްރާހިމް ރިފްއަތުއާ އެކުގައި ރައްޔިތުންގެ މަޖިލީހުގެ އެމްޑީޕީ ޕާލިމަންޓަރީ ގްރޫޕް އޮތްކަމުގެ ޔަގީންކަން ވަނީ ދެއްވާފައެވެ.
ވަޒީރެއްގެ އިތުބާރު ނެތްކަމުގެ މައްސަލައެއް މަޖިލީހަށް ވެއްދޭނީ މަދުވެގެން 10 މެންބަރުންގެ ސޮއިއާއެކުއެވެ. އަދި ވަޒީރެއްގެ އިތުބާރު ނެތްކަމަށް ފާސްކުރުމަށް މަޖިލީހުގެ 43 މެމްބަރުންގެ އަޤްލަބިއްޔަތު ބޭނުންވާއިރު އިދިކޮޅު ފަރާތްތަކަށް އޮތީ 29 މެންބަރުންގެ ތާއީދެވެ.
