ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން މިނިވަންކޮށް ކުރިއަށް އޮތް ރިޔާސީ އިންތިހާބުގައި ވާދަކުރެވޭނެ މަގު ފަހިކުރުމުގައި ޔޫރަޕިއަން ޔޫނިއަންގެ އެހީތެރިކަމަށް އިދިކޮޅު ޕްރޮގްރެސިވް ކޯލިޝަނުން އެދިއްޖެއެވެ.

ޔޫރަޕިއަން ޔޫނިއަންގެ ޔޫރަޕިއަން އެކްސްޓާނަލް އެކްޝަން ސަރވިސްގެ ޑެޕިއުޓީ މެނޭޖިންގ ޑިރެކްޓަރ ފޮރ އޭޝިއާ އެންޑް ޕެސިފިކް، މިސް ޕައޯލާ ޕަމްޕަލޯނީ، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އަރިހަށް ކުރެއްވި އިޙްތިރާމުގެ ޒިޔާރަތަށްފަހު ވަނީ މަޖިލިސް ރައީސް މުހައްމަދު ނަޝީދު ހިމެނޭހެން މަޝްވަރާތަކެއް ކުރައްވާފައެވެ.

މިމަޝްވަރާތަކުގައި ކުރިއަށްދިޔަ ވާހަކަތަކާއި ގުޅޭގޮތުން ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވީ މިބައްދަލުވުމުގައި ޕީ.އެން.ސީ ޕީ.ޖީ ލީޑަރ އާދަމް ޝަރީފާއި، ޕީޕީއެމްގެ ނައިބް ރައީސް އަހުމަދު ޝިޔާމް އަދި ޕީ.އެން.ސީ ނައިބުރައީސް އަދި ކޯލިޝަން ފޮރިން ރިލޭޝަން ހެޑް މުހައްމަދު ސައީދު ވަނީ ރައީސް ޔާމިނަށް ނުހައްޤުން ދެމުންދާ އަނިޔާ ގުޅޭގޮތުން ފުޅާދާއިރާއެއްގައި ޔޫރަޕިއަން ޔޫނިއަން ވަފުދަށް މަޢުލޫމާތު ދެއްވާފައިކަމަށެވެ.

މީގެ އިތުރުން މިބައްދަލުވުމުގައި ވަނީ ރައީސް ޔާމިނަކީ އިދިކޮޅު ރިޔާސީ ކެނޑިޑޭޓް ކަމަށާއި އެމަނިކުފާނުގެ ކެނޑިޑެންސީ އަށް ސަރުކާރުން އަޅާ ހުރަސްތަކާބެހޭ ގޮތުން ފުޅާދާއިރާއެއްގައި ވާހަކަފުޅު ދައްކަވާފައިވާކަމަށް ޝުޖާ ވިދާޅުވިއެވެ.

ރައީސް ޔާމީން މިނިވަންކޮށް އިންތިހާބުގައި ވާދަކުރެވޭނެ މަގު ފަހިކުރުމުގައި EUގެ އެހީތެރިކަމަށްވެސް ވަނީ އެދިވަޑައިގެންފަ. ރައީސް ޔާމީން މިނިވަންކޮށް އިންތިހާބުގައި ވާދަކުރެވޭނެ ގޮތް ހޯދުމަށް އަޅުގަނޑުމެން މިކުރާ މަސައްކަތުގައި ބައިނަލް އަގުވާމީ ފަރާތްތަކުން ދެމުންގެންދާ އެހީތެރިކަމަށް އަޅުގަނޑުމެން އިންތިހާއަށް ޝުކުރުދަންނަވަން.

– ޝުޖާ ވިދާޅުވިއެވެ.

ވ. އާރަށުގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލެވި ދެ ދަޢުވާއެއް ސާބިތުވުމާ ގުޅިގެން އެމަނިކުފާނުގެ މައްޗަށް 11 އަހަރުގެ ޖަލު ޙުކުމެއް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ވަނީ އިއްވަވާފައެވެ. އަދި އެމަނިކުފާނު މިވަގުތު ހުންނެވީ ޙުކުމް ތަންފީޒުކުރެއްވުމަށް ކ.މާފުށީ ޖަލުގައެވެ. ރައީސް ޔާމީނަށް އިއްވާފައިވާ ހުކުމުގެ ސަބަބުން ރިޔާސީ އިންތިޚާބުގައި ވާދަކުރުމުގެ ފުރުސަތު މިހާރަކު ނެތެވެ.

ނަމަވެސް ރައީސް ޔާމީންގެ ޖަލު ހުކުމް މިހާރު ހައި ކޯޓުގައި އިސްތިއުނާފް ކޮށްފައިވާއިރު، ހައިކޯޓުން ޖަލުހުކުމް ބާތިލްކޮށްފިނަމަ އިންތިޚާބުގައި ވާދަކުރުމުގެ ޖާގަ އޮންނާނެއެވެ. އިލެކްޝަންސް ކޮމިޝަނުންވެސް ވަނީ ރައީސް ޔާމީނަށް ރިޔާސީ އިންތިޚާބުގައި ވާދަކުރުމުގެ ފުރުސަތު އޮތްކަމަށް ވިދާޅުވެފައެވެ.