ދުނިޔޭގެ މިވަގުތު އޮތް އެންމެ ބޮޑު ސޯޝަލް މީޑިއާ ޕްލެޓްފޯމް ކަމުގައިވާ ޓުވިޓަރއަށް އާ ސީއީއޯއަކު ހަމަޖައްސާފައިވާ ކަމުގައި، 42 ބިލިއަން އެމެރިކާ ޑޮލަރަށް ދާދިފަހުން ޓުވިޓަރ ކުންފުނި ގަނެފައިވާ، މަހުޖަނު އެލޮން މަސްކު ވިދާޅުވެއްޖެއެވެ.
ޓުވިޓަރ ކުންފުންޏަށް އާ ސީއީއޯއަކު ހަމަޖައްސާފައިވާކަން އެލޮން މަސްކު ހާމަކޮށްފައިވަނީ، ޓުވިޓަރ ޕްލެޓްފޯމް ގަތުމަށްފަހު އެކުންފުނީގެ ސީއީއޯކަމުން އޭނާ ދުރަށް ގޮސް، ކުންފުނި ހިންގުން އާ ސީއީއޯއަކާއި ހަވާލު ކުރައްވާނޭކަން މަސްކު އިއުލާން ކުރިތާ އެތައް މަހެއް ފަހުންނެވެ.
ޓުވިޓަރގެ ހިންގުމުން އޭނާ ދުރަށް ގޮސް، އެހެން މީހަކު ސިއީއޯއަކަށް ހަމަޖައްސަން ފެނޭތޯ މަސްކު ނެގި، ޓުވިޓަރ ޕޯލްއިން ބޮޑު ތަފާތަކުން އާންމު ވޯޓު ލާފައިވަނީ އެހެން ފަރާތެއް އެ ކުންފުނީގެ ސީއީއޯއަކަށް އައްޔަން ކުރުމަށް ތާއީދު ކޮށެވެ.
ކުރިޔަށްއޮތް މަދު ހަފްތާތަކެއްގެ ތެރޭގައި ޓުވިޓަރގެ ހިންގުމާއި އާ ސީއީއޯ ހަވާލުވާނެކަން މަސްކު ހާމަކޮށްފައިވި ނަމަވެސް، އެއީ ކޮން ފަރާތެއްކަން އޭނާ ހާމަކޮށްފައެއް ނުވެއެވެ.
އެހެންނަމަވެސް ވޯލްސްޓްރީޓް ޖާނަލްއިން، މައުލޫމާތު އެގިހުރި ފަރާތްތަކާއި ހަވާލާދީ ރިޕޯޓު ކޮށްފައިވާ ގޮތުގައި ޓުވިޓަރގެ އާ ސީއީއޯގެ މަގާމަށް ހަޖައްސާފައިވަނީ "އެންސީބީ ޔުނިވާރސަލް"ގެ އެޑްވަޓައިސިންގ ހެޑްގެ ގޮތުގައި ހުންނެވި ލިންޑާ ޔަކަރިނޯއެވެ. ވޯލްސްޓްރީޓް ޖާނަލްއިން ބުނެފައިވަނީ އޭނާ ގެންދިޔައީ އެ ވަޒީފާއަށް ދިއުމަށް ޓުވިޓަރއާއި ވާހަކަ ދައްކަމުން ކަމުގައެވެ.
"އެކްސް/ޓުވިޓަރއަށް އާ ސީއޯއަކު އައްޔަން ކޮށްފައިވާކަން އުފަލާއެކީ އިއުލާން ކުރަން. އޭނާ ކުރިޔަށް އޮތް 6 ހަފްތާތެރޭ ޓުވިޓަރގައި މަސައްކަތް ކުރަން ފަށާނެ،" މަސްކުގެ ޓުވީޓުގައި ވިދާޅުވެފައި ވެއެވެ.
ދާދި ފަހުން ޓުވިޓަރ ކުންފުނީގެ ނަން ވަނީ .Twitter Inc އިން .X Corp ގެ ނަމަށް ބަދަލު ކޮށްފައެވެ.
ފާއިތުވެދިޔަ އަަހަރު ޓުވިޓަރ ގަތުމަށްފަހު މަސްކުވަނީ "ޗީފް ޓުވިޓްގެ" ނަމުގައި އެކުންފުނި ހިންގުމުގެ އެންމެ އިސް ފަރާތުގެ ގޮތުން، ކުއްލި ބޮޑެތި ބަދަލުތަކެއް އެ ޕްލެޓްފޯމަށް ގެނެސްފައެވެ. އޭގެ ތެރޭގައި، ޓުވިޓަރގެ އެކައުންޓުތައް ވެރިފައި ކުރުމަށް ކުރިން އެކުންފުނިން ގެންގުޅުނު އުސޫލުތައް ހިމެނެއެވެ.
އާ ސީއީއޯއަކާ ޓުވިޓަރގެ ހިންގުން ހަވާލު ކުރުމަށްފަހު އެލޮން މަސްކު އަދާކުރައްވާނީ އެ ކުންފުނީގެ އެގްޒެކެޓިވް ޗެއަރ އަދި ޗީފް ޓެކްނޮލޮޖީ އޮފިސަރގެ މަގާމެވެ. އެއަށްފަހު އޭނާ ބަލަހައްޓަވާނީ އެ ކުންފުނީގެ ޕްރޮޑަކްޓްތަކާއި، ސޮފްޓްވެއަރ އަދި ސިސްޓަމް އޮޕަރޭޝަންގެ ކަންކަމެވެ.
