އަންނަ މަހު 12 ވަނަ ދުވަހު އޮންނަ ބާސްކެޓް އެސޯސިއޭޝަނުގެ އިންތިހާބުގައި ވޯޓުލުމުގެ ހައްގު ލިބިފަވަނީ 23 ކުލަބަކަށްކަމަށް އެ އެސޯސިއޭޝަނުން ހާމަކޮއްފިއެވެ.
އިންތިޚާބުގައި ވޯޓުދިނުމުގެ ހައްގުލިބިފައިވާ ފުރިހަމަ މެންބަރު ކުލަބު/ ޖަމުޢިއްޔާތައް ތަމްސީލުކުރާ މަންދޫބުން ރަޖިސްޓާ ކުރުމަށް ހުށަހަޅާ ޕްރޮކްސީ ފޯމާއި، އިންތިޚާބުގައި ހޮވާ މަގާމުތަކަށް ކުރިމަތިލުމަށް ހުށަހަޅާ ފޯމު ޑިސެމްބަރު މަހުގެ އެކަކުން ފެށިގެން 10 ވަނަ ދުވަހުގެ ނިޔަލަށް ބަންދުނޫން ކޮންމެ ދުވަހެއްގެ ހެނދުނު 9:00 ން 12:00 ށް އެ އެސޯސިއޭޝަނުން ލިބެން ހުންނާނެ ކަމަށްވެސް ވަނީ ބުނެފައެވެ.
އެމްބީއޭއިން ނެރުނު ބަޔާނެއްގައި ބުނީ އެ އެސޯސިއޭޝަނުގެ ކުރިއަށް އޮތް ދައުރުގެ ހިންގާ ކޮމިޓީ އިންތިޚާބުކުރުމަށްޓަކައި އާންމު ޖަލްސާއެއް ޑިސެމްބަރު މަހުގެ 12 ވާ ހޮނިހިރު ދުވަހުގެ ހަވީރު 05:00 ގައި ސޮލައިޓް ރެސްޓޯރަންޓުގެ ނުވަވަނަ ފަންގިފިލާގެ އިންޑޯ ހޯލުގައި ބޭއްވުމަށް ހަމަޖެހިފައިވާ ކަމަށެވެ.
މި އިންތިޚާބުގައި ވާދަނުކުރައްވަން އެ އެސޯސިއޭޝަނުގެ މިހާރުގެ ރައީސް އަޙްމަދު މަމްދޫހު ވަނީ ނިންމަވާފައެވެ.
